الموضوع: تحالف البوابين زقوووو العربية على ال p

أحبائي و أعزائي أعضاء منتدى nilemotors الكرام ، الموضوع و ما فيه أن زي ما حضراتكم عارفين أن ركنة العربية بالليل أصبحت قطعة من العذاب خصوصا أذا كنت حضرتك راجع في وقت متأخر بالليل بعد سهرة عند أحد الأقارب أو الأصدقاء و أضطرتك الظروف أنك ترجع الساعة 1.00 بالليل مثلا فتلاقي الأرض حوالين بيتك متستفة عربيات من جميع الأتجاهات . فتلاقي حضرتك نفسك مضطر تقفل على صف عربيات قدامك , المشكلة بئا لما تبقى عربية حضرتك أتوماتيك زي حالاتي ( دايهاتسو سيريون موديل 2011 ) و المفتاح ما بيخرجشي من الكونتاكت ألا أذا كان الفتيس معشق على ال P يعني عمر العربية ما حا تتعتع من مكانها أبدا .. المهم أن هذا هو ما حدث معي بالفعل و تاني يوم الصبح صاحب العربية اللي قدامي و اللي أنا كنت قافل عليه ما كنشي عنده صبر لحد ما أنزل من بيتي و أحرك العربية و أفتح له سكة يعدي منها , ده هو أساسا ما يعرفشي أنا من أنهووو عمارة و لا ساكن فين , قام راح جايب ( تحالف من البوابين ) و قعدو يزقووو في العربية عشان يحركوها من مكانها ، و لما فشلو عملو تحريات لحد ما عرفو أنا فين و طلعولي فوق ، المهم لما نزلت وركبت العربية أول ما قعدت في الكرسي و قبل ما أدور الكونتاكت سمعت فيه صوت زي ما تكون حاجة حديد خبطت مع بعضاها و ده شئ غير مألوف في الأحوال العادية ، المهم بعد ما دورت و نزلت فرامل اليد و بدأت أحرك أيد الفتيس تكرر نفس الصوت من تاني و بان زي ما تكون كده أيد الفتيس مش عايزة تتحرك من مكانها ، المهم أني ( أتعافيت ) عليها لحد ما أتحركت و رجعت لورا بالعربية و طلعت العربية اللي قدامي .. و بعد كده مشيت بالعربية عادي و أختفى الصوت و أيد الفتيس رجعت تتحرك عادي ، و السؤال اللي أنا بسأله لحضراتكم ، أولا : ما هي خطورة زق العربية و هي معشقة على ال P و هل هذا يؤدي لحدوث أي كسور أو تلف داخل الجيربوكس ، ثانيا : هل يمكن مع شدة الزق فرامل اليد ( تفوت ) و تبدأ توصل حركة الزق للجيربوكس و هو على ال P و أذا كان الأمر كذلك تبئا أييييييه هي فايدة فرامل اليد أذا لم تكن توفرحماية كافية للجيربوكس و الفتيس ، ثالثا : ما هو تفسير حضراتكم للصوت اللي سمعته و لحشرجة يد عصا الفتيس هل هو ناتج عن تلف رجلشة فرامل اليد مثلا أم هو ناتج عن خلل في تروس الفتيس ، رابعا : هل يمكن أن يكون حدث تلف للجيربوكس من جراء ما حدث و كيف يمكن التحقق من ذلك و تلافيه مستقبلا ، مع العلم أن ظروف السكن أكيد ستضطر الواحد أنه يركن بنفس الأسلوب مرارا و تكرارا ، و لكم مني جزيل الشكر مقدما على أي أفادة ترد من حضراتكم أستفيد منها و قد يستفيد منها أيضا رواد المنتدى الكرام عاجلا أو آجلا ، و السلام عليكم و رحمة اللله و بركاته ،،،

بس في الحقيقة أنا فكرت في طريقة تانيه يمكن تمنع أي حد أنه يزق العربية من مكانها أو تقلل من تأثير الزق .. و هى أني بدل ما خلي العجل في ال straight حاا آدي الدركسيون لفة كاملة و أنا خارج من العربية و أخلي العجل معووووج .. يمكن ده يزود شوية من أحتكاك العجل مع الأرض و يمنع تحريك العربية من مكانها .. بس في الحقيقة مش متأكد أذا كانت الطريقة دي فيها حماية كافية للجيربوكس و لا لأ

لا موش كافيه .. التأثير هيكون هو نفسه لو رفعوا العربيه اثناء الزق
و برضه لما بتكون كاسر العجل بيكون فيه واحد بيعدل العجله الاماميه اثناء الزق علشان تمشى فى اتجاه مستقيم اثناء الزق

الافضل احد الحلول التاليه
- دور فى كتالوج العربيه .. لانه لازم يقول لك تعمل ايه فى حاله الطوارئ لسحب العربيه
- انت تسأل فى التوكيل عن طريقه فك التعشيقه لعربيتك من p .. و ده افضل حل
- تسأل كهربائى او ميكانيكى عن الطريقه
- تدور على النت عن الطريقه
- او القفل اللى زى بتاع المرور اللى بيتربط على العجله ( ان كان بينفع لمنع الحركه .. لانى لم استعمله سابقا)