الموضوع: مؤتمر عاجل بالغرفة التجارية

بص يا سيد تويوتا .. الموضوع ده ليه ابعاد كتيرة قوي قوي منها على سبيل المثال لا الحصر:

شعبة السيارات في الغرفة التجارية قالت أن نسبة مبيعات السيارات في مصر انخفضت 40% وده تصريح رسمي .. يعني ممكن تكون النسبة أعلى بكتير .

ثانياً أن سعر السيارات في الخارج انخفض بنسبة كبيرة جداً .. فمفيش مبرر أن السيارات في مصر تفضل على حالها إلا إذا كان فيه استوك كبير من السيارات مش متباع على السعر القديم .. وبالتالي شعبة السيارات اللي هي بتمثل التجار مش عاوزة تخسر في السيارات المخزنة دي قبل حدوث الأزمة.

وبعدين الدولار كان منخفض .. وكمان الين .. وكمان اليورو وكمان الاسترليني .. وكل دول انخفضوا بشكل كبير جدً في الفترة اللي فاتت .. مع ذلك التجار والمستوردين ودن من طين وودن من عجين (فيما عدا بعض الشركات زي فيات .. على حسب ما قريت في المنتدى) ولا أكن أي فيه أي حاجة حصلت (الانخفاض في اسعار العملات كان بصورة كبيرة نبسبة قد تتجاوز 30%) .

يجي دلوقتي يقولك الدولار ارتفع هو والين .. علشان كده السيارات سعرها مش حينزل . دلوقتي الصوت طلع .. ما كان فين الصوت ده لما العملات دي كانت منخفضة .. وبعدين العملات دي لو ارتفعت .. اعتقد انها ارتفعت بس مش بالنسبة اللي اتخفضت بيها برضه .

وأخيراً السوق المصري في السيارات (أو أي شيء أخر) سمك لبن تمر هندي .. مش خاضع لأي مقاييس أو معايير من المعايير الاقتصادية اللي العالم بيمشي بيها .. وحديك مثال على ذلك .. أسعار البترول لما غليت .. البنزين غلى في العالم كله .. ولما البترول سعره انخفض .. تبع ذلك انخفاض في أسعار الوقود .. وفي الأخر برضه مصر حالة فريده متفرده في العالم .

وفي النهاية الكلام ده يا أما يكون تطمين للناس علشان يشتروا المخزون الراكد اللي عندهم بالسعر القديم .. أو هو صحيح فعلاً وعندهم من القوة الاقتصادية أنهم يصمدوا ستة أشهر أو اكتر علشان يثبتوا للناس أن الأسعار مش حتنخفض .. فالناس حتصدق وتشتري .. وأنا رأي الشخصي أن الشركات الأم سواء في أوروبا أو اليابان حتضغط على الوكلاء دول علشان الأسعار تنخفض .. بس المسألة سياسة النفس الطويل