مشكلة غريبة بسيارة باسات b5.5

**عمرعبدالله** · 01-06-2016 11:18 AM

السلام عليكم ورحمة الله .. انا عضو جديد معاكم لكن كمتابعة فانا قديم شوية لاني كنت بتابع المنتدى كزائر واستفدت منه كتير جدا .
انا عربي مقيم في الامارات وعندي سيارة باسات 2003 2800 سي سي وللاسف معظم الميكانيكية الهنا من شرق اسيا فمابيفهموش فيها .. فانا كنت في العادة بحلل المشكلة من متابعة المنتديات المحترمة زي منتداكم دا وباخد قطع الغيار اللازمة واخليهم يركبوا بس والحال كان ماشي .
بس دلوقتي ومع ارتفاع الحرارة الشديد بالخليج بتحصل لي مشكلة غريبة وهي كالتالي :
السيارة في الصباح والمساء ماشاء الله تبارك الله طيارة وعزمها وسحبها ممتاز .. بس على الساعة واحدة ظهر يعني مع نهاية الدوام الاول بتتقلب حاجة تانية بتكون تقيلة وعزمها طااايح وبتمشي تاتا تاتا لدرجة انها بتحرجني في الشارع فبضطر اشغل اربع اشارات وانا ماشي ومرات بعد حوالي عشرة دقايق ربع ساعة بتبدي تدخن بتطلع دخان ابيض خفيف من الكبوت والدخان دا بيجي داخل على السيارة من خلال فتحات الطبلون سواء شغلت الكيف ولا لا .طبعا بركن واوقف مدة خمسة دقايق بعد ذلك السيارة بتتحرك عادي لكن مابنفس عزمها الصباحي او المسائي والمشكلة دي ليها خمسة ايام او اسبوع وانا اتعودت عليها بقيت الف شوية برا برا وانتظر الدخنة واوقف واعمل اعادة تشغيل للسيارة وبعد كدا بركب الشارع الرئيسي .. رحت لاكتر ميكانيكي اللي يقولي علبة البيئة واللي يقولي بواجي/بلكات لكن ما اقتنعت بكلامهم لاني منضف علبة البئة قريب ومغير البلكات وغير كدا لو فيهم مشاكل كانت حتظهر طول اليوم مش بالنهار بس صح ؟ مع العلم اني مهتم بالعربية جدا لاني بحبها قوى ومن قريب عملتلها صيانة شاملة وغيرت فلاتر بنزين وهواء وطلمبة بنزين وكويل وبواجي واسلاكها ونضفت البخاخات ولو في اي مشكلة بصلحها على طول والسيارة كانت ماشية تمام وللان السيارة بالصباح والمساء ماعليها كلام مشكلتها دي مع نهاية الدوام الاول الساعة واحدة وبداية الدوام التاني الساعة اربعة ونص يعني مع الحرارة العالية .. طبعا الرديتر جديد ودورة التبريد سليمة والحرارة مش بتعدي النص والقير والمكينة بحالة جيدة والمكيف تمام وبيبرد كويس بس لما اشغله صوت المكينة بيعلى جامد مش عارف دا عادي ولا لا ؟ وطبعا منتظم في تغيير الزيت بزيت صناعي كامل وبحط لها بنزين سوير اوكتان 98 ومافيش مشاكل غير المشكلة دي والكمبيوتر مش بيدي اى خطأ .. فتفتكروا ايه السبب في المشكلة دي .. انا اسف اذا كنت طولت عليكم بس حبيت اديكم نبذة كاملة عن الموضوع اه نسيت السيارة عاملة 190 الف كم .. وشكرا وفي انتظار اراؤكم واقتراحاتكم القيمة .

**م/أحمد عبد الفتاح** · 01-06-2016 12:23 PM

هل الدخان الابيض الخفيفاللى بيطلع من الكبوت رائحته كالعادم ام بدون رائحة ؟
نقطة اخرى - تنظيف علبة البيئة عملية غير مجدية بنسبة ٩٠٪‏

**م/أحمد عبد الفتاح** · 01-06-2016 08:08 PM

علشان نقطع الشك باليقين من جهة علبة البيئة catalytic converter - حاتروح لورشه عندهم سكانر للاعطال بيبقى فيه وظيفة تقدر تعرف بيها اذا كانت علبة البيئة سليمة ولا لأ - بس طبعا الورش محدش يعرف حاجه عن السكانر غير انه يقرا رقم كود العطل وخلاص بالسلامة - حاتقولهم الاتى :
حايقرا حاجتين فى العربية هما :-
O2 S 11 V
O2 S 12 V
لو علبة البيئة سليمه القيمة بتاعة الحاجه الاولانيه حتلاقيها بتلعب ومش ثابتة ( بتبقى رقم عشرى اقل من الواحد الصحيح من حوالى 0.150 الى 0.800 وبتلعب كتير ومش ثابته ) - وحتلاقى القيمة التانية برضه رقم عشرى بس مش بتلعب كتير وبتتغير كل ١٠ ثوانى مثلا او اكتر - كده يبقى علبة البيئة سليمة .
لو علبة البيئة بايظة حتلاقى القيمة الاولانية بتلعب برضه كتير والقيمة الثانية بتلعب هى كمان كتير ومش ثابتة - يبقى كده علبة البئة بايظة
دى طريقة الكشف على علبة البيئة بالسكانر بتاع الاعطال - يستحسن تكون موجود جنب الراجل وهو بياخد القرايات دى وماتقلهوش اى حاجه شوف القيم وخلاص وخد قرارك
وبالتوفيق ان شاء الله
بالمناسبة هل الزيت عندك مقاسه تمام ومش بينقص ولا حاجه ؟؟؟لان لو بينقص بيسبب تلف علبة البيئة بسرعة

**tasaka** · 01-06-2016 09:53 PM

فى جميع الاحوال اكشف على علبه البيئه بالطريقه التى وضحها م/أحمد عبد الفتاح

**عمرعبدالله** · 01-06-2016 10:51 PM

تسلم الايادي يامحترمين .. انا حاجرب اغير الزيت بكرة الصبح , انشاء الله حارجع لزيت موبيل 1 xhp وحاجرب القيادة بالنهار وحاديكم تقرير عن الوضع , بالنسبة لمستوى الزيت فهو لم ينقص امكن لاني لسة مغيره من اسبوع .. واشكر الباشمهندس على طريقة كشف عطل علبة التلوث وانشاء الله الجميع يستفيد من المعلومة الهايلة دي ولو تغيير الزيت ماغير شي حاجرب الطريقة المشروحة .

**tasaka** · 02-06-2016 12:07 AM

الافضل ضع سؤالك فى موضوع الزيت .. و المهندس بوريو بيرد على طول .. يعنى ممكن خلال ساعتين او ثلاثه حيرد عليك

- بس انت بتقول انك منتظم فى تغيير زيت صناعى كامل ( تقصد الاماراتى ؟ ) .. و بعدين دلوقتى بتقول حترجع لموبيل xhp ( اعتقد ده زيت ديزل )

كام هى لزوجه زيت موبيل اللى كنت بتستعمله سابقا .. و كام لزوجه الزيت الاماراتى الحالى

- اتأكد من رقم المواصفه المطلوبه فى الكتالوج للزيت الاماراتى
http://adnocdistribution.ae/en/indus...ve-lubricants/

- الاماراتى الذهبى ( تصنيعى كامل ) voyager gold
5w/30, 5w/40
..vw …...….. 502 00, 505 00 ,505 01

- الاماراتى الفضى ( نصف تصنيعى ) voyager silver
10w/40
vw …...........…............. 501. 01, 505 00

- الاماراتى البرونزى ( خليط معدنى .. Blend ) voyager bronze
20w/50
vw ……………………………….505 00

الافضل ضع سؤالك فى رابط موضوع الزيت .. و المهندس بوريو بيرد على طول .. يعنى ممكن خلال ساعتين او ثلاثه حيرد عليك

**م أحمد** · 02-06-2016 12:22 PM

يا ريت حضرتك تنزل برقم الأوكتان الخاص بالبنزين الذى تستخدمه
يعنى لو انت بتستعمل 98 جرب تستعمل 95
لو لقيت ان هناك تحسن فى عزم السيارة استخدم اقل اوكتان موجود عندك
البنزين كلما قل رقم الأوكتان الخاص به كلما قل معدل احتراقه بسهولة و هذا يعطى عزم أكبر للمحرك ((على حساب التسارع ))...لان عملية الحرق تدوم وقت أطول....خاصة لو عندك ضعف فى ضخ طلمبة البنزين
هذا الموضوع يظهر تأثره عند سخونة المحرك...و ربما تجد بعض الصعوبة فى إدارة المحرك و أساس هذا الأمر ضعف الإشعال الكهربى أوعدم ضبط توقيت الإشعال

أيضا راجع الوصلات الكهربية الخاصة بطلمبة البنزين و التأكيد من جودة الوصلات لان ارتفاع درجة حرارة الجو يزيد ضعف الجهد الكهربى الواصل للطمبة البنزين و بالتالى يحدث ضعف لعملية الضخ
يمكنك اكتشاف موضوع ضعف طلمبة البنزين كالتالى :
1-فك خرطوم البنزين الداخل إلى الرشاشات (الحقن الاكترونى)
2-ضع زجاجة فارغة 2 لتر مثلا فى نهاية الخرطوم
3-افتح كونتاكت السيارة بدون إدارة للمحرك و ذلك عند وقت الصباح
4-كرر الخطوة 3 عند سخونة المحرك بزجاجة فارغة أخرى
5- قارن بين الكميتين فى الزجاجتين
لو لاحظت فرق ملحوظ بين كميات الضغط فهذ لا شك ضعف فى طلمبة البنزين او وجود نصف قطع فى وصلات الكهربا او فيوز غير محكم التركيب

يمكنك أيضا استخدام منظف رشاشات Injector cleaner للتحسين عملية احتراق الوقود و علاج ضعف عزم السيارة

الشىء الأخير و الهام جدا هو سخونة بوبينة الكهرباء و ضعف الجهد المتولد منها و اللازم لعملية احتراق وقود قوية و فى هذه الحالة يمكنك استبدال البوبينة Bobin

و أبدأ بالحلول الأسهل فالأسهل

موضوع الدخنة البيضا يا ريت لحظة ما يحدث ، تقف بالسيارة و تفتح الكبوت و تعرف مصدره و ايضا لاحظ خروج العادم من الشكمان فى نفس اللحظة و هل به نفس اللون ؟

لو ايضا من الشكمان فهذه أعراض تهالك الماكينة باكامل او نوعية زيت ردىء ...و إن شاء الله خيرا

**عمرعبدالله** · 02-06-2016 03:35 PM

نهاركم سعيد ياشباب .. انا غيرت الزيت والفلتر وحقيقة اللي حصل فاق كل تصوراتي وتوقعاتي والله ياشباب السيارة حالها اتغير 180 درجة ورجعت لسابق عهدها دا انا شغلتها اليوم بالنهار بعد غيرت الزيت وشغلت المكيف كمان والحمدلله الامور رجعت طبيعية كماكانت .. الزيت اللي انا استخدمته هو موبيل 1 ( 0w-40 ) الصراحة زيت رائع جدا واصحاب الموديلات الحديثة من بي ام ومرسيدس واودي بيستخدموا النوع دا وطبعا هو موفي واكتر لمتطلبات الشركة بس اللي كان خلاني اغير انه غالي جدا فغيرت للزيت الاماراتي الذهبي 5w-30 بناء على نصائح بعض الزملاء اللي قالوا لي دي عربية قديمة ليه تحط لها زيت زي دا بمعنى انه المحرك قديم و5w-30 مناسب معاه.
م/ احمد بعد دا نقدر نقول ان مضخة البنزين ووصلات الكهرباء طلعوا براءة ههههه
بالنسبة للبنزين انا جربت 95 قبل كدا وانا اللي بيحصل معاي هو العكس تماما لما احط 98 السحب بيكون افضل بكتير من 95 .. هو في الكتالوج مكتوب انه 95 هو الحد الادنى المطلوب ليعمل الموتور بكفاءة , عشان كدا بحط 98 .
وفي النهاية بشكر كل الاخوان الافاضل اللي ردوا علي وساعدوني .http://www.mediafire.com/convkey/688...aurq38p8zg.jpg