رحلتي مع بيجو 508 موديل 2014

**fadaly25** · 24-03-2016 11:20 PM

السلام عليكم
احب اشارككم تجربتي مع سيارتي البيجو واللي اقدر اقول اني ندمت اني اشتريت بيجو

اشتريت السياره في شهر 9 سنه 2013 الهاي لاين ب272000 جنيه
صيانات كلها في المعاد
في شهر 9 سنه 2015 طحنت يعني ميه الردياتير وزيت الفتيس اتخلطو وبعد شهر بالكامل من المداولات وطلو الروح اتغير الفتيس بالكامل على حساب الضمان والسياره كانت ماشيه 46000 كلم

في شهر 3 سنه 2016 لاقيت تسريب زيت من الموتور وديتها التوكيل قالو الاتي :
1/ كبس الزيت في الموتور ضعيف
2/تسريب زيت من جوان التاكيهات
3/مبرد زيت الموتور بايظ وبيسرب زيت كمان
يعني العربيه بتسرب زيت من فوق ومن تحت
رحت انا كمان جايب مايه من كل مكان
المهم العربيه كانت عامله 53000 كلم
بعد اسبوعين من المداولات قالو انهم حيغيرو اماكن تسريب الزيت وده اللي تم وامشي بيها 1000 كلم للتجربه وبعد كده ارجع ليهم يشوفو كبس الزيت اخباره ايه

العربيه فاضل فيها 6 شهور على الضمان وانا للأسف عارف انهم المفروض الموتور يتغيير بس هما عملين علاج مسكن لحد ماتخرج بره الضمان
وعارف انه بعد 1000 كلم التجربه حيقولو ليا كل حاجه تمام وعربيتك زي الفل

حبيت ابدل السياره بواحده جديده قالولي ياسلام انت تؤمر
طيب بكام تاخدوها مني قالولي 150 او 160 بالكتير
بصراحه ضحكت وسكت

الصراحه البيجو سياره ممتازه لكن العيوب كتيره ومفيش حاجه بتتصلح في التوكيل وترجع زي الاول

**man1974** · 25-03-2016 10:57 AM

حسبنا الله ونعم الوكيل
ربنا يعوض عليك
مفيش سيارة ممتازة في الدنيا، فلوسك هي اللي ممتازة، 270 ألف مبلغ كبير
حاول معاهم على قد ما تقدر، شكوى في حماية المستهلك، ارفع قضية، أي شوشرة، لعلهم يغيروا المتور
ولو مكنش
بعد انتهاء فترة الضمان اكشف على العربية برة عند واحد ميكانيك شاطر، صدقي هيظبطهالك إن شاء الله وبسعر حنين جدا مقارنة بالتوكيل النصاب ده،
الغ فكرة البيع حاليا عشان حرام تخسر الخسارة دي

ربنا يوفقك

**AHMEDJUDDY** · 25-03-2016 02:54 PM

قدر الله و ما شاء فعل .... حاول تعمل شكوي اثبات حاله في حمايه المستهلك قبل الضمان ما يخلص ... لان الضمان لو خلص والمسكنات اللي عملوها خلصت هي كمان ... صدقني هتزعل اوي من اللي هتشوفه و هتسمعه . وبلغ حمايه المستهلك ان الموتور محتاج تغيير و التوكيل بيماطل و ان شاء الله لو ربنا كاتب العربيه بتتعرض علي لجنه فنيه و اللجنه هي اللي بتحدد .