موضوع للنقاش (فرنساوي ولا الماني)

السلام عليكم اعضاء الجروب الكرام

الموضوع بكل بساطة ان ابني داخل سنة رابعة ابتدائي ان شاء الله

وبيخيرونا في اللغة الثانية بين الللغة الفرنسية او اللغة الالمانية

بصراحة محتار لعدة اسباب

كدراسة

الفرنساوي اللغة الثانية في العالم بعد الانجليزي

الفرنساوي فيه قواعد كتير اصعب من الانجليزي نفسه

الالماني اسهل من الفرنساوي سواء قواعد لغوية او كتابة

من الاخر الهدف في النظام التعليمي المصري هو الحصول على اكبر كم من الدرجات لدخول الجامعة


اما كحياه عملية

عدد الدول المتحدثة باللغة الفرنسية اكبر من عدد الدول المتحدثة الالمانية

بس في السوق المصري (السياحة مثلا) تقريبا مافيش فرنساوي وممكن نقول ان الالماني متفوق عليها

يا ريت نفكر مع بعض بصوت عالي واسمع اراء حضراتكم

تحياتي لكم جميعا

الالمانى
ان شاء لله لما الولد يخلص مدرسة ممكن يدرس فى المانيا الجامعات هناك تعتبر ببلاش
معرفش الوضع ايه فى فرنسا

والله هاقول لحضرتك حاجه بسيطه
لو ابنك اتعلم فرنساوي من صغره
هايقدر ينطق اي لغه تانيه بطريقه صحيحه مهما كانت اللغه
لكن لو اتعلم اي لغه تانيه هايبقي صعب انه ينطق او بمعني اصح يتعلم ال accent بتاع الفرنساوي اما يكبر
او ممكن يكون نطق اي لغه تانيه بالنسباله صعب
زي مثلا الفرق بين ال P & B اللي معروف عندنا في مصر
- الفرنساوي مجال شغله في مصر اكتر من الالماني .. وفي شركات كتير بتطلب FR
في المقابل مجال العمل في مصر بالالماني قليل ( مطلوب 90% في مجال السياحه وحاليا حضرتك عارف السياحه عامله ازاي ) .. وبالتالي مرتبات عاليه اكتر
انا باتكلم بناء علي المجال اللي انا شغال فيه
حضرتك ممكن مثلا تدخله فرنساوي ...
وفي نفس الوقت لو متاح ممكن ياخد كورسات الماني في اي وقت
او العكس .. يدخل الماني في المدرسه و في اي وقت يبدا ياخد كورسات فرنساوي في المركز الثقافي الفرنسي
هاتبقي كسبت الاتنين

ما مدى توفر مدرسين الالمانى الاكفاء فى منطقة حضرتك؟
انا مثلا فى قرية و كل المدرسين كانوا فرنساوى و كل الطلبة درسوا فرنساوى فاختيار الالمانى بالنسبة لى مستحيل
-----------------
اعتقد اللغة التى تلى الانجليزية هى الاسبانية(لا فرنساوى و لا المانى)

المنتشر هنا فمصر الفرنساوي اكتر
بس لو انا هختار يدخل الماني

لو سافرت بره و عشت بره كتير و روحت البلدين فرنسا والمانيا و بلجيكا و النمسا
هتتمنى لو كنت بتعرف الماني كويس
مش هيفرق معاك الفرنساوي خالص

دي وجهة نظري ..

الفرنساوى رخم جدا كقواعد نحو

الكلمات نصها بيتكتب بس ما يتنطقش ...رخامة تانية

اللغة الألمانية مهمة جدا صناعيا و فكرت اتعلمها علشان كتالوجات الأجهزة و اعتزازهم بلغتهم ....و لو زنقت اوى بيحطو كام كلمة انجليزى...و هندسة حلوان تقريبا عندهم مادة ألمانى

انا درست الفرنساوى من رابعة ابتدائى لتالتة إعدادى و على الرغم من ذلك اخترت اللغة الإيطالية فى الثانوية العامة لسهولتها

دور على السهل فى المرحلة دى و اى حاجة بعد كدة سهل ان شاء الله تعلمها

بعيد عن الفخ اللى عملته بتاع عنوان الموضوع
فى نقلة حقيقية بين ال 308 و ال 406

الفرنساوى سهل يجيب فيه درجات بس كنطق وقراءه بيبقى محتاج يكون فى مدارس معينه علشان يتقنهم. الالمانى معنديش فكره عنه غير ان كل اللى بينكتب بيتقرى زى الانجليزى وبالتوفيق