قاعدة الموتور باظت تانى

**Faras** · 16-04-2016 03:10 PM

قاعدة الموتور باظت, غيرتها باظت تانى بعد 2000 كم
اعمل ايه ....
الموتور بيرزع على الاول ومع المطبات بيعمل صوت طقة لو حاطت نقلة

**ahmed_eng2001** · 16-04-2016 06:09 PM

حضرتك جبت القاعدة الاصلى ؟
نوع العربية ايه ؟ و انهى قاعدة بالظبط ؟

كدة لازم تبص على ايه الى ممكن يكون مش مظبوط و بيخلى القاعدة دى بالذات تبوظ !!!!
متابع معاك

**borio1704** · 16-04-2016 07:39 PM

فيه حاجات في العربية ما ينفعش تتغير لوحدها... من ضمنها قواعد الموتور...

يعني ما ينفعش تغير قاعدة واحدة وتسيب الاتنين التانيين.. الطقم كله لازم يتغير لإنهم كلهم بيأثروا على بعض..

ده غير إن القواعد دي عبارة عن كاوتش متعشق في حديد.. ولو عربيتك عمرها أكتر من 5 سنين فتوقع إن أي أجزاء كاوتش في العربية هتبدأ تتشقق وتبوظ.. لإن الأجزاء الكاوتش عمرها مش بيزيد عن 5 سنين... 7 سنين بالكتير.

...

**borio1704** · 16-04-2016 09:16 PM

المشاركة الأصلية كتبت بواسطة ahmed_eng2001

بالرغم من اتفاقى مع حضرتك فى الرأى .... بس اسمحلى اوضح نقطة مهمة موجودة فى اغلب السوق و المجتمع المصرى

لو الميكانيكى قال الكلام ده ... يبقى الميكانيكى عاوز يفتح شغل ... و بيستسهل .. و يغير و بس
لو بتاع قطع الغيار اقترح الكلام ده ... يبقى عاوز يبيع و خلاص
لو احد الاصدقاء قال الكلام ده .... يبقى ايده فى الميه الباردة و مش حاسس بالمشكلة

فكر الصيانة الوقائية ... و استئصال العطل من جذوره .... مع محاولة تجنب العطل مرة اخرى ..... تقريبا مش موجود !!!! ... مع تعاملى مع صنايعية مختلفين ..... شفته مرات قليلة جدا

الفكر السائد ..... تغير قطعة الغيار لما تتلف ... و مفيش مانع انها تبوظ حاجة تانية وراها ... عيشنى النهاردة و موتنى بكرة

الحالة الاقتصادية ... و محاولة التوفير ....هو الفكر السائد ... فالناس بتدور توفر ازاى فى قطع الغيار ... فاللجوء لاستخدام قطع غيار غير اصلية هو احد الحلول

مع كامل احترامى للأخ صاحب الموضوع ... انا بتكلم بصفة عامة و لا اقصد سوءا باحد :)
متابعين معاك

أتفق مع حضرتك تماما في النقاط اللي حضرتك ذكرتها... وللأسف دي فعلا الثقافة السايدة ..

كل اللي حضرتك قلته أنا مريت بيه تماما... من أول مبدأ عيشني النهاردة وموتني بكره.. لحد التعامل مع الصنايعية المحترمة اللي عايزة تحل المشكلة جذريا.. واللي بقى أسلوب تفكيري أنا شخصيا بعد كده.

أنا كنت بتكلم بحكم خبرتي في صيانة سيارتي.. وبحكم خبرتي السابقة كمهندس صيانة في الصناعة... وبحكم شغلي حاليا في مجال الجودة.

...

**Faras** · 16-04-2016 10:32 PM

العربية رينو لوجان 2011 ماشية 80,000 كم
القاعدة الى فوق هى الباظت وجبت نوع تركى
القاعدتين التحت كويسين

**lancer06** · 17-04-2016 05:49 AM

مرحبا borio1704
مرحبا ahmed_eng2001
مرحبا اخوانى الكرام
مع اتفاقى التام مع حضراتكم
فى حاجات ليها تأثير كبير على قواعد الموتور والعفشه
منها حاجه كنت بعانى منها كتير وغيرت بسببها قواعد الموتور كذا مره
خبطه العربيه من قدام بتخلى كراسى الموتور راكبه مش مستريحه ودا اللى حصل معايا
اشتريت عربيه ومكنتش اعرف انها مغيره شنب ( الجزء اللى ورا الاكصدام اللى بيبات عليه الكبوت من قدام - ودا تغيره بيبقى علشان العربيه اخده خبطه محترمه من قدام)
المهم اثر الخبطه دى ادى الى عوجه بسيطه فى الشاسيه غيرت كذا مره القواعد وبرضه مبتظبطش لانها راكبه مش مرتاحه الصح انها كان يتعملها زرجينه
فبيكون فيها لفه بسيطه جدا جدا وعلشان القواعد الموجوده بتكون ناشفه شويه مع انها راكبه مش مرتاحه بتتكسر بسرعه
وبرضه تركيب قواعد غير اصليه تخليها متعمرش بس مش لدرجه ٢٠٠٠ كيلو وتبوظ
خلاصه القول الموتور لو مش بايت مرتاح مش هينفع نغير قواعد
وممكن طريقه القياده نفسها لو بتاكل مطبات كتير تبوظ القواعد
واخر نقطه للاخ فارس الكرسى اللى بايظ كرسى الفتيس مش كده

**Faras** · 17-04-2016 10:05 AM

المشاركة الأصلية كتبت بواسطة lancer06

مرحبا borio1704
مرحبا ahmed_eng2001
مرحبا اخوانى الكرام
مع اتفاقى التام مع حضراتكم
فى حاجات ليها تأثير كبير على قواعد الموتور والعفشه
منها حاجه كنت بعانى منها كتير وغيرت بسببها قواعد الموتور كذا مره
خبطه العربيه من قدام بتخلى كراسى الموتور راكبه مش مستريحه ودا اللى حصل معايا
اشتريت عربيه ومكنتش اعرف انها مغيره شنب ( الجزء اللى ورا الاكصدام اللى بيبات عليه الكبوت من قدام - ودا تغيره بيبقى علشان العربيه اخده خبطه محترمه من قدام)
المهم اثر الخبطه دى ادى الى عوجه بسيطه فى الشاسيه غيرت كذا مره القواعد وبرضه مبتظبطش لانها راكبه مش مرتاحه الصح انها كان يتعملها زرجينه
فبيكون فيها لفه بسيطه جدا جدا وعلشان القواعد الموجوده بتكون ناشفه شويه مع انها راكبه مش مرتاحه بتتكسر بسرعه
وبرضه تركيب قواعد غير اصليه تخليها متعمرش بس مش لدرجه ٢٠٠٠ كيلو وتبوظ
خلاصه القول الموتور لو مش بايت مرتاح مش هينفع نغير قواعد
وممكن طريقه القياده نفسها لو بتاكل مطبات كتير تبوظ القواعد
واخر نقطه للاخ فارس الكرسى اللى بايظ كرسى الفتيس مش كده

كلام منطقى .... طب ازاى اعرف ان الشاسيه معوج
بالنسبة للمطبات الى فى شورعنا تفتكر تخلى القاعدة تبوظ بعد قد ايه

**lancer06** · 18-04-2016 04:22 AM

المشاركة الأصلية كتبت بواسطة faras

كلام منطقى .... طب ازاى اعرف ان الشاسيه معوج
بالنسبة للمطبات الى فى شورعنا تفتكر تخلى القاعدة تبوظ بعد قد ايه

هو بينصح بتغيير القواعد من ٥٠ الى ٦٠ ألف كيلو متر بس ده طبعا راجع للأستخدام الشاق او للأستخدام المثالى
تعرف ان الشاسيه فيه عوجه او مش مظبوط
اولا لو عربيتك من الزيرو اكيد هتعرف اذا كان فى حادثه او غيره واتصلحت فوارد انها متكونش اتعملت صح
ولو شاريها مستعمله ممكن تروح لسمكرى شاطر يتأكد
ويطمنك
لكن دا مجرد احتمال علشان متقلقش نفسك والموضوع يكون ابسط من كدا