وتمت صيانة الالف بعد عناء وبعد العناء حادثة..
الحمد لله علي كل شئ انبارح رحت عملت صيانة الالف في ابو رواش ومشي اليوم كالتالي
صحيت 6:30 ونزلت من بيتنا علي 7 كده وصلت التوكيل علي 7:20.. جبت 180 في السكة بتاعت المحور... العربية بتسحب حلو وكله تمام المهم.... وصلت لقيت 5 عربيات بس قلت قشطة ده انا كده هاتظبط وامشي بدري
وسيبت العربية ورحت جيبت فطار وظبطت ورجعت لقيت عربيتين بس ركنوا ورايا
شوية كده علي 8:30 جيه بتاع 20 عربية تاني وكله يوصل لغاية قدام مش فاهم ان المفروض يقف في اخر الطابور ويرجع تاني يقف وهو متنرفز لاخره
فتحوا الساعة 9:10 ووزعوا علينا الورق وابتدينا نخش الساحة واول ما جالي البشمهندس ابراهيم وقالي عندك ايه قلتله صيانة الالف و عندي حدفة يمين وتزييق الشنطة و كمان موضوع البطارية الي نزلت مية دي ووريتهالوا فكتب الاثنين الاوليين ومرضيش يكتب حوار البطارية ده قلتله ليه مكتبتوش قالي متقلقش قلتله ماشي
دخلت ساحة الانتظار... هو قالي هاتخلص علي الساعة 2 فافضلت قعد ل10 كده وقلت اقوم ابص اكتشفت ان النور قطع علي الكوريكات وهما لسا معملوش حاجة فضل قاطع لكام بقي للساعة واحدة وانا قاعد بس الحمد لله ان كان معايا اللاب توب كنت هاموت كده من غيره
ابتدوا شغل في عربيتي الساعة واحدة وايتديت اتفرج عليهم كشفوا علي العربية كلها كهرباء وبعدين شوية ودخلت تغير زيت ودخلت قعدت اتفرجت عليها وهما رافعينها وبعدين جه البشمهندس قالي كفاية عليك كده خش الاستراحة قعدت لغاية 2:30 كده
قمت بصيت تاني لقيتها راحت زوايا.. الراجل الي هناك كان عادي اني اقف اتفرج معاه ظبتها وقالي قياستها مظبوطة بس الطارة كانت حادفة يمين جامد فعدلها وطلع جرب ورجع بيها وخلي واحد يظبط حاجات تاني في العفشة وتمام..
خلص الحوارات دي علي 3:30 وكان فاضل موضوع البطارية طبعا البشمهندس لما شافني قالي عربيتك واقفة علي التجريب وكان عايز يفلفص من موضوع البطارية قلتله لا انت عايز تقلبني ولا ايه شفلي موضوع البطاربة راح باعت معايا واحد من الصيانة واد جدع اوي اتصاحبت عليه وبص قالي هي ممكن تكون مكسورة قلي بص تحب اغيرهالك و تخلص من الوش قلتله بصراحة انا مقلق من الي راكبة دي وياريت تغيرها راح رازع التقرير انها مكسورة قشطة بقي اه كله مصلحة هو ميعرفش هي مكسورة ولا لا وتم صرف واحدة من المخزن جديدة كده كله تمام
علي4:30 طلع واحد معايا جرب وتمام الزوايا تمام ومفيش تزييق شنطة وكله تمام
مشيت من هناك علي 5 بعد دفع 177 جندي
قلت الحمد لله رغم الانتظار الطويل ولكن اخدت الي انا عايزه لكن اليوم يكمل كويس ليه
وانا راجع قلت اخد دائري لن المحور لا يتحرك و وواقف لغاية البوابات وفي طريقي الي الدائري ماشيين تقريبا بسرعة 10 ووقفت في حتة وفجائة الي ورايا دب نزلت كنت هاضربه لكن بعد مابصيت هديت مفيش حاجة في الاكصدام يدوبك خربوشتين خفاف اوي مش بينين لكن في حتة بلاستيكة واقعة مش عارف منين طلعت الي بتغطي القاطرة لو انت بتقطر عربية ولا حاجة ركبها هو واكدت عليه وقلتله يابني ركز حرام عليك مش ناقصة هي
ولما رجعت بتنا شيكت علي الحساسات لقيتها شغالة قلت الحمد لله
ودي كانت تفاصيل رحلة عزو الجميلة جدا:banghead::banghead:
