الموضوع: بعد سنتين 2 years later ملاحظاتي البسيطة كروز2014

المشاركة الأصلية كتبت بواسطة ashouhdy

بسم الله الرحمن الرحيم

ما اشبة اليوم بالبارحة ... مع بعض التغييرات البسيطة :)


معقولة عدي سنتين و 30الف كيلو... يالا الحمد لله .. لو حنتكلم بايجاز كدة عن اللى حصل في السنتين ..

بعيد عن العربية ... اسوأ حاجة ان جروبات الفيسبوك خلاص خلت المنتديات تقفل للاسف ... اللى استفدنا منها وعرفنا بعض منها خلاص ... محدش بقي يخوشها وكل واحد دخل جروب عربيتة عالفيسبوك وقفل علية ...

يعني معتقدش ان الموضوع دة حيتقرا ذى الموضوع الاولانى اللى عمل تقريبا نسبة مشاهدات خيالية ! يعني ممكن 1 على 1000 مثلا ...

http://www.nilemotors.net/nile/422098-2014.html



.....................


عشان مطولش على نفسي هههههه لان حاسس اني في صحرا الحقيقة وبكتب مذكراتى انا كدة وانا بكلم نفسي

حقول اية الوحش اللي قابلتة او ضايقني من العربية في سنتين عدوا

اول حاجة :

1- ودي ميحسش بيها غير اللى كان راكب سفينة ذيي الكيا كارينز القديمة ... وهي الكنبة ورا ... هو اينعم محدش اشتكي خالص عندي في البيت منها ... بس دة لانى ببقي محافظ اوى على وضعية الكراسي عشان اللى ورا ميحسش بذنقة ... لكن احيانا بفتقد وسع الكارينز ورا .... لكن ارجع وابص قدام على قعدتي اقول انا اهم ههههههه انا اللي سايق ...


محدش حيفهم الكلام دة غير اللى حيقرا الموضوع الاولانى ...

موضوع الوسع ورا للي نازل من عربيات ضخمة حيضايق اللى راكب صالون ذى الكروز وامثالها ..ز

ومازلت على رأيي ان الوسع بينها وبين اخواتها مثلا عدا النيسان سنترا واحد .. يعني علي قعدتي فلان من علان مفيش فرق الا في السنترا ودي شايفها اكبر واحدة في متوسط الاسعار ..


2- الحاجات الوحشة تانى صوت المكنة في الطلعة لحد ماتاخد سرعتها ... بيبقي حالى حاجة بسيطة وبعد كدة بيختفي والحمد لله ...

3- العربية سرعتها مقفولة على 190 .. يعني لو حاولت تجري مع حد ووصلت لل190 وانت سابقة .. هو حيعدي لان الكروز مقفولة للاسف عالسرعة دى وعالنقلة ال5 ...

4- طلعة العربية لحد ال 60 تقيلة وبعد كدة بتفتح .. يعني من زيرو ل 100 تقريبا في 12ثانية او 11 وكسور


نيجي بقي للحلو :

1- العربية مازالت الوحيدة اللى فيها وسائل امان ! تخيلوا .. من 18 مايو 2014 لحد النهاردة مفيش عربية قربت منها في وسائل الامان والسلامة !

2- قعدة العربية وسواقتها .. بعد سنتين لسة والحمد لله بستمتع بيها ولسة بتلكك انى انزل اسوقها :)
سواقة العربية نفسها وعفشتها ودنيتها والمطبات والملفات فعلا فرق كبير عن كل اللى ذييها ... من ترزيع الفلوينس لتنطيط السيراتو لعومان الالنترا ! الخ الخ

3- مازالت العربية وانت سايق بتخطف العين بالذات لو متلمعة وفيها فوانيس وزينون بقي وشوية حركات هبلة.


دة اللى اقدر اقولة عن العربية .... طب اية المشاكل اللى قابلتها مثلا في سنتين ...

1- تغيير حساس كامة في الضمان
2- تغيير بطارية ضمان


دى المشاكل اللى قابلتها ... طب ندردش بقي :)

هو اية اللى حصل في مجتمع العربيات في السنتين دول ...

كنا ومازلنا في هسسس الفتيس ! ولحد النهاردة في البيع والشرا اول حاجة تسمعها من الاعضاء في الجروب بتاع الفيسبوك

موديل كام ؟! فتيس اية ؟ قديم ؟ طب جديد ؟ طب اية ها ؟ ايية قولى اية ...

وانا اراهنك ان اللي بيسأل لو حطيت قدامة الاتنين ما حيعرف دة من دة بس هو لازم كدة ...

التجار بقي وجهل الناس للاسف ... اجمل اشاعة دلوقتى ان العربية بقت صيني ههههه اة والله بقم يقولوا انها صيني !

وانا حبقي احط تحت صور لمكونات العربية اللى شفناها بعييننا الالمانى واليابانى والامركي الخ الخ الخ

الجروب بقا عالفيسبوك على قد ما قتل المنتدي .. بس على قد ما عمل فايدة كبيرة جدا للناس.

اهم حاجة التواصل مع التوكيل .. وانا مش حقول كلام كتيير .. والناس عارفة والحمد لله ان لا لينا صالح مع توكيل عشان نكذب او نتجمل ولا لينا عاطل اننا نشتم ونوقع فية لصالح ناس تانية.


بس الجروب من اول مقابلة لقينا خير اللهم يجعلة خير ان التوكيل عايز يبعت ناس معانا تشوف الدنيا اية ... وفعلا عملنا اول ايفينت وحضرة ناس كتير من المنصور و جنرال موتورز الى اخرة....

انا لو حتكلم عن حاجة فحتكلم عن ( الكروز ) انا معرفش ولا عايز اعرف هو بيعمل اية في اللانوس مثلا ولا الافيو عشان مدخلش المنتدي الاقي حد كاتب الله يلعنة منصور توكيل ابن تييييييييييييت ويبوظ الموضوع.

انا بتكلم عن معاملة التوكيل لينا كأعضاء وللعربية انها بجد فوق الممتازة

لدرجة انة متابع الجروب والشكاوى وبيحلها فورا واللى مش مصدق الحركات الجميلة دى يقدر يدخل الجروب ويسأل بنفسة ويشوف....

طبعا دة حصل بعد اول مقابلة بعدين حصل صداام كبير بينا وبينة وبعدين الصدام دة اتحل وقعدنا واتكلمنا واتفقنا الطرفين على شروط

والحمد لله ماشيين عليها والطرفين ملتزمين بيها والناس مبسوطة.

وكان اهم الشروط عندنا سرعة الاستجابة والاصلاح وعندهم الالتزام بالصيانة في مواعيدها والضمان.


نرجع بقي للدردشة ...

في السنتين دول بلا مبالغة عرفت كمية ناس ماشاء الله قمة في الاخلاق والمساعدة والطيبة والنضافة

ناس ولاد ناس بجد ... من اللى ينزل يجبلك حاجة من غير مقابل وميحاسبكش عليها ... للي ييجي لحد بيتك يجبلك حاجة ليك ويمشي ! حاجات كدة والله خيال ويمكن دة من اكتر اسباب تمسكي بالعربية

الناس الحلوة اللى اتشرفت بيهم ... والعربية الكويسة الحقيقة لحد النهاردة ربنا يبارك فيها ... لحد المعاملة الطيبة من التوكيل واستجابتة السريعة لأى شكوى اون لاين عالجروب !

....

اجي ارجع تانى لسوق السيارات بقي طب اية اللى حصل ...

الفرق من سنتين بين الكروز والسيراتو والالنترا مثلا كان 5 تلاف جنية

الفرق دلوقتى بقي 20الف جنية


انا بتكلم على فئة السيراتو اللى فيها نفس كماليات الكروز ... مثلا الكروز دلوقتى ب 185 رسمي

طب السيراتو اللي فيها 2 ايرباج وabs ذيها بكام .. حتلاقيها ب 210 مثلا

مع العلم بقي الزيادات المعروفة في الكروز للي عايز يركب ويسوق مش يبيع ويبدل

esp tc حساسات نور ركن فوانيس ليد وعدسات .. بصوا كفاية مش حعيد كلام بنتكلم فية يوميا عالجروب .. مش موضوع اعلانى هو ههههههههه

لكن لما اجي انزل انا اقف في صالة عربيات او معرض كبير والف عالعربيات

فعلا فعلا لحد النهاردة نفس اللى كتبتة من سنتين حكتبة تانى ...

هو في اية يتجاب مقارنة بالفئة السعرية دلوقتى 2016 اللى بنتكلم في 180الف !!


مازالت الكروز محافظة على اساسيات العربية من امان وثبات لا وزادت كمان عدسات وليد وحركات وحساسات

قصاد منافسيها اللى مازالوا بيبيعوا عربيات فاضية ب 200الف والناس بتقبل عليها ذى ما تكون حاجة ببلاش كدة !


يعني حد يسيب استرا كوزمو ويجيب كيا/هونداي اغلي منها !! ما عليييييييينا مش مجالنا دلوقتى ...


في كمان بقي الرعب المستمر من لعربية اصلها بتجيب فتيس .. الموضوع دة بقي ممل .. هي بقت كلمة واحدة ممل جدا جدا

شوفوا مشكلة ال2010 وبقت محفوظة ومحلولة وفي بدل الواحد 10 بيصلحوها خلاص

مش حكتب تفاصيل لانها مش مجالنا ... لكن ببساطة على جروب فية 9000 عضوا اشتكي 15 فرد على مدار سنتين من الفتيس موديل 2010 ويمكن 2 موديل تانى وبس.


غير كدة مشوفناش الرعب الرهيب والالافات اللى راكنين وفاتحين الكابوت ورافعينها على ونش ... ياعم قول في سنيتن 20 فرد اشتكوا من الفتيس من عربية بقالها 6 سنين بتلف في شوارع مصر واغلب صيانتها وزيوتها غلط ! ولو حتى متابعة في التوكيل لحد النهاردة 2010 التوكيل بيغيرو ب 6500ج !

الموديلات الجديدة والحمد لله انسي خالص الحدوتة دى .. وكفاية ملل ...

.... انا حاسس انى طولت كتير ... بس احساس انك بتكلم نفسك برضوا علاج نفسي مريح ههههههه

دي كانت ملاحظاتي بعد سنتين عدوا ... وربنا يدمها نعمة وخير والحمد لله

والسلام عليكم ورحمة الله وبركاتة
































http://www.nilemotors.net/nile/465952-a.html

http://www.nilemotors.net/nile/477797-2016.html

الناس كلها بقت معلوماتهم زيرو للسبب ده !!!

اسوأ حاجة ان جروبات الفيسبوك خلت المنتديات تقفل للاسف ... اللى استفدنا منها وعرفنا بعض منها خلاص ... محدش بقي يخوشها وكل واحد دخل جروب عربيتة عالفيسبوك وقفل علية ..الناس كلها بقت معلوماتهم زيرو للسبب ده !.