الموضوع: افضل عربية suv

السلام عليكم
ده اول موضوع ليه في المنتدى الرائع ده اللي استفدت منه كتير جدا وارجو تكملو جميلكو وتفيدوني في الحيرة دي
انا مقيمة حاليا في الامارات وعاوزة اشتري سيارة suv تكون مواصفاتها الاتي :
1- امان عالي لان معايا اطفال يعني متينة وثابتة مش ورق .
2- اعرف بعد كده انزلها مصر من غير جمارك عاليه .
3- تنفع في طرق مصر الجميله :)
4- مناسبه لمصر كمان من ناحيه البنزين ويكون استهلاكها اقتصادي .
5- وااسعه من جوه وخاصة الشنطة لان زي ماقلتلكو معايا اطفال يعني عربيات اطفال وخلافه .
6- قطع غيارها مش غاليه .
7- موضوع سعر اعادة البيع انا مش بغير كل مدة صغيره انا بغير لو احتجت مواصفات تانيه يعني مثلا اللي معايا دلوقتي مازدا 2 فطبعا صغرت علينا فعاوزة اجيب اوسع فانا مش هشتري واقسط علشان اغير حاليا وبرده يهمني اني لو فكرت ابيعها لاي سبب ماخسرش اوي برده .
8- طبعا الاعتمادية ومواصفات العربية من عفشة وسحب وخلافه .
9- بالنسبه للسعر مايكونش اوفر اوي انا معرفش الاسعار في مصر ازاي بس على سبيل المثال هيونداي توسان هنا بحوالي 80 الف درهم فانا عاوزة في الرينج دي مايزيدش عن كده .
اللي بفكر فيهم حاليا توسان و سوبارو OUTBACK لان ال XV صغيره
ايه رايكو فيهم وايه اقتراحاتكو التانيه لو عندكو فيدوني بعد اذنكو ..

سوري للاطالة .....

المشاركة الأصلية كتبت بواسطة Imhotep

ثقافة ال SUV فى العالم كله شئ و فى مصر شئ تانى لعوامل كتير
اولا الاسعار.... ال SUVs تعتبر جديدة على مصر كسيارات عائلية من حيث اقبال الناس عليها.... يادوبك اخر 6 او 7 سنين و بالتحديد مع دخول الاسبورتاج و القاشقاى..... و بالتالى السيارات دى غالية بطبيعتها عن السيدان..... و بالتبعية جمارك عالية عند نزولها مصر خاصة لو cc عالى

ثانيا الموائمة.... مصر فعلا محتاجة SUV و 4*4 كمان..... لكن كله بتمنه و جماركه زى ما قلنا..... نقطة تانية فى موضوع الموائمة هى ان العربية تكون عملية فى شوارع مصر.... شوارع مصر صغيرة و تملى زحمة..... يعنى صعوبة و خنقة فى الحركة و الركن للعربيات الكبيرة..... و ايضا تعرض اكتر للخبطات

ثالثا السوق المصرى اللى بيبيع او يشترى فيه بيحب يبيع او يشترى الرايج ...... و ده بيخلى عربيات ممتازة ملهاش سوق و عربيات تعبانة سوقها كبير..... و ده بيفرق عند البيع الا لو كان الغرض هو الاحتفاظ بالعربية لسنوات عديدة ساعنها الواحد يجيب اللى هو عايزه (بس برضه فى مصر مش اللى عايزه فى المطلق اوى يعنى) .... ده كمان بيفرق فى الصيانة و قطع الغيار و اعادة البيع

خلاصة رأيى..... فى الامارات هاتى اللى نفسك فيه ان شاء الله بورشه كايان
لكن مادام العربية هتنزل مصر بعد كده يبقى افضل الاختيارات كالتالى و بمراعاة كل العوامل السابق ذكرها:

1- اسبورتاج
2- ix 35
3- قاشقاى الشكل الجديدة
4- دايهاتسو جراند تيريوس

دول الحاجات الرايجة فى سوق ال SUV فى مصر..... غير كده هتبقى العربية عبء على صاحبها فى احد العوامل السابق ذكرها..... سواء صيانة او قطع غيار او اعادة بيع او حتى الركن

الف شكر عالرد المفصل ده بس كمل جميلك وقللي ايه الفرق بين التوسان وال ix35
في كل العوامل اللي حضرتك ذكرتها ؟
لان هنا مفيش ix35 هنا بس سانتافي وتوسان من هيونداي هما الي suv

واللي اعرفه ان توسان كمان منتشرة في مصر وقطع غيارها متوفرة وسعر اعادة البيع بتاعها كويس .