الموضوع: وأخيرا أصبحت من ملاك جميلة الجميلات شيري إنفي تجربتي

الف مبروك يا فندم عربية جميلة وفعلا قميتها فيها :) ربنا يباركلك فيها .

انتا بتدفع قسط 1111 ج ؟؟ صح !!
معلومة ع الماشي عربيتك مزودة بسخان المرايات بمعنى بعد تشغيل السيارة الشبورة على المرايات هتروح :)
أي استفسار انا تحت امرك .

الانفى دى عربيه شكل جميل وصالون فاخر والتكييف ثلاجه عربيه من الاخرفيها كل اللى بتحلم بيه وانا بحلم بلتيجو لانى بحب العربيات العاليه الضخمه وكمان قويه ربنا يبارك ويقرب البعيد وكل عام وانتم بخير

المشاركة الأصلية كتبت بواسطة nadp370

السلام عليكم ورحمة الله وبركاته




أحب أنقل ليكم على السريع تجربتي مع جميلة الجميلات شيري إنفي
إستلمتها النهرده من معرض المصريه للسيارات فرع طنطا
العربيه سعرها 97 ألف وممكن يزيد خلال أيام .. وده كلام المعرض لأنه كان عامل خصم ألف جنيه من يومين على العربيه ولما جيت استلم النهرده قالولي العرض اتشال ودي مقدمه إن السعر هايزيد في ظل العبط إللي بيحصل في سوق المال والدولار اللي محدش عارف يلمه ولا عارف يلاقيله كبير .. العربيه نازله فئه وحده بس مانيوال .

العربيه جبتها بنظام التقسيط على خمس سنوات تبع بنك القاهره بفايده 7.5%
أنا دفعت 50% من تمن العربيه + مصاريف إداريه حوالي 750 جنيه + تأمين شامل على العربيه بدون تحمل حوالي 3000 جنيه .. وده أرخص سعر في التأمين والمصاريف الإداريه في جميع المعارض المتوفره في طنطا من ضمنهم الطارق وخيال وغيرهم من المعارض الصغيره .

شيري إنفي 2017
العربيه ياجماعه صفقه رابحه بكل ماتحمله الجمله من معاني .. الأول لازم تعرفو اني كان معايا دايو لانوس فكل كلامي عن الإنفي هايبقى ملمس عالدايو ومش هاظلم الدايو ولا هاظلم الإنفي إن شاء الله .

في البدايه هاتكلم شويه عالشكل الخارجي .. شيري إنفي تتمتع بمقدمه هجوميه غاضبه شويه .. يعني تحسها مكشره شويه شبه مقدمة سكودا فانتازيا شويه .. أما المؤخره فأنا شايف إنها صغرت شويه وأصبحت أشيك .. وطلعت من دائرة الإنتقادات التي لاحقة مؤخرة الإسبيرانزا 516 إنها كبيره .. وعلى فكره شيري إنفي كان اسمها سبيرانزا e5 أو سبيرانزا إنفي لما كانت مع ابو الفتوح .:b4_564:

حاليا هي مع غبور وانا شايف إن ده مكسب تاني لوحده لأن غبور زود سنوات الضمان عالعربيه لـ خمس سنوات وده ضمان كويس جدا يدل على ثقة الوكيل في عربيته .

نرجع تاني لشكل العربيه الخارجي .. العربيه محاطه بفبره سميكه متينه مغطيه العتبتين وأسفل الإكصدامين ودي حركه >كيه قوي قوي تناسب شوارعنا الجميله والرصيف العالي .. إللي لو بصيت على العربيات في مصر تلاقي أكتر حته مخبوطه هي العتبه .. الفبره لونها إسود بتدي شكل جمالي للعربيه وكأنه برواز بيحدد لوحه جميله خصوصا في اللون الفضي أو الفواتح عموما

شيري إنفي عاليه عن الأرض بشكل ملحوظ للي سايق واللي راكب .. أنا سايقها من المعرض للبيت حاسس إني عالي عن الأرض وكمان لما بانزل من العربيه بحس بالعلو عن الأرض ودي ميزه برضو في ظل مطباتنا الجميله في مصر

شيري إنفي بتنزل بجنوط 15 شكلها شيك مع العربيه مش وحشه .. انا جبتها لون فضي وده اللي نصحني بيه كل الناس لأكتر من سبب .. مميزات اللون الفضي أو الفواتح عموما إنها مش بيبان عليها التراب غير بعد فتره كبيره .. لو لاقدر الله حصل خربوش كبير مش بيبان زي الألوان الغامقه .. كمان أهم ميزه إن الألوان الفاتحه بتمتص الحراره بشكل أقل بكتير من الألوان الغامقه .. يعني مش هاتقلق لو سبت العربيه في الشمس إن لونها يبهت أو تركب العربيه تلاقيها سخنه من جوا .

يلا بينا ندخل جوا العربيه
مبدأيا الشنطه واسعه بشكل مرضي مش وحشه .. يعني لا هي كبيره قوي وواخده من الصالون جوا العربيه زي عربيات كتير شوفتها .. ولا هي صغيره قوي .. نقدر نقول متوسطه

الكبوت معالج بطبقه من اللباد من الداخل علشان يعزل الحراره وصوت الموتور .. وماشاء الله وزنه كبير واحتاجت لأيدي الإتنين علشان أشيله وافتحه .. الشبكه الأماميه مثبته بمسامير حديد مش بلاستيك زي عربيات تانيه كتير شوفتها برضو ودي ميزه مش موجود في عربيات تانيه ليها إسم كبير .. في عدد إتنين صداده واحده تحت الفانوس اليمين والتانيه تحت الفانوس الشمال تقدر تشوفهم لو فتحت الكبوت وبصيت تحت الفوانيس .. ودي بيدي أمان في حالت التصادم الأمامي لا قدر الله .

لو دخلنا في صالون العربيه زي مقولت ماشاء الله بتحس إنك عالي عن الأرض ومعدل العزل عالي ماشاء .. الفتيس أو ناقل الحركه ناعم مع الجير العادي اللي من وجهت نظري أحسن من الأوتوماتك .. بحس إن الأوتو لعب عيال ومفيش متعه في السواقه .. في راحه وأنتخه وومكن يقلب معاك بنوم وانت سايق فتلبس في شجره لا قدر الله

التاره بتنزل عاديه بدون مالتي وبدون إيرباجات .. وحدات رفع ودي حاجه اتفاجأت بيها موجوده في العربيه لأنها تفرق معايا قوي لأني كنت مركبها في عربيتي القديمه .. وبصراحه راحة بال كبيره .. الريموت بسيط قوي بدون فزلكه كبيره هما زرارين زرار يفتح الشنطه وزرار يقوم بوظيفتين فتح وقفل العربيه بكل بساطه .. جهاز إنزار مع صوت في الفتح والقفل .. صوته جميل

مرايات كهربا والتحكم في مستوى ضوء المصابيح الأماميه نزول وصعود .. ودي جامده قوي واتفاجأت بيها برضو هههههههه .. مصابيح شبوره مميزه في الأمام .. في حاجه أنا شايف انها عيب ودي الحاجه الوحيده اللي مش لاقيلها تفسير في العربيه .. العربيه نازله بسماعتين في الأمام فقط .. السماعات الخلفيه مكانها محفور وموجود بس مش راكبه .. والموضوع ده في كل العربيات ومش عارف ليييييييييه

موضوع العفشه الناشفه لما سألت فيه قالولي إن الكاوتش اللي راكب فيها نوع ناشف اسمه gt وده سبب ان العفشه ناشفه .. واعرف ناس غيرو النوع والمقاس وحاسين بفرق كويس في العفشه .. إن شاء الله منتظر لما أرخص العربيه وأغير الأربع فرد .

ديتجربتي مع إنفي الجميله وربنا يسترها معانا كلنا في طريقنا

مبدائيا الف مبرووووووووك علي العربيه انا لسه شاريها اول الشهر اللي فات وفعلا هي عربيه كويسه وربنا يباركلك فيها ويكفيك شرها
بس انا كان عندي سؤال هو حضرتك خدت الكتالوج بتاع العربيه معاها عشان مخدوش بتوع غبور قالولي الكتالوج لسه مش متوفر فا لو حضرتك خدته ممكن ترفعهولي

لو سمحت عايز نعرف اكتر من كده عاملة ايه فى السرعات وايه أخبار الثبات وايه أخبار أسعار قطع غيارها وصيانتها والتوكيل بتاعها كويس ولا لا وسعرها كام كاش في المعارض؟

الف الف مبروك
ان شاء الله انا بجهز في تمنها
لو في حد يقدر يقولي سعرها كام دلوقت ابقي في منتهي الشكر له

سعرها انهردا ب 101 الف من الوكيل

المشاركة الأصلية كتبت بواسطة arkoon

سعرها انهردا ب 101 الف من الوكيل

فعلا سعرها فى معرض غبور فى الشيخ زايد 101 الف ومبروك مقدما