لمبة ال d بتطفي لوحدها

جبت عربية ماتريكس 2005 اوتوماتيك من حوالي اكتر من شهر و اول لما جبتها غيرتلها زيت فتيس و بعد كده لما جيت اسوقها في مشوار طويل لقيت في زي نتشة أو مدفع كده بيحصل ساعات لما السرعة تكون اقل من 20 و اقف (بتحصل في الزحمة 3 او 4 مرات بشكل واضح في مشوار ساعة و نص). طبعا رحت لميكانيكية كتير و قالولي عادي و كنت شاكك في زيت الفتيس لانة مش sp3 و سألت التوكيل قالولي لا عادي.
بعد كده كنت سايق على 100 لقيت العربية عملت كيك داون لوحدها و الموضوع ده اتكرر 4 مرات في نفس المشوار. كشفت عليها كمبيوتر و طلع فيها حساس tps. رحت بدلته و في نفس اليوم العربية مكانتش راضية تنقل غير على 5000 لفة في ال ار بي ام. رحت كشفت تاني طلع الجهاز مسجل عطل tps برضه و الراجل عمل reset للخطأ ده و جينا نجرب لقيناه بينقل عادي و مفيش خطأ الجهاز قراه. بس فضلت مشكلة النتشة موجودة زي ما هي و قلت خلاص اتعود عليها. جه قبل يومين كده بعد مشوار ساعتين في الزحمة لقيت لمبة ال D في التابلوه طفت لوحدها مع ان العربية ماشية و الفتيس شغال عادي. لما وقفت اجرب كل الاوضاع اللمبات تنور ما عدا ال D. بعد كده طفيت العربية و شغلتها برضه نفس المشكلة. سيبت العربية نص ساعة و جيت اجرب لقيت اللمبة نورت عادي خالص. رحت بيها تاني يوم الشغل عادي برضه بس و انا راجع برضه بعد ساعة و نص زحمة عملت نفس الحوار و اللمبة طفت تاني. قعد اجرب لما ركنت و جبت كل الاوضاع برضه ال D مش راضية تنور رحت ماشي حاجة بسيطة راحت منورة لوحدها. رحت بيها مشوار بسيط برضه فضلت منورة عادي.
دلوقتي الموضوع كده عادي و لا ممكن يكون الكونترول مسجل خطأ في الفتيس و بينبهني بانه يفصل اللمبة؟ و ليه دايما بتحصل لما يكون مشوار طويل و زحمة؟
و النتشة اللي عندي دي ملهاش حل؟