لسة شاري ابيزا 94 و عندي شوية اسئلة
السلام عليكم
انا لسة شاري عربية ابيزا 94 و عندي شوية اسئلة يا ريت حضراتكم تفيدوني
العربية شاريها من 3 ايام و غيرت لها الزيت و فلتر الزيت و فلتر الهواء و مش لاقي مكان فلتر البنزين يا ريت اعرف مكانه هو معمول لها فلتر على دخول البنزين للموتور كان مقطوع الخرطوم و متركب فلتر شفاف رخيص دة صح ولا ايه
كمان يا ريت حد يفهمني مؤشر الحرارة الطبيعي بتاعه عند كام و يا ريا بالصور عشان مش فاهم التدريج بتاعها خالص لانه مش مترقم .. دي اول عربية ليا و بتعلم عليها ايه الحاجات اللي اخلي بالي منها يا ريا تنصحوني
صاحب العربية اللي قبلي كان مركب لها زرار يشغل مروحة تبريد الموتور لما الحرارة تعلى انا عايز المروحة تشتغل اتوماتيك لما الحرارة تعلى اعمل ايه وومين يعملها كهريائي ؟؟
و عايز اغير لها السيور .. ايه السيور اللي اغيرها عشان مش عارف ؟؟
العربية ١٣٠٠ سي سي كاربراتير موتورها خفيف للاسف .. يا ريت تنصحوني اتعامل معاه ازاي و انا مبتدئ كدة
يا ريت يا جماعة متبخلوش عليا بالمعلومة بالله عليكم
انا عايز انضف الريداتير و اغير الماية اللي فيها ايه احسن نوع ماية تنصحوني بيه و احنا داخلين على الصيف كدة ؟؟
انا من اسكندرية يا ريت تدلوني على ميكانيكي بيفهم في الابيزا اتعامل معاه ..
جزاكم الله خير