الاتنين 2008
نفس الكيلومتر
مطلوب رأي الخبراء ضروري
عرض للطباعة
الاتنين 2008
نفس الكيلومتر
مطلوب رأي الخبراء ضروري
١١ سؤال تجاوب عليهم واللى تلاقى اسمه اكتر فى الاجابات تشتريه :
١- مدى الانتشار يعنى انهى عربية فيهم اللى ماشية فى الشوارع اكتر من التانية ؟
٢- مدى توافر مراكز الصيانة سواء التوكيل او غيره؟
٣- مدى توافر قطع الغيار ؟
٤- اسعار قطع الغيار والصيانة ؟
٥- استهلاك البنزين؟
٦- الراحة والفخامة الداخلية والاوبشنات؟
٧- اعادة البيع ( بمعنى حتتباع بسرعة وبسعر معقول ولا حاتقعد تبيع فيها مدة كبيرة وكل شوية تنزل السعر علشان تخلص) ؟
٨- الاعتمادية ( اعطال كتير ولاقليلة )
٩- الشكل الخارجى من وجهة النظر المصرية ( انهى واحدة شكلها بيخوف العربيات التانية والميكروباصات )
١٠- الاداء فى الاوفرود ( الطرق الغير ممهدة والصحرا والغرز ) وماتجاوبش بانك مش بتخش صحرا ومش فارق معاك - لان ده اوبشن انت دافع تمنه وليه صيانات بتتعمل استعملته او ماستعملتهوش ؟
١١-حجم الشنطة ؟
بالاجابة عن هذه الاسئلة تكون الجيب متفوقة
فى العربيتين انت حاتضحى بحاجات فى مقابل حاجات تانية واتت الادرى باحتياجك للعربية - بس اهم حاجه تكشف كويس جدا على العربيتين فى التوكيل مهما كان تمن الكشف علشان مترميش فلوسك فى الارض لان العربيتين ماشاء الله من احلى العربيات اللى بيتلعب فى عداداتهم - وتاخد ريبورت مفصل من التوكيل اللى حاتكشف فيه بكل حاجه موتور وعفشة وبودى والات جر وفتيس متكشفش جزئى يعنى تكشف كامل وكمان فى التوكيل حايقولولك ايه اللى محتاجاه العربية - بس قبل كشف التوكيل اكشف مبدئى علشان ماتروحش التوكيل والعربية اصلا متبهدلة مثلا من جوه والفرش ملدوع بسجاير او البلاستيكات والفيبرات مكسره وكمان لما تفتح الكبوت تلاقى كل حاجه فى مطرحها ومافيش حاجه مفكوكة او سلوك ناطه لبره زى اسلاك نور الافراح ومايكونش مثلا الكردان الامامى فى الجيب مخلوع والجسم مافيهوش بارومة او خبطات والزراير بتاعة العربية من جوه شغاله وبعد ماتدور العربية مايكونش فيها اى لمبه منورة فى التابلوه غير لمبة الحزام فقط - يعنى حاتكشف على مرتين مرة سواقة وكشف نظرى مع حد بيفهم فيها او ميكانيكى متخصص فيها ولو لاقت القبول تطلع على التوكيل دوغرى .
باكرر تانى اللى انا ذكرته فوق ينطبق على العربيتين على السواء - ومعلوماتى عن اسعار الكشف فى التوكيل بالنسبة للجيب اعتقد فى حدود ١٢٠٠ او ١٣٠٠ جنيه وبالنسبة للاكس ٣ معنديش فكرة بس ممكن تكلم التوكيل يقولك السعر بتاع الكشف كام - وبالتوفيق ان شاء الله .
بسم الله ما شاء الله
يعني kk افضل من x3
كنت فاكر ان البي ام ليس لها منافس غير المرسيدسglk
معلومات قيمه
طيب وعنصر الاوبشنات فعلا ال kk اعلى من x3
معلش كتبت السؤال قبل رد حضرتكاقتباس:
المشاركة الأصلية كتبت بواسطة م/أحمد عبد الفتاح
يعني العربيتين نفس المستوى تقريبا
بس الصراحه kk ليها واجهه هجوميه مش موجوده في اي suv ثانيه.
الفخامة والراحة والاوبشنات واستهلاك البنزين للاكس ثرى طبعا - بس اسعار الصيانة وقطع الغيار والوسع الداخلى والاوفرود للجيب - الاتنين فى بعض الحاجات بتتفوق واحده على التانيةاقتباس:
المشاركة الأصلية كتبت بواسطة رامي مصطفى
لو العربيتين عاملين 200 الف كيلو
ايهما اكثر تأثرا بالكيلومتر ؟
مين هتفتح بقها الاول بكثرة الصيانة و كده
ابعد عن الاتنين مش علشان ان الكيلومتر كتير عليها - العربيات دى تعيش معاك قد كده مرتين تلاتة كمان واكتر لو صياناتها بتعمل مظبوط - لكن علشان حتلاقيها متباعه ١٠ او ٢٠ مرة وانت عارف مفهومنا فى الصيانات فاكيد حتلاقى مالك او اتنين على الاقل مكانوش بيعملوا فيها حاجه اكتر من تفويلها بالبنزين فقط لاغير ( والله فيه ناس باقابلهم عمرهم ماقاسوا الزيت او غيروه ولاحتى فتحوا الرادياتير يشوفوا الميه ناقصة ويكملوها ) - لو اى عربية فيهم اول او تانى مالك ممكن تكون كويسة
مع كامل احترامى و تقديرى لرأى المهندس احمد عبد الفتاح . عاوزين من حضرتك شوية معلومات عن الكى كى و اكثر الحاجات الى بتبوظ فيها و الحاجات الى لفتت نظرك فيها
و متحرمناش من مشاركاتك الى بنستفيد منها
مؤيد بشدهاقتباس:
المشاركة الأصلية كتبت بواسطة ahmed_eng2001
والله انت واحشنى ياهندسة بس الفترة اللى فاتت العيال والمدرسين واللخفنة بتاعه المواعيد بتاعة الدروس والمدرسين مصدقوا العيال اخدوا الاجازة اللى قبل الامتحانات وكل واحد عاوز يزود الحصص وانا كنت باوصلهم للدروس وشغلانة مايعلم بيها الا ربنا :)اقتباس:
المشاركة الأصلية كتبت بواسطة ahmed_eng2001
المهم ياباشا بالنسبة للكى كى من واقع تجاربى معاها :
الحاجات اللى لفتت نظرى فيها :
١- الوسع الداخلى معقول للى جسمه كبير وكويس جدا للى جسمه عادى .
٢- فيها شوية اوبشنات حلوة زى الكراسى الكهربا ( سائق ٦ اتجاهات للقاعدة بس الضهر مانيوال) وزى النور الاوتوماتيك والمساحات الاوتوماتيك والبلوتوث للتليفون ( بس برمجته غلسه) ومراية الصالون تعتيم ذاتى وحساسات كاوتش وانذار صوتى لو نسيت فرامل اليد وسينسور ركن وفيها حاجات تانية بس دول اهم حاجات.
٣- وسع الشنطة فى الوضع العادى وبدون ماتطبق الكنبة ٩,. متر مكعب كحجم وعلشان تتخيل الوسع العربيات السيدان يوم مايضربها السلك بتعمل ٤,. متر مكعب - ولما تطبق الكنبة بتوصل لمتر ونص مكعب - وكمان الكراسى ضهرها بينام تماما على الارض بتبقى افقى كأنه صندوق عربية نص نقل - والكنبة مقسومة جزئين جزء كرسى واحد وجزء كرسيين وده بيخلى حتى لو انت محمل حاجات كتير فيه فرضة لواحد يقعد ورا أو اتنين على حسب .
٤- المناورة بتاعتها ممتازة بمعنى قطر الدوران بتاعها تقريبا اقل من ١٠ متر ونص - المرسيدس جى الى كى حوال ١١ وشوية متر - الاكس ٣ حوال برضه ١١ وشوية متر (قرب ١٢ متر) والتويوتا نفس الوضع . ودى بتساعدك فى الشوارع الضيقة لو عاوز تلف .
٥- الموتور من النوع اللى الار بى ام واطى يعنى وانا مثلا ماشى عل ١٠٠ كم/ساعة بيبقى الاربى ام حوالى ٢٠٠٠ لفة عالدقيقة وده بيخلى العزم بتاعها عالى زى العربيات الجاز تلاقى الهورس باور واطى بس عزمها عالى - والار بى ام الواطى كمان بيدى عمر طويل للموتور.
٦- العفشة قوية وفى نفس الوقت معقولة من ناحية الراحة للركاب .
٧- الساوند سيستم اللى فيها كويس جدا يعنى لو انت سميع مزيكا حاتنبسط قوى .
٨- التكييف كويس بالنسبة لحجمها الكبير لانها مافيهاش تكييف للخلف كله من التابلوه .
٩- قطع غيارها متوفرة فى السوق و اسعارها حلوة وارخص من عربيات كتير سيدان وعربيات فى نفس فئتها .
١٠ - الصاج بتاعها محمل وده بيبان من وزن الكبوت والابواب لما تتعامل معاهم - كمان احنا فى اسكندرية ايام المطر السنة دى الدنيا مطرت تلج كبير ومجعلص فى يوم مشهور طبعا لما اسكندرية غرقت وتقريبا كل العربيات فى اسكندرية اللى كانت فى الشارع فى اليوم ده ياغيرت برابريز امامى او خلفى يا إما الكبوت بتاعها بقى كله نقر ومش نافع ( واحد صاحبى معاه جراند جديدة الكبوت باظ واشتراه ب ١٨ الف جنيه !!!!! )
١١- العزل ممتاز لو قفلت القزاز مش حاتسمع اى حاجه بره .
ده اللى انا فاكره :)
بالنسبة للحاجات اللى بتبوظ فيها او العيوب بصفة عامة:
١- الكلوك اسبرينج لازم يضرب منك بس لما بتغيره بيعيش (تقريبا غيروا التصميم بتاعه وبقى بيستحمل احسن من اللى كان راكب فيها) يعنى تقريبا بتغيره مرة فى العمر وفى الغالب بعد حوالى ٥ سنين من يوم ماستلمتها.
٢- البوية بتاعتها الفابريكة مش كويسة وبتجير وتبهت بعد ٤ سنين بالكتير.
٣- الفتيس ليه فتحة مقاس بس مافيش مقاس !!!! ودى حاجه غريبة كانت موجودة فى الليبرتى ومن اول ٢٠٠٧ بطلوا يحطوا المقاس مش عارف ليه !!!!!
٤- الفيش اللى تحت الكرسيين الاماميين كانوا عاوزين يتثبتوا احسن من كده لان فيه حساسات فى الكراسى الامامية للايرباج والفيش بتقد تلعب لما ترجع الكرسى لورا او قدام وتنور لمبة الايرباج وده انا حليته انى زودت قفزان بلاستيك للاسلاك اللى تحت الكراسى وثبتها كويس .
٥- لو حصل عندك اى عطل او لمبة انذار نورت لازم تبقى عارف ومحدد ايه المشكلة قبل ماتروح تصلحها سواء فى التوكيل او الورش والا حاتتعرض لمصاريف كتيرة بسبب الجهل والاستغلال بتاعهم.
٦- لما تيجى تشتريها لازم تروح التوكيل تكشف عليها ومافيش مكان غير التوكيل هو اللى حايقولك على تاريخ حياتها وايه العيوب الموجودة فيها (ودى الميزة الوحيدة الموجودة فى التوكيل).
فيه بقى شوية حاجات بتبوظ فيها والسبب يا صاحبها يالتوكيل او الورشة اللى بتصلحها وحاديلك أمثلة:
١- فتيس بيدى انذار حرارة زايدة لصديق من محافظة تانية غير اسكندرية ومش عارف اروحله او يجيلى عربية كى كى ٢٠١١ :
صاحبها : حط زيت فتيس موبيل والمفروض زيت فتيسها نوع اسمه موبار ATF+4 وده مش فزلكة يعنى الشركة بتاعتها منزلاه علشان الزيت ده عازل للكهربا ومافيش زيت تانى عازل للكهربا زيه والفتيس من جوه كله كهربا سولونويدات وحساسات بفيش واسلاك جوه الفتيس فلو حطيت زيت تانى بيحصل قافلة وانت وبختك - بس برضه الفتيس مابظش . الراجل غير الزيت للاصلى وبرضه لسه انذار حرارة فتيس عالية .
التوكيل : كشفوا وقالوا للراجل الفتيس ده بالكتير قدامه مشوارين ويقف خالص ولازم نغير جواه حاجات زى التورك كونفرتر والسلونويدات كلها والفالف بودى . الراجل قالهم كام قالوله ٣٥ الف جنيه - العربية بتنقل زى الفل وبتسحب زى الفل - قلتله فتيسك سليم - قاللى انه خلاصاتفق مع ميكانيكى كويس وحايغيرله الفتيس كله بواحد استعمال ب ١١ الف - الراجل فرح جدا قولتله فتيسك سليم
الميكانيكى : وبعد الميكانيكى ماجرب العربية قاله الفتيس سليم بس مشكلة السخونة دى حانغير السربنتينة - وغير السربنتينة بتاعة تبريد الفتيس - وبرضه سخن - أنا عمال اقوله من الاول فيه سينسور حرارة فى الفتيس وممكن جدا يكون باظ وعمل قافلة من الزيت الموبيل اللى حطه والميكانيكى بيقوله لا مافيش سينسور حرارة - المهم بعتله رسمه السينسور ومكانه فين جوه الفتيس - الراجل الميكانيكى اقتنع اخيرا وفك السينسور وبعته لواحد كهربائى يقيسه لقاه بيقرا مقاومة وساعات بيدى صفر - اتغير السينسور والعربية بقت زى الفل .
٢- النهاردة : ليبرتى ٢٠٠٥ :
صاحبها : مابيفتحش الكبوت عمره فى حياته وهو اول مالك يعنى بيبعتها التوكيل تغير زيت ولا بوجيهات وخلاص لمده ١١ سنة .
التوكيل : الموتور عاوز عمرة وتسيبها شهر - طبعا مشى من هناك ومسألش حتى حاتتكلف كام
الميكانيكى ١ : عمرة
ميكانيكى ٢ : جوانات سلندر هيد
العربية فيها بلف اسمه PCV وعليه شوية خراطيم بمواسير بلاستيك بابص عليها لقيتها كلها زيت وفيه ماسورة بلاستيك مشروخه وخطوط ال pcv كلها فاكيوم فطبعا بتشتغل بالمنظر ده كانها بتسحب زيت من الكارتير وترشه على الموتور !!!!! قلتله طيب نغير الماسورة ونشوف - وغيرنا الماسورة البلاستيك بـ ١٠٠ جنيه وكان بيروح من ميامى للمنشية بينقص اكتر من ربع كيلو زيت تقريبا - لفينا بيها عالدولى بتاع ١٥٠ كيلو ولا جرام ناقص .
زى ماقلتلك الجهل والاستغلال بتاع الميكانيكى او التوكيل .
وعندى حكايات تانية كتير
ناس كتير بتغير مواتير وفتايس بدون اى سبب فعلى بس بسبب الجهل والاستغلال .
ومعلش طولت عليكم