المشاركة الأصلية كتبت بواسطة m000dy
البونتو من أشيك موديلات الفيات
بدأت من سنة 1993 بأول شكل ليها اللى كسر روتين سيارات فيات باشكاله المتشابهه والخاليه من اى ذوق او جمال اللى كانت فى الفتره دى امثال التيبو والتمبرا والاونو ... فضلت من سنة 1993 لحد 1999 بنفس الشكل ومن 1993 لحد 1995 خدت جوايز كتير اهمها أفضل سياره صغيره هاتش باك فى أوروبا ( كان معايا عربيه جايه من بره عليها بادج النومينيشن ) .
سنة 2000 ولحد 2003 اتغير شكلها وخدت مقدمة هجوميه بفوانيس لينس ذات تحكم داخلى ونزل فيها أوبشن جديد اسمه السيتى باور مش موجود فى اى عربيه تانيه لحد النهارده وده مهمته تسهيل عملية الركن واتغير لون اضاءة التابلوه من الاخضر المنتشر الى البرتقالى النارى أكثر وضوح وشياكه دون تشتيت السائق
سنة 2004 ولحد يومنا هذا اتغيرت مقدمة العربيه وفضلت ثابته وجدير بالذكر ان قطع الغيار الداخليه هى هى من سنة 2000 لحد النهارده وده معناه قطع غيار كتير وسعر كويس وفعلا اسعار الاستيراد ممتازه فى حاجات كتير زى الطنابير والحساسات والمساعدين
نرجع لموضوعنا اللى هو ان موديل من 2000 الى 2003 من افضل الموديلات شكلا ( طبعا مع ثبات التصميم الخلفى المميز للبونتو ) مع ميزة ان كل موديلات الشكل ده تقفيل ايطالى وخامات ممتازه
العربه 1300 سى سى واستهلاكها للبنزين رائع
طبعا موتوها غنى عن التعريف وهو الموتور الرسمى للفيات منذ قديم الازل وهو اللانشيا ... هو يصنف تبع النيرفز انجينز .. يعنى المواتير العصبيه اللى صوتها ظاهر الى حد ما ومحسوس اثناء القياده لكن مش مزعج او اوفر
العربيه دخولها وخروجها سهل وواسعه وعاليه عن الارض
مش اى حد يلعب فيها لان ضفيرة الكهربا بتاعتها معقده الى حد ما وروحها الكهربا ممكن سلك واحد يخليها تبرجل كلها
قطع غيارها جديده كلها عند الكيلانى وده موزع معتمد
قطع غيارها استيراد ماليه الدنيا فى الوكاله والحرفيين وعزبة شلبى طبعا
سعر العربيه العادل من 36 الف الى 40 الف لو حاله واستخدام نضيف ( وانا انصح ما تجيبيهاش الا كده عشان ماتهنكيش وتستمتعى بيها ) ممكن تزودى الف او اتنين بالكتير اوى
ربنا يوفقك وتلاقى حاجه كويسه على اد امكانياتك