الموضوع: تجربتي مع سقف الالنترا md

كل سنه وانتوا طيبين ورمضان كريم

حبيت احكيلكوا عن تجربه اول يوم رمضان في مصر وفي اسكندريه خصيصا وسقف عربيتي
مع اول ايام الشهر الكريم ركنت عربيتي تحت البيت لمده لا تزيد عن 5ق
نزلت فوجئت بكسر زجاج فتحه السقف وبالطبع كل واحد يقولك ده من فوق ده واحد وقع حاجه المهم طبعا مش حتعرف توصل لمين عملها مع السلوكيات الجميله لشعبنا
المهم بدات رحله العذاب لتغيير فتحه السقف
اولا:- التوكيل المحترم 5250 ج من غير الضريبه
تانيا:-البحث عند بتوع الزجاج حتسمع احلي كلام
في اتحاد اوربي يا باشا ب 700 ج وطبعا صيني ومش بتاعها بتاع hd
وفي امان و ب 750 وبتاعها وهو مش بتاعها اصلا
وفي جريش واصلا جريش معملش فتحه سقف md ده بتاع سيراتو 2009
وبيحاولوا يركبوها عليه والفرق 2 مللي بيزودوا سيلكا عليه
المهم من الاخر مفيش فتحه سقف md اتعملت اصلا لا استيراد ولا جريش ولا امان
كلها اجتهادات فاشله
وحذاري حد يلجا لها في فتحه سقف لل md
تالتا وده الاهم (الاستيراد-مستعمل ) وانصحكوا ده الافضل
بعد رحله البحت في اسكندريه الحبيبه :-
وجود فتحه سقف من رابع المستحيلات كانك بدور في كوم قش
وبعد عناء اتنين في اسكندريه حتلاقي عندهم حاجه الالنترا كلها
- الفادي في السيوف و معروف اوي (معاملته كويسه وسعره غالي بس حتلاقي عنده حاجات كتير وانصحكوا بيه السعر 2000 ج بعد طلوع الروح
-محمد زكي في الفراهده او الرشيدي ( الرشيدي معندوش كل حاجه ومحمد زكي
غالي ومعاملته سيئه ومؤرف) منصحكوش بيه
ثم رحله البحت عن تركيب الزجاج
كل واحد بتاع زجاج شايف انه مش حيكسب اوي مادام مخدتش من عنده فيقولك كلام عجب العجاب واحد يقولك روح لسروجي وواحد يقولك انا بركب الزجاج من عندي بس
وكلام اهبل ملوش لازمه
المهم استقريت علي ناس كويسه وفاهمه شغلها وهم alexglass في سموحه في اسكندريه
بصراحه ناس كويسه ومحترمه خصيصا واحد اسمه هشام ركبوا السقف ب 100ج غالي شويه مش مشكله خصيصا لما تكتشف ان الموضوع كله شويه مسامير وتفك السقف القديم وتحط الجديد

ملخص الكلام
لو جالك مشكله فتحه سقف في الالنترا - لو اتكسر هات استيراد من الفادي ولو غالي بس حترتاح وركبه عند alexglass , ولو في مشكله في السقف alexglass ممكن يضبطها

اما لو عادي يعني زجاج امامي او خلفي او جانبي جريش شغال واللي عايز نمر التيلفون موجوده سواء في اسكندريه او في اي مكان كلمهم بيقولك السعر ورخيص وبيركبهولك عندهم كويس ولوفي اي مشكله فيه بعد كده بيعملهالك بدون مقابل
وربنا يبعدكوا عن مشاكل العربيات في الايام المفترجه دي وكل سنه وانتوا طيبين



ملحزظه هامه :- كل زجاج في الاستيراد ومكتوب عليه نوع العربيه مهما كان نوع الزجاج خلي بالك hd مكتوب hd و md مكتوب md والسيراتو نفس الكلام ومفيش مفيش حاجه بتركب علي حاجه حتسمع من ده كتير ومتركبش اي زجاج سقف غير الاصلي ريح بالك اما اي نوع تاني ركب جريش مفيش مشكله

الف مبروك
ومعلش على اللي حصل لازم شوية تعب