أحذر التعامل مع أرامكس

**Dr Ahmed** · 26-04-2016 03:14 PM

شركة أرامكس شركة عالمية مشهود لها بالكفاءة ، لكن حظها السئ أنها لديها فرعا فى مصر يضع سمعتها العالمية فى التراب.
تعددت الشكاوى من شركة أرامكس من عملاء كثيرين ، وكنت أظن فى الأمر مبالغة حتى ذقت ما ذاقوه من إهمال وسوء معاملة ، فقد أرسلت عن طريقهم آلة جراحية لإصلاحها فى توكيلها بالقاهرة ففوجئت أنها وصلت توكيلها مكسورة كسر لا يمكن إصلاحه ، وتواصلت مع أرامكس واعترفوا أنهم السبب فى الكسر ثم تهربوا من أى تعويض كما ينص عليه اتفاق البنود المطبوع خلف الإيصال بل بمرور الوقت أصبحوا يتهربون من مجرد الرد....
راسلت الشركة الأم فحولت الموضوع للشركة اللقيطة فأنكروا رقم الشحن أصلا وأنه لا يمكن الاستدلال عليه وتاه الأمر على ذلك..
رقم الشحنة للتأكيد هو 41195855971
الآلة التى كسروها باهظة الثمن ونادرة ولا أستطيع تعويضها ، والشركة تأخذ بمبدأ العوض حرام حتى ولو كانت بنود الاتفاق تعويض حتى عشرة آلاف دولار كما هو مكتوب فى ظهر الإيصال.

طبعا قدمت شكوى ضدهم فى جمعية حماية المستهلك وبصدد رفع قضية تعويض ضدهم ..
....
الخلاصة .. لا تنخدع بالأسماء العالمية .. فأى شركة عالمية فى مصر هى شركة مصرية تسير عليها قواعد كل الشركات المصرية من فهلوة وتهرب من المسئولية وسوء الخدمة والكذب.

لا تتعامل مع أرامكس.

**ahmad--ezzat** · 26-04-2016 03:34 PM

وهو اللي البلد فيه ده من شويه
احنا شعب يستاهل كل اللي بيجراله

**ehabouf** · 27-04-2016 12:01 AM

المشكلة في الشركة ككل
من حوالي 8 سنين كنت طالب حاجات تتشحنلي على البوكس بتاعي تبعهم في نيويورك وكنت مستعجل عليها
وانا بتابع الشحن داخل امريكا اكتشفت انهم مالاقوش حد في ارامكس يستلم منهم الشحنة والمكان مغلق وحايحاولوا التسليم مرة اخرى بعد ساعتين
اتصلت بواحد من كبار المديرين في ارامكس (صديق شخصي لي) عمل اتصالاته وقالي كله تمام وهما حاليا هناك وحايستلموا الحاجة لما توصل
بعد الحاح مني عرفت السبب
ال 2 الموظفين الي هناك (لبنانيين) قفلوا الشركة وراحوا يشربوا شيشة في كافيتريا عربي وراهم بشارعين وماتوقعوش ان في شحنات توصل في الفترة دي

العرب ليهم بصمتهم المميزة في اي مكان يروحوه

**punisher** · 27-04-2016 01:56 AM

في مصر متتعاملش غير مع DHL انضف واسرع بس اغلي

بعد كده ممكن تجرب TNT

Aramex. زفت

**mk3** · 27-04-2016 05:35 AM

اللى مش كله يعرفه ان الشركه رقم واحد فى مصر هى ميدل ايست...كميه فروع ومناديب تسليم لا حصر لها...توصيل تانى يوم صباحا...يوجد فروع 24 ساعه...الاقصر واسوان طيران...من الاخر انسى

**عبدالحكيم** · 27-04-2016 07:10 AM

أخي الكريم لا يضيع حق وراءه مطالب.. تابع ولا تتوقف حتى تأخذ حقوقك كاملة

أنا شخصياً تعاملت مع أرامكس مرة واحدة وكانت تجربة طيبة وتعامل جيد جداً
أرسلت أوراق مهمة مستعجلة من فرعها خارج مصر إلى فرعها بالقاهرة وكان التوقيت الخميس عصراً.الشحنة وصلت السبت ظهراً وفور وصولها اتصل مندوب الشركة بأخي وتم استلام الشحنة في خلال دقائق من مقر الفرع وبدون أية مشاكل

ولدى زميل آخر اشترى موبايل بلاكبيري بريف الجديد من خلال فرعهم في أمريكا عبر خدمة شوب آند شيب ووصلت الشحنة أيضاً في الموعد وبدون مشاكل

**SoFiMaN** · 27-04-2016 11:23 AM

بتعامل مع ارامكس من اكتر من 8 سنين داخل مصر بين المدن و خارج مصر عن طريق شوب اند شيب و الحمدلله ولا مرة حصلت مشكلة غير يمكن حاجات بسيطة جدا !

**egyption2012** · 27-04-2016 03:46 PM

شوب اند شيب
أسوأ خدمة ممكن تشوفها في حياتك وحتحس انها شركة بير سلم بجد
وعشان اكون صادق كانت لي تجربة عادية معهم والشحنة وصلت في موعدها
لكن لي تجربة اخرى سيئة للغاية
لن تستطيع التواصل معهم بشكل جاد إطلاقا مع انهم موجودين على الشات والتليفون
لكن ابسط كلمة يقولوها حنقدملك طلب والفريق المختص حيتواصل معاك
ومفيش حد بيتواصل ولو بعتولك ايميل بيكون بالانجليزي ومليان الغاز وكلمات مطاطة وصياغة informal
ولو رديت عليهم فلا تنتظر منهم أي رد على رسالتك

كان فيه شحنة انتظرت حوالي 3 اشهر حتى وصلت
بعد عشرات الرسائل وعشرات المكالمات وعشرات المحادثات على الشات
سعر المنتجات - فيتامينات - التي قمت بشرائها حوالي 500 جنيه
طالبوني بحوالي 1500 جنيه جمارك - المفروض 75 جنيه فقط - وده لأنهم لم يقوموا بإدراج فاتورة الشراء مع المنتجات
ده غير تكلفة الشحن نفسه اللي بيتحسب على الوزن

شركة زبالة للأسف
المشكلة في مصر انك كمواطن ملكش حقوق والشركات اللي بتقدر تظبط امورها مش حتبصلك كبني ادم عشان يحترموك

اسلوبهم في التليفون سوقي لو طولت معاهم ويعيدوا الكلام بشكل غريب لو متقبلتهوش منهم
التيكيت ممكن ياخد 3 ايام عشان يبدأوا يردوا عليه
ممكن تجيلك رسالة تقولك ان الشحنة في طريقها اليك ولما تنتظر لايام وتحاول تتواصل معاهم يقولك لا الشحنة في الجمارك والرسالة "ممكن" تكون اتبعتت بالغلط

لو الجمارك غيرت اي حاجة او عملت قيود على استيراد حاجة معينة
مش حتلاقي اي حاجة بتقول كده على موقعهم والقايمة اللي عندهم بتاعت المحظورات مش مكتملة
يعني لازم تدرس وتقرأ قانون الجمارك قبل ما تفكر تستخدم خدمتهم

**affix** · 27-04-2016 09:09 PM

شركة أرامكس شركة مراوغة وغير محترمة وسيئة جداً في شحن منتجات موقع سوق (على وجه التحديد) وتدّعي أنها ذهبت للعميل ولم تجده أو أنها اتصلت به لتسليمه الشحنة لكنه لم يرد أو هاتفه مغلق. ومعظم الشكاوي حول التأخر في التسليم أو عدم التسليم من الأساس للشحنة لأسباب وحجج واهية.

**h_shahin** · 27-04-2016 10:03 PM

المشاركة الأصلية كتبت بواسطة affix

شركة أرامكس شركة مراوغة وغير محترمة وسيئة جداً في شحن منتجات موقع سوق (على وجه التحديد) وتدّعي أنها ذهبت للعميل ولم تجده أو أنها اتصلت به لتسليمه الشحنة لكنه لم يرد أو هاتفه مغلق. ومعظم الشكاوي حول التأخر في التسليم أو عدم التسليم من الأساس للشحنة لأسباب وحجج واهية.

سوق حاليا تستخدم شركتها الخاصة للتوصيل و الشحن إسمها Q-Express و للأمانة خدماتهم ممتازة حتى الآن