لو عندك موبيل قديم مترميهوش --شغله كاميرا فيديو فالعربيه

**salam100100** · 20-04-2016 04:14 PM

بقالى فتره بدور على كاميرا بتركب وتسجل الطريق قدام العربيه
عندى فضول اصور الطريق بكل المخاطر الليبنعدى بيها- وممكن لو حصل حادثه اقدر اثبت خطء مين
الفكره جاتلى من اليوتيوب- كنت بتفرج على فيديوهات حوادث الطرق
اغلبهم متصور فروسيا
وعرفت ان فى روسيا اغلب العربيات فيها كاميرات - بيستخدموها فى التعويضات وشركات التامين

المهم لقتها علة سوق دوت كم بتتباع ب300 وتوصل ل1600 جنيه

قلت اعمل سيرش يمكن يكون فى ابليكيشن بتعمل نفس الكلام دا
وفعلا لقيتها

Drive Cam Recorder

البرنامج دا بيقدر يسجل فيديوهات مستمره ولما الميمورى تخلص يرجع يمسح ويسجل عليها
بتقدر تحدد حجم الملفات كام دقيقه تصوير وتحدد جوده التسجيل
تقدر تبين سرعه العربيه ومكانها عن طريق ال GPS
بتقدر تسجل بصوت وممكن تلغيه

الفرق بين الموبايل وكاميرات العربيه ان كاميرا العربيه فيها G sensor - لما بتكون العربيه مطفيه - الكاميرا بتطفى- اول مالعربيه تتهز او تتخبط- السينسور بيحس بدا ويشغل الكاميرا ويسجل علطول لمده 30 ثانيه - فممكن يساعدك تعرف مين اللى خبط العربيه

فقررت اجيب موبايل قديم عندى مركون- هجبله كارت ميمورى 16 جيجا ووصله شاحن ولاعه
وحامل واجرب اسجل المهم الموبايل ميتسرقش

ايه رائكم؟

**alking_2006** · 20-04-2016 05:22 PM

المخاطرة هتبقى كدا فى الكهربا لا قدر الله يحصل ماس من شاحن الموبيل

**رامي مصطفى** · 20-04-2016 05:23 PM

فكره رائعه والله ربنا يباركلك
ووافينا بالاخبار
ممكن تثبتها وراء المرايه اللي في النص فوق هتكون متداريه شويه وهتكون كاشفه الطريق افضل

**ahmed.biso13** · 20-04-2016 06:12 PM

اهم حاجة التنفيذ ولو فى خطا
ممكن اى حد خبير بالالكترونيات يكملك
وعلى فكرة ممكن تستخدم سنسور ركن السيارات وده عامل 90 جنيه
واى طلبات انت ممكن تكملها من مول النخيلى بباب اللوق فى تصنيع اى بوردة فى الدنيا واى قطع غيار بس غالى شوية

**Mohamed Desoky** · 20-04-2016 06:47 PM

فكره جميله ولعلمك فى روسيا الكاميرا من اساسيات السياره عند الترخيص وممنوع اى سياره تمشى بدون كاميرا داخليه واتمنى ان فكرتك تنفز وياريت شويه صور مع موضوع اثناء التركيب لتعم الفائدة لباقى الزملاء

**memo_p910** · 20-04-2016 09:10 PM

الكاميرا في روسيا فعلا عامله شغل حلو وبيحملوها على اليوتيوب المهم يامعلم تخبي الموبايل جوه علبة مناديل مثلا علشان السرقه

**tito32** · 20-04-2016 09:28 PM

المخاطرة هتبقى كدا فى الكهربا لا قدر الله يحصل ماس

**Elawany13** · 20-04-2016 11:53 PM

البرنامج لا يعمل على موبايلات الاندرويد القديمة محتاج جهاز حديث نسبيا

**salam100100** · 21-04-2016 09:27 AM

المشاركة الأصلية كتبت بواسطة رامي مصطفى

فكره رائعه والله ربنا يباركلك
ووافينا بالاخبار
ممكن تثبتها وراء المرايه اللي في النص فوق هتكون متداريه شويه وهتكون كاشفه الطريق افضل

شكرا
انا فعلا جربتها امبارح بليل ودى الملاحظات:
1. ثبت الموبيل ب2 استك فالمرايه اللى فالنص- موصلتش شاحن- حاجه كدا سريعه وقدت الغرض
2- التصوير على دقه 480 بيكسل (كان فى 720- و1080)
3- الدقيقه الواحده بتستخدم 25 ميجا بيتس
4-الروئيه الليليه معقوله محتاج تشغل النور المتوسط عشان يكشف الطريق وقت التسجيل- تقدر تميز الاشخاص بوضوح
5- التسجيل بالدقه دى حلو جدا- نمر العربيات واضحه لما تكون العربيات ماشيه ببطىء- لكن لما بتكون بتجرى مبتبقاش واضحه
6-احسن مساحه للملفات هى انه يسجل بالدقيقه- يعنى كل دقيقه تسجيل بتنزل على ملف لوحده
7- التسجيل الصبح واضح جدا- احسن من الليل
8- لغيت الصوت وقت التصوير عشان لوحصل واتشتمت :)
المشاكل:
واجهتنى مشكله ان الموبيل بيهنج (مش عارف دا عيب الموبيل ولا الابليكيشن)
زاويه التسجيل صغيره- بالمقارنه بكاميرات التسجيل بتاعت العربيات بتسجل بزاويه 140 ل170 درجه
طبعا الموبيل واضح وهو متركب- مش هسيبه فالعربيه- هسيبه راكب طول منا فالعربيه
كارت الميمورى 2 جيجا- شكلة هحتاج اغبره بكارت 64 جيجا عشان يسجل 20 ساعه مثلا متواصل

لو حصل ماس فيوز الولاعه هيتحرق فمفيش مشكله

فالنهايه:
تجربه حلوه انك تسجل طريقك وتسجل العربيات اللى من غير نمر وهى بتغرز وعربيات النقل اللى بتمشى على الشمال بسرعه النمله والمشاه اللى بيعدو على الدائرى والفضايح اللى فالشارع المصرى
يمكن التسجيل دا يساعد الواحد انه يوصل لحلول لمشاكل المرور
اعتقد الكاميرات المتخصصه فالمجال دا هتيقى احسن من الموبيل القديم (انا موبيلى قديم وبيهنج)

**No Comment** · 21-04-2016 09:36 AM

المخاطر
- السرقة
- مشاكل الكهرباء من ماس لتفضية بطارية العربية
- لكن اهم حاجة فيها مخاطرة هى تعرض الموبايل للأنفجار لان بطاريته لها درجات حرارة لا يجب تجاوزها وان الهاردوير الداخلى ايضاً من بروسيسور وخلافه لن يعمل فى ظل درجات الحرارة التى سيتعرض لها باستمرار