الموضوع: تغيير كاوتش اول مره

المشاركة الأصلية كتبت بواسطة DarkKing

السلام عليكم و كل عام و انتم بخير

عربيتي اكسنت 2013 و مغيرتش ليها كاوتش لحد دلوقتي , الكاوتش شكله كويس بس كنت سمعت انها مش بالشكل و ان ليه صلاحيه لازم اغيره بعدها علما بان العربيه عامله 45000 كم
ازاي اعرف امتى لازم اغير الكاوتش؟ و ايه الانواع اللي ينصح بيها اجيبها بحيث تكون بنفس الكفاءه او افضل ؟ و ايه هي افضل اماكن للشراء و السعر المتوقع
لكم جزيل الشكر

انا حاطط صوره للكاوتش

كويس انك حطيت الصور دى :
- اول حاجه فى الصورة الاولى على اليمين حتلاقى مثلث صغير راس سهم على حرف الفردة - فى الحذا بتاع السهم ده داخل ال ٣ مجارى الوسطانيين من الفردة حتلاقى خط صغير كاوتش بالعرض - ده مقياس تاكل الفردة لو لقيت النقشة فى الحذا بتاع الخط الكاوتش اللى فى المجرة يبقى تغير الفردة على طول - لو لقيت النقشة اعلى من الخط الكاوتش يبقى لسه الفرده شغالة معاك .
- تانى حاجه فى الصورة الاولى برضه على الشمال حتلاقى كلمة dot وجنبها شوية حروف وارقام المفروض يبقى فيه كمان اربع ارقام بس دول مش موجودين عندك فى الناحية دى من الفردة وطالما مش موجودين فى الناحية دى يبقوا موجودين فى الناحية التانية الاربع ارقام دول اول رقمين من الشمال بتوع الاسبوع اللى تم تصنيع الفردة فيه ( السنة ٥٢ اسبوع ) واخر رقمين بيدولك سنة التصنيع يعنى لو الرقم ٢٣١١ يبقى الفردة متصنعة فى الاسبوع ال ٢٣ ( شهر يوليو تقريبا ) لسنة ٢٠١١ - لو كان التاريخ معدى ١٠ سنين من تاريخ التصنيع لغاية دلوقتى يبقى تغير على طول .
- تالت حاجه فيه قاعدة للكاوتش اسمها قاعدة ال ٥ سنين - لو الفردة عندك فى النقطتين اللى فاتوا تمام ومافيهاش مشاكل يبقى نغيرها على ٥ سنين استخدام او ١٠ سنين من تاريخ التصنيع ايهما اقرب .
- رابع حاجه لو حروف الفردة متاكلة او واقعه يبقى نغيرها .
- بالنسبة لنوع الكاوتش لو قدرت تلاقى نفس الكاوتش بتاعك كومهو سولاس تشتريه بدون تفكير لانها فردة حلوة جدا تعادل الميشلان .

لامالهوش علاقة بالكيلومتر بتاع العربية لانك ممكن تكون عامل كيلومتر قليل بالعربية بس فى طرق وحشة جدا وبطبيعة سواقه معينة بتتلف الكاوتش وده بيبان من مقياس التاكل وعمق النقشة اللى انا ذكرته لحضرتك ومن الحروف ماتكونش متاكله وهى باينة فى الصور بتاعة الفردة اللى حضرتك مصورها انها كويسة -
بالنسبة لافضل مكان بيبيع كاوتش بصراحة معرفش بس لو ملقيشتش كومهمو سولاس زى بتاعك هات كومهمو برضه طراز تانى او يوكوهاما لانهم شركات كورى والعربية كورى فبيعيشوا مع بعض كويس :)