ما هو الفرق بين زيت الباور وزيت الجير الأتوماتيك ؟

السلام عليكم ورحمة الله وبركاته

ممكن نعرف هل يوجد فرق بين زيت الباور وزيت الفتيس الأتوماتيك ( على سبيل المثال موبيل 320 )

لأن أغلب الصنايعيه بيقولوا إن ده هو ده و إن عادى جداً لما تحط زيت الفتيس الأتوماتيك للباور


مع وافر التحية والتقدير

قبل ما نعرف الفرق بين زيت الباور وزيت الجير الأوتوماتك... لازم نعرف إن زيت الجير الأوتوماتك أصلا مش كله زي بعضه...

أول زيت تم استخدامه في ناقل الحركة الأوتوماتيكي (الجير الأوتوماتك) كان زيت الحوت.. وكانت جنرال موتورز (أول من استخدم جير أوتوماتك في سياراتها) بتشتريه من الأسواق..

وبعد فترة من زيادة الإنتاج وقلة وجود زيت الحوت (لمنع اصطياده).. بدإت جنرال موتورز تصنع زيت بترولي له خصائص تشبه زيت الحوت...وكان أي حد على مستوى العالم عايز زيت جير أوتوماتك بياخد زيت جنرال موتورز... حتى فورد المنافس المباشر لجنرال موتورز.

في الستينات.. بدإت جنرال موتورز تحط مواصفات للزيت.. خصوصا مع بداية تصنيعه في شركان الزيوت بالتعاون معاها... وسمت مواصفة الزيت ده "ديكسرون"

المهم.. ماطولش عليك... بدإت كل شركة بعد كده تطور على ديكسرون ده بطريقتها حسب متطلبات التصاميم الخاصة بيها... وأغلب الشركات الكبرى عندها أنواع زيوت مختلفة ... يمكن اختلافات أغلبها بسيطة عن ديكسرون... بس مؤثرة جدا في الأداء.

الصورة دي فيها أغلب أنواع زيوت الفتيس وأكثرها انتشارا.. وبتبين نبذة تاريخية في نفس الوقت

http://i1227.photobucket.com/albums/...f040512_01.png

طيب... إيه بقى زيت الباور؟؟؟

المفروض يكون زيت هيدروليك غير قابل للانضغاط

أغلب الصانعين بيستخدموا زيت الفتيس الأوتوماتك كزيت باور لإن فيه خصائص كتير من زيوت الهيدروليك... ده غير خصائص التزييت العالية.


الفكرة.. إن مش دايما بيكون الزيت المستخدم في الجير زي المستخدم في الباور... وجايز جدا يكونوا مختلفين... وجايز بردو يكونوا زي بعض.... على حسب الشركة صانعة السيارة...


أغلب الوقت... زيت الباور بيكون بمواصفة ديكسرون 2 (مكافئ له في السوق موبيل ATF220) أو ديكسرون 3 (مكافئ له في السوق موبيل 320).

إنما زيت الجير بيبقى ديكسرون (2 أو 3) في أغلب السيارات القديمة... وحاليا في سيارات جنرال موتورز بيبقى ديكسرون 2 أو 3 أو 6... وفي فورد اسمه ميركون... وفي ميتسوبيشي وهيونداي وكيا اسمه SP... وتويوتا وهوندا كمان بدأ يبقى ليها مواصفة خاصة مؤخرا (ارجع للمعلومات في الرسم).

أتمنى أكون ما اتكلمتش كتير :oh:


...

تسلم ايدك ع المعلومات دي

ماشاء الله علي معلوماتك

عرض علمى موثق غايه في الروعه .

كعادتك
دائماً مبدع :tumb:

كلام فوق الممتازمن مهندس احمد و لكن حابب ازيد عليه شيء هو نسيه انك الافضل ترجع لكتالوج عربيتك في نوع زيت الباور و الفتيس لأن فيه سيارات كتير متطلباتها في الاثنين واحد و ديكسرون 3 زي نيسان صني n16 و فيه عربيات المواصفة مختلفة و زيت الباور غير زيت الفتيس كمواصفات

فاتتني دي فعلا :)

مع إني كل مرة بقولها

شكرا لآمسويل مصر وخصوصا المهندس إيهاب منصور :)


...

...