الموضوع: ايه رايكم فى المشروع الجديد جدا ده !!!

السلام عليكم

كنت بشوف ناس كتير فى المنتدى بتتكلم عن احسن المشاريع اللى ممكن تعملها و بصراحة لقيت كل الافكار عبارة ان افكار مستهلكة و مكررة

و عشان كده حابب انى اطرح الفكرة الجديدة دى يمكن حد ينفذها و يستفيد ..

بقالى فترة شاغل دماغى مشروع ( شايف انه حلو و جديد ) بس معنديش وقت انفذه أو ابتدى فيه لان شغلى واخد كل وقتى ... و كلمت كذا واحد صاحبى عشان يشجعنى و يخش معايا فيه ... لكن كلهم كانو بيضحكوا عليا - يمكن عشان ماعندهمش روح المغامرة اللى عندى !!!

المهم .........

لو حد حابب يعمل المشروع ده أو ينفذ فكرته حلااااااااااااال عليه و ربنا يباركله .....

الفكرة ببساطة هى تصنيع ملاعق ( ايوه معلقة ) يمكن اكلها بعد استخدامها فى الاكل .... حد فاهم حاجة

بص يا سيدى هو الموضوع عبارة عن فيديو شفته لراجل عبقرى هندى ( الفيديو مش لاقيه للأسف )
بيصنع معالق غذائية يعنى على اللى شفته عبارة عن مخبوزات ... بعد ما تاكل بيها ( طبق كشرى مثلا ) تقوم واكل المعلقة و مقرقشها ... بالهنا و الشفا

هى طبعا اغلى من البلاستيك شوية بس مع التصنيع على مستوى كبير حتبقى ارخص من البلاستيك كمان

و طبعا انا معرفش المكونات بس ممكن من خلال التجارب بمساعدة واحد شغال فى المخبوزات توصل للمكونات دى

و طبعا بتبقى بتتصنع أو تتخبز فى اسطمة معدن شبه المعلقة و تدخل الفرن و بعدين كل خمس أو عشرة معالق تتحط فى كيس و يتقفل و كده

طبعا ناس كتير منكم بتضحك عليا دلوقتى زى اصحابى اللى ضحكو قبل كده و احب اقولهم انكم ناس نمطيين تفكيركم ما بيخرج برة الصندوق و العصر ده عشان تشتغل و تكسب لازم تفكر فى الجديد على طول

و لو اتسوقت الفكرة دى لعشرة محلات كشرى بس ....... كل المحلات التانية ح تغير و تدور على اللى بيبيع المنتج ده .... و تخيل كده لما الزبون يبقى قاعد مستكنيص و يخلص الاكل و بعدين يقعد يقرقش فى المعلقة ... ياااااااااااه ع الجمال ...... و يروح يحكى لاصحابه انه اكل المعلقة بعد ما خلص طبقه .... شعب يموت فى الهشتكة بجد

تحياتى

برازيلى

و الله فكرة لذيذة