السلام عليكم و رحمه الله وبركاته
لو سمحت أنا بفكر أشترى تويوتا كورولا 2016 و أكيد طبعا يهمنى رأيكم و بالذات طبعا اللى جرب العربيه بنفسه..
شكرا جزيلا مقدما
السلام عليكم و رحمه الله وبركاته
لو سمحت أنا بفكر أشترى تويوتا كورولا 2016 و أكيد طبعا يهمنى رأيكم و بالذات طبعا اللى جرب العربيه بنفسه..
شكرا جزيلا مقدما
زبالة التويوتا وموتور مش حلو
هتدفع فيها 280 الف
حرام
العربيه خفيفه جدا ومتستهلش كل ده
كنت لسه في نفس موقف حضرتك بنفس ال package، ولقيت منافس واحد بس محترم للكورولا وهوة الأوبل أسترا، وطبعاً ٣ ثواني تفكير ان وكيلها منصور وروحت جبت الكورولا، العربيه معايا بقالها شهر، مبسوط من الأداء، الموتور قوي، العربية أخف من اللي قبلها ومن الأسترا بس مش الخفه اللي تخلي العربية مش ثابتة (العربية فيها traction system ) مش موجود في الأسترا، مش مريحة قوي من جوة زي الألماني او الأسترا، بس في الرانچ ده خرام تجيب سيراتو او چوك ، الكورولا عربية محترمة، فعلاً متستهلش ٢٥٠ الف بس احنا بنتكلم علي ال ٢٥٠ الف من منظورنا القديم، دلوقتي ومع الوضع الأقتصادي ال٢٥٠ الف قيمتهم قلت
ربنا يوفقك
مشكور جدا لوقتك و للتوضيح ..
أنا فعلا كنت فكرت شويه فى أوبل أسترا بس (بعيدا عن وكيلها منصور اللى من الواضح إن سمعته مش أد كده) بس اللى عرفته إن اوبل تقيله و بالأخص هتبان جوه البلد و أنا شايف إن دى مش حاجه عمليه خصوصا إن معظم مشاويرى كده..
بالنسبه للسعر: للأسف الجنيه مبقاش له قيمه و لو فكرت فى حاجه أقل من كده (خصوصا إن حابب اليابانى) مش هلاقى حاجه (على الأقل ماسكه نفسها و لها إسم و عمليه)
بالنسبه لإمكانيات الكورولا: من كلام حضرتك عنها واضح إنك معجب بيها بشكل عام و ربنا يباركلك فيها.
لكن لو سألتك إيه عيوبها.. هتكون إيه؟ و هل اللى يأسمعه مثلا عن إن العربيه واطيه كعيب من ضمن العيوب و إن لازم تاخد المطبات على 3 هل ده صحيح؟
شكرا جزيلا مقدما
انا محستش خالص بموضوع الوطيان علي الارض ده، العربيه عليت وفعلاً باخد بيها مطبات بنفس الطريقة اللي كنت بخدها بالأڤيو ومبحكش، عيوب تانية مش هقدر افيدك دلوقتي، عندي مشكلة مع السماعات بس دي شكلها مشكلة فرديه هشوفها في صيانة الألف، حاسس ان البدي مش قوي، بس بعد تفكير هيفرق في ايه الصاج القوي من الضعيف، بعد الشر لو خبط كله بيطبق والتأمين بقي اهم حاجة دلوقتي
ضرورى لو سمحت ..
أستأذنكم لو أى حد عنده معلومه يقدر يفيدنا بيها .. يبقى مشكووور جدا
انا اسف اني مش بفيدك، بس انا بركب لوحدي عادةً، اقصي حاجة جربتها شخص واحد في المقدمة، هيه العفشة ناعمة جداً، وده ممكن يخليك تخاف تاخد المطب بسرعة، لكن الخلوص فعلاً معقول جداً
مشكله العربيه في حكايه العلو دي كانت اول ما نزلت والتوكيل عمل تعديل وعلاها ودلوقت المشكله دي مش موجوده
اما بالنسبه للسعر فهو فعلا مبالغ فيه بس ده حال كل العربيات وشوف اسعار الكوري وصلت فين
لكن في نفس الوقت المبلغ محترم وممكن تركب حجات كتير افضل من الكورولا مثلا عندك سوبارو xv او نيسان قشقاي هيبقو مناسبين اكتر لشوارعنا و في نفس الوقت عربيات محترمه وتقفيلهم اعلي من التقفيل التركي
لا أسف و لا حاجه .. كتر خيرك على الإهتمام
و على فكره أنا دخلت الاوبل أسترا تانى فى حساباتى بس من البحث المبدئى لقيت مشاكل كتير بيتكلموا عنها مثلا إنها لازم بنزين 95 و أوقات فيه صوت رجرجه فى الموتور ده غير إنها مش رايجه فى البيع (مش مهم بالنسبالى لأنى مش بفكر أبيع) ده فضلا عن إن توكيل منصور سمعته مش و لابد أو بالأخص معندهومش خبره فى التعامل مع الأوبل
موضوع محير !
بس سوبارو xv هتدخلنى فى فئه ماليه أعلى شويه و أنا مش حابب أزود أكتر من كده بس هيه يابانى تقفيل إيه؟
بالنسبه لقاشقاى أنا سمعت إن فيه مشاكل فيها تقريبا فى الموتور أو الفتيس (مش متأكد من صحته بس كنت قريت الكلام ده سريعا كده خلال البحث) ده غير إنها لسه مش منتشره و مفيش معلومات عنها كافيه أوى و عشان كده إستبعدتها
لو عندك معلومات عنها و تقدر تفيدنى أكتر .. تبقى مشكور جدا
نصيحة شوف السنترا والفلوانس
السوبارو ياباني 100% ومش هتزيد عن المبلغ بتاع حضرتك لانها بتبدأ من 230 الف
القشقاي ياباني تقفل انجليزي وهي مفيهاش مشاكل ولا حاجه في الموتور لكن يفضل استخدام بنزين 95 لانها موتور تيربو
الفلونس زيها زي الكورولا تقفيل تركي لكن لو فكرت فيها يبقي خليك في السنترا احسن ووفر فرق السعر لانها نفس الموتور والفتيس واعده البيع هتبقي في صالح السنترا
أنا سألت عن السوبارو "إمبريزا" 240-260 ألف حسب الفئه و فعلا يابانى 100 % !
و الغريب كمان إنها دفع كلى و بصراحه مستغرب السعر ده عليها .. يعنى كنت متخيل إنها تبقى أغلى من كده
بما إن حضرتك فتحت موضوع السوبارو .. تقدر تفيدنى تحديدا فى "إمبريزا" إذا كانت فعلا كويسه و لا لأ .. لأنها لو كويسه و مفيش عيوب كبيره فيها يبقى أحسن أكيد من الكورولا
شكرا جزيلا مقدما
يجماعه اللى بيقول الكورولا خفيفه .... مع احترامى ليه بقوله اركن ع جنب ....
العربيه مع ابن عمى ومسافرين بيها اكتر من 600 كم وماشيين ع اكتر من 150 طول الطريق وجاب 190 فتره والعربيه ماقلتش حاجه .... واكبر دليل انها حراته ان فيها sport mode وبصرااحه ممتع جدا .... بس هو فعلا سعرها مبالغ فيه بس بالنسبه للنيو النترا والنيو سيراتو اللى سعرهم وصل 260000 يبقا دى ممتازه هات الفئه التانيه ب 235000 ورائعه وفيها كل حاجه واللى معاه ع فكره الفئه التانيه ...... وشكرا
...
هو فعلا سعر السوبارو xv فعلا ارتع جدا انا مكنتش اعرف هي دلوقت بتبدأ من 265 زي ما حضرتك قولت
بالنسبه للامبريزا هي برضو دفع كلي ونفس مواصفات ال xv بالظبط وتتميز عنها ان ثباتها اعلي بس يعيبها ان انتشارها اقل من xv فلما تيجي تبيع مش هتمسك سعر كويس زيها وكمان صالونها اضيق شويه لو هنقارنها بالكورولا ونسبيا واطيه بس ده مديها ثبات جبار
تسلم على التوضيح ..
بس من الواضح كده إن الأمبريزا برضه مش هتناسبنى لأنى عاوز عربيه عائليه من المقام الأول و غالبا هيبقى العدد بشكل شبه مستمر كبير فى العربيه و بما إن الصالون ضيق و كمان فى كلام عن خلوص العربيه عن الأرض اللى يعتبر "مش كبير".
ربنا يهدينا جميعا للى فيه الخير.
مشكورين جميعا للتوضيح و لو حد عنده أى إضافه ربنا يجازيه كل خير
:shine[1]:
ليه بس كده يا ميدو
طب انت بتقارن ثباتها بأيه عشان اكون معاك فى الصوره ....لاء العربيه خفيف وصاجها ضعيف يا ميدو...لو ركبت سوبارو امبريزا مازدا 3 هوندا سيفيك الشكل اللى قبل 2016 هتعرف ان الكرولا خفيفه وهيبان لك الفرق
من وجهه نظري الكرولا الجديده سياره صغيره...حتي لما تركب جوه ضيقه جدا (كعرض مش كطول) متستهلش تكون فوق ال 200 الف جنيه بصراحه
الكرولا حماره شغل وتعيش معاك وماسكه سعر وناعمه...ولكن مفيش عربيه فيها كل شيء
الي صاحب الموضوع
ال xv اختيار ممتاز
سياره قويه
صناعه متقنه
ثبات
شكل
ماسكه سعر
منتشره الى حد ما ولسا هتنتشر
استخير وتوكل علي الله
حضرتك انا معايا كورولا من نوفمبر 2014 و ماشي بيها 57 ألف
الحمد لله العربية زي الفل و عيبها الوحيد ان العفشة الخلفية تورشن بيم ، طبعا فرقت معايا شوية علشان اللانسر قبلها كانت ملتي لينك
غير كده العربية تحفة بجد، السعر مبالغ فيه مافيش كلام بس ده علي كل العربيات، يعني بالنسبة ل الكوري الي ولع سعرها كويس
في الفئة دي فيه 3 عربيات فيهم كل عوامل الامان بتاعة الفرامل و من أول كاتيجوري و ده معناه ان الشركات دي بتحترم نفسها و عملاءها. العربيات دي كورولا و سيفك و استرا، هما الي فيهم ESP و ده مهم قوي للفرامل
انا قعدت سنة و نص اقارن و اشوف و بصراحة الافضل كان سيفك بس عيبها ان شنطتها صغيرة و انا عايز شنطة عائلية علشان السفر فأخدت تاني احسن اختيار الي هي الكورولا
استرا مع بنت اخت المدام و كل الي بيتقال عليها في المنتدي صحيح يعني فيه نتشة في الفتيس و بترجرج و طلعتها بطيئة.
الالماني ركوبة و متعة في السواقة بس مكلف في الصيانة و حساس للبنزين
الياباني حمار شغل و اعادة بيع احسن و اعطال اقل بكتير من الاوروبي
أفضل توكيل هوندا و تويوتا، الاتنين مع الفطيم
عيب سوباروا قطع غيارها قليلة شوية علشان مش منتشرة و واطية علي الارض بس كتجربة قيادة افضل من الكورولا (better driving experiance)
لو اي سؤال انا تحت امر حضرتك
تسلموا بجد على الإهتمام و التوضيح ..
أنا روحت شوفت الكورولا بس مرتحتش.. أكتر حاجه ضايقتنى كرسى السواق و القعده حسيت إنى مش مرتاح خالص (تختلف من واحد للتانى) غير إن الشكل الأمامى (مع أكيد إختلاف الأذواق) معجبنيش.. بالإضافه بأه للسعر اللى أنا برضه شايف إنه فعلا مبالغ فيه (حتى بالمقارنه بسعر الكورى و غيره)
بالنسبه لل السوبارو ال xv هتدخلنى فى فئه ماليه تانيه و أنا وصلت ل 250 بالعافيه :) ده غير إنها برضه مش منتشره لسه قوى.
الموضوع دخل فى مرحله الحيره المتعبه :)
حاسس إنى مبقاش عندى غير حل من إتنين:
الحل الأول: إنى أشوف حاجه تانيه فى حدود 230-250 زى مثلا الهوندا سيتى أو الرينو (فلوانس مثلا) و إن كان الإتنين برضه مش عاليين أوى خصوصا إنى محتاج عربيه عائليه فى المقام الأول.
الحل التانى: إنى أصرف نظر خالص عن الفئه الماليه دى (250 ألف) و أشوف حاجه بأه فى حدود 150-170 ألف زى مثلا (بيجو 301) و إن كان دى برضه مش عاليه أوى.
** بس من الواضح إن مفيش عربيه سواء فى الفئه الماليه دى أو دى هتبقى عاليه عن الأرض (بشكل مستريح و متبقاش صداع ليا بأه فى المطبات و كده).
أسف للإطاله و إنى صدعتكم معايا بس فعلا حاجه تحير !
مشكورين جميعا مقدما لأى نصيحه ياريت تقدموها ليا...
البيجو 301 والهوندا سيتي ممتازين لكن فئل اقل واصغر من الكورولا دي عربيات شبابيه مش عائليه
دة غير ان السيتي سعرها مبالغ فيه جدا بالنسبه لفئتها وغير منتشره بالمره فهتتعبك في قطع الغيار واعده البيع
لو هتفكر في الفئه دي شوف التويوتا اليارس وبرضو شوف السيات التوليدو بس التوليدو انتشارها قليل برضو بس افضل من السيتي
لو عايز نصيحه بجد وفر فلوسك وشوف نيسان سينترا هي دلوقت عامله 172 الف (السعر الرسمي) عربيه واسعه جدا وشنطتها ما شاء الله والاوبشنز بتاعتها كويه جدا بالنسبه لسعرها وفي نفس الوقت سعرها مناسب جدا بالنسبه للهبل الي بنشوفه الايام دي
وباقي المبلغ اعمل بيه وديعه في البنك تحت حساب العربيه وربنا يكرمك وتغيرها بحاجه افضل بعد 5 سنين لما تكون الدنيا استقرت شويه ونشوف الدولار واخدنا ورايح علي فين
مشكور جدا على النصيحه .. تسلم
و عندك حق جدا فى موضوع توفير الفلوس و أنا فعلا كنت بدأت أفكر جديا إنى أستبعد فئه ال 250 ألف من حساباتى.
بالنسبه للسنترا أنا بس اللى مقلقنى منها إنها تقفيل مصرى و لقيت كذا حد بيشبهها بالنيسان صنى كمشاكل و عيوب تقفيل (خصوصا إن معايا نيسان تيدا 2007 و أيامها مرضتش برضه أجيب الصنى عشان تقفيل مصرى) ... بس هل حضرتك بتتكلم عنها كتجربه شخصيه و لا عن سمع؟
لكن البجو 301 .. هل فعلا عربيه كويسه و ملهاش عيوب تعتبر كبيره؟ و هل فعلا ضيقه لدرجه إنها متنفعش عائليه؟
معلشى سؤال أخير هتعبك معايا حبتين :)
تنصح بإيه اكتر: التويوتا اليارس و لا السيات التوليدو؟ و ليه لو سمحت؟
شكرا جزيلا مقدما
هجاوب حضرتك من الاخر للاول
عن نفسي افضل اليارس عن التوليدو اولا لان انتشارها اكبر ومش هتتعبك في اعاده البيع والصيانه وقطع الغيار لان توكيلها محترم وثانيا لان الياباني معروف عنه الاعتماديه علي عكس الاوروبي بالرغم من اني معجب جدا بتصميم التوليدو وخصوصا شنطتها :D
بالنسبه لل301 كنت سمعت عن نتشه في الفتيس بتاعها اول ما نزلت وقالوا انهم صلحو العيب بتغير السوفت وير بتاع العربيه بس حضرتك تابع قسم البيجو هيفيدوك اكتر مني بس واضح من انتشار العربيه ان مفيهاش مشاكل
بس عشان مفتيش شوف قسم البيجو
بالنسبه للسنترا انا الحمد لله ربنا اكرمني والعربيه بقالها معايا حوالي 4 شهور والحمد لله الي الان مفيهاش اي مشاكل او عيوب جوهريه وبرضو الاوبشنز بتاعتها مرضيه جدا بالنسبالي وصالونها وشنطتها ما شاء الله واسعين
هي يعيبها فقط ان سحبها بطئ شويه لحد سرعه 60 وده راجع لان ده نظام الفتيس ال cvt وده نفس الفتيس بتاع الكورولا والسوبارو بس الحقيقه ده مكنش عيب بالنسبالي لاني مش غاوي شد وجري
العيب التاني من وجهه نظري ان دهان الاكصدامات ضعيف شويه وبيتجرح من اقل حكه
غير كده الحمد لله العربيه زي الفل
وحضرتك تقدر تتابع الجروب بتاعنا علي الفيس بوك وتشوف اراء وتقيمات الناس كلها للعربيه nissan sentra owners egypt
ومش بقولك كده عشان العربيه معايا انا مش شايف اي مشكله في التقفيل المصري خالص وبرضو كان معايا قبلها شيفروليه افيو تقفيل مصري فضلت معايا 8 سنين ومقابلتش اي مشاكل في التقفيل المصري
اما بقي ايه الي خلاني اشتريها بص يا سيدي
اولا انا كنت ومازلت معجب جدا بالكورولا وفعليا كنت هشتريها لما كانت تاني فئه ب 190 الف وكنت بقارنها بالسوبارو وكانت تقريبا 208
بس لحد ما جهزت كان سعرها الرسمي وصل 220 ومش موجوده في التوكيل وسعرها في المعارض 245
فقولت خلاص بلاها كورولا واخليني في xv بس لما رجعت حسبتها لقيتني هزنق نفسي في قسط كبير 5 سنين وكمان ممكن اتزنق مقدرش اسدد
فمكنش قدامي غير اني افكر في عربيات تانيه ومكنش قدامي غير السنترا والشارك والالنترا والسيراتو
فاستبعدت السيراتو لسعرها المبالغ فيه وكان ساعتها فئه ex ب180 الف وتقريبا فاضيه مفيهاش اي اوبشن غير جنط 16
واستبعدت الشارك عشان شنطتها ضيقه جدا والناس بتشتكي من الوكيل وعدم توافر قطع الغيار وعزلها وحش
وبصراحه مكنتش ميال اوي للالنترا لاني مش بحب الهيونداي عموما
فاستخرت ربنا واشتريت السنترا والحمد لله راضي جدا عنها وغير نادم بالمره علي القرار
حد يعرف ازاى اخلى وحده رفع الزجاج تخرج ارضى مش كهربة
مبروك الف مبرووك
لو تقدر تحدث البروفايل الخاص بيك وذكر السينترا اكون شاكر ليك (لو تقدر او لو تحب)
ياريت تكتبلنا تقرير محايد عن السينترا وتحاول تغطى نقاط كتير على قد ما تقدر
انا طمعان فى تقرير دسم عن السينترا لو تقدر من فضلك
وياريت باقى ملاكها ميستخسروش حاجه فينا
للاسف انا لغيت الفيس بوك و جالى وقت حسيت انى ادمنته- وكميه النقد الهدام والتريقه خلتنى اشيله الحمد لله
وشكرا
اسف جدا يا استاذ سلام ماليش اوي في كتابه التقارير فدورت لحضرتك لقيت واحد عامل مقارنه بينها وبين الفلوينس وانا متفق علي الكلام ده معاه اقراها ونتناقش مع بعض
ولو حضرتك عايز اي استفسار عن العربيه اسأل وانا هجاوبك باذن الله
مقارنة تفصيلية بين الفلوانس والسنترا
فى اول 2015 كنت بقارن بين السنترا وبين الفلوانس وفى الأخر اشتريت الفلوانس الهاى لاين لأنى حسيتها أشيك وافخم بكتير جداا من السنترا وخصوصا ان الفلوانس الهاى لاين كانت وقتها ب 186 والسنترا كانت ب 160 والأسعار دى كانت عند المصرية وده السعر اللى اشتريت بيه الفلوانس حسيت وقتها ان فرق السعر الى كان بين الأتنين كان لايقارن بفرق الأوبشن الرهيب بين الفلوانس الهاى لاين وبين السنترا الهاى لاين برضه ,, المهم اشتريت الفلوانس ,, عربية فخمة جدااا شيك جداا وانا هنا بتكلم عن الهاى لاين اول 2015 اللى مش هاعرف اعد الأوبشن اللى فيها صراحة ,, العربية قعدت معايا حوالى 4 شهور واستخدامى ليها كان مابين 6 اكتوبر والهرم والمهندسين يعنى لا سافرت بيها ولا عملت بيها مشوار طويل والجرى بيها كان بيبقى على المحور او الدائرى وهكذا ,,, وتقييمى ليها هايكون بمعيار شخصى ولمدة قصيرة وبعتها وهى عاملة 5000 كيلو
مميزات الفلوانس الهاى لاين
1. بجد عربية فخمة جدااا وشيك جدااا ودى طبعا مسألة اذواق وتختلف من شخص للتانى
2. كمية اوبشن رهيبة بالمقارنة بسعرها اللى كان وقتها 186 ومعرفش دلوقتى بكام يعنى تعتبر كقيمة قصاد فلوس مكسب كبير وهحاول افتكر معاكوا الأوبشن زى الجنوط سبور - كارت ذكى بصمة اربع ابواب - فوج لايت - ليد داى لايت - زينون - فتحة سقف - فرش جلد بالكامل - كاسيت 6 سماعات وبصراحة صوته رهيب وفى منتهى النقاء وطبعا سى دى - يو اس بى - ا يو اكس - وكمان بلوتوث طبعا - محدد سرعة ومثبت سرعة - مرايات ضم وظبط كهرباء - ستائر مدمجة فى الأبواب الخلفية والبربريز الخلفى - تكييف اوتوماتيك دوال زون - تكييف خلفى - 6 ايرباج - بارك سينسور - وحدة رفع للزجاج وفتحة السقف كمان يعنى كله بيقفل من الريموت ,, مش عارف ناسى حاجة ولا كده خلاص
3. ثبات العربية ممتاز وفرامل فى رأيى هايلة والعزل جيد جداا بس مش ممتاز
4. صالون واسع وكنبة وشنطة واسعة وقعدتها مريحة
5. عربية ناعمة طبعا وعفشة جيدة جدااا
عيوب الفلوانس (من وجهة نظرى وعن تجربتى)
1. السحب بالنسبة لى او فى رأيى سيئ جداااا وده كان اهم واكبر عيب بالنسبة لى فى العربية وفيه ناس قالت انه بيتحسن بعد ال 1000 وبيرجع يتحسن تانى بعد ال 3000 ومش هانكر ان ده حصل لكن فى المجمل السحب بتاع العربية سيئ جدااا - وانا هنا اقصد بالسحب ان العربية تقوم او حتى تجمع يعنى لو انت هديت خالص وانت بتاخد مطب وجيت تجمع تانى هاتزعل لأن العربية على ماتوصل لل 60 بتاخد وقت عن اى عربية زيها وعايز اقولك انك بتبقى على 3000 ار بى ام علشان العربية تجمع وتسحب - طبعا بعد ال 60 العربية بتمشى عادى بس برضه مش بتاعة قرص ولا شد ولا غرز ولا الكلام ولا حتى بالكيك داون - انسى تماما موضوع الشد والحرق والسحب مع الفلوانس - كبيرك تجرى وبس - برضه بحس انها من بعد ال 120 وال 140 بتبقى تقيلة فى تجميعها وسحبها ومش بتعلى بسهولة
2. رغم كمية الأوبشن اللى فيها دى كلها والشكل الفخم ده لكن بجد الخامات الداخلية سيئة وانا اقصد الخامات وليس الديزاين زى تقفيل فرش السقف مثلا كان سيئ للغاية وخامات البلاستيك اللى فيها انا شايفها مش اد كده
3. التكييف الأوتوماتيك بالنسبة لى كان رخم علشان انت ببساطة لو مختار مثلا خاصية تدوير الهواء داخل السيارة او بمعنى اصح انت كده قافل الهوايات وبتدور الهوا اللى جوه مش بتاخد هوا من بره فمجرد ما تقفل العربية وتطفيها وتنزل كده الهوايات اتفتحت تانى وتنزل تانى يوم الصبح تلاقى فيه تراب جوه العربية او فى الصالون وخصوصا لو بتركن فى اماكن مفتوحة زيى
4. من اهم الحاجات اللى خليتنى اجيب الهاى لاين هى الزينون لكن طلع زينون مايص هههههههههه - الزينون بتاعها طبعا متصنع طبقا لتعليمات السلامة والأمان الأوروبية يعنى مقصود منه الأضاءة فقط مع احترام الرؤية وعدم الأبهار وبالتالى انت مش بتحس بيه اوى ده غير انه فى الواطى بس - يعنى لما بتنور الزينون مش بتحس خالص بيه او الفرق اللى بيعمله مش قوى للدرجة وانا بتكلم فى الطرق العادية لكن فى الضلمة بيتحس زيه زى اى نور فالضلمة بيفرق طبعا وعلى فكرة دى نفس فكرة الة التنبيه (الكلاكس) برضه التصنيع بتاعها بحيث لا تسبب الأزعاج ومعمولة على فردة واحدة يعنى ممكن تحس فى اوقات معينة ان صوته ضعيف
5. بصراحة حسيت التكييف مش قوى يعنى ممكن اقول عليه جيد لكن مش جيد جداا مثلا
مقارنة بين الفلوانس والسنترا 2015 تايلاندى هاى لاين (عيوب وميزات)
1- فرق الأوبشن فصالح الفلوانس طبعا وبجد مافيش وجه مقارنة بأى حال من الأحوال بين الأتنين كأوبشن وفى رأيى ان السنترا فقيرة جداا كأوبشن ولو هاتكلم عن حاجات بسيطة من الأوبشن هاقول كفاية ان المرايا مش ضم كهربا ودى حاجة هايفة وموجودة حتى فى الصنى الشكل القديم حتى الكاسيت والسماعات الفلوانس تكسب بفارق كبير جدااا
2- الأداء فى صالح السنترا بلا منازع ودى حاجة انا مستغربها علشان المفروض الأتنين نفس الموتور ونفس الفتيس زى ما سمعت لكن عن تجربة حقيقية سحب السنترا مختلف تماما عن سحب الفلوانس بنفس الفتيس ال سى فى تى - يعنى اه السنترا بطيئة فى سحبها وتجميعها بالمقارنة بعربيات تانية ودى طبيعة الفتيس لكن كمقارنة بالفلوانس فيه فرق ملحوظ ومحسوس جداا بين سحب السنترا وسحب الفلوانس فى صالح السنترا بفرق كبير وبجد كفاية انك وانت بتجمع بتحس العربية والموتور بيجمع بسلاسة والأر بى ام طبيعى جدااا مش تلاقى نفسك هاتعدى ال 3000 ار بى ام علشان تجيب ال 60
3- الخامات الداخلية فى صالح السنترا - فعلا خامات التابلوه والبلاستيكات والحاجات دى فى صالح السنترا جداا كنوعية خامة ماعدا الفرش وفرش الأبواب علشان طبعا كخامة جميل لكن مش عملى يعنى بيتوسخ بسرعة جداا ولازم هاتعمله فرش جلد
4- التصميم الداخلى مسألة اذواق شخصية بس العربيتين حلوين جدااا كتصميم تابلوه وصالون وعيب الفلوانس يمكن ان الصالون او التابلوه اسود فى اسود والعداد الديجتال للسرعة انا شايفه رخم علشان انت مش عارف اخره فين ههههههه او ايه اخر سرعة للعداد وبالنسبة للسنترا الدايزين جميل واللونين فى التابلوه حلوين ويعيبها جدا وبجد ان مساحات التخزين فيها قليلة او توزيعها مش حلو
5 - كذلك الشكل الخارجى مسألة اذواق
6- التكييف فى صالح السنترا طبعا
7- الثبات اعتقد الأتنين قريبين جدااا من بعض بس الفلوانس تكسب علشان ارتفاع السنترا عن الأرض اكبر
باختصار شديد اوبشن شياكة فخامة فلوانس - قوة اداء سحب سنترا - السنترا عربية ممتازة بشكل عملى يعنى بتديك الميزات الرئيسية او المهمة او اللى انت محتاجها جداا كأساسيات بالأضافة الى قدر بسيط من الرفاهية او الأوبشن وبسعر تنافسى
الفلوانس عربية شيك فخمة فيها قدر كبير من الرفاهية والراحة حتى العربية تحس انها مرفهة ماينفعش تمشى بيها فى اى شوارع او فى اى مشاوير مش بتاعة بهدلة
السنترا عربية تعتمد عليها الفلوانس عربية تتعايق بيها وطبعا الأتنين ماركات محترمة وعربيتين كويسين بس كل واحد وعلى حسب احتياجه من العربية - الفلوانس لو واخدة اداء السنترا هاتبقى عربية وهم بجد - والسنترا لو اخدت اوبشن الفلوانس هاتبقى عربية العمر وتنافس اتخن عربية
تتوفر تويوتا كورولا 2016 في مصر بعدة فئات يبدأ سعرها من 215000 جنية للفئة الأولى و235000 للفئة الثانية ويصل إلى 260000 جنية لأعلى فئة.
في تحمال علي العربية بسبب السعر
واصلا دخل الماركة ايه بسعر العربية
بعد عدم السيطرة علي اي عربية تانية ؟ والامثلة كتير
شاكر جدا جدا لحضراتكم جميعا و على كل النصائح اللى قدمتموها
و بالتوفيق للجميع
مقيم بالسعودية - مالك أول لكوروللا 2012 - ياباني - السيارة ممتازة جدا من كل النواحي . حتي التكييف - وقطع غيارها معمرة . لكن يعيبها إنها غاليه جدا . علي سبيل المثال غيرت كاوتش المساحات فقط ب 95 ريال . تيل الفرامل كامل في حدود 400 ريال بس يعيش معاك من40 إلي 50 ألف . لا أدري بالأسعار في مصر . بس أكيد في السعوديه بيجيبوا الأصلي.
السيارة عامله دلوقتي في حدود 90 ألف ولم أقوم بتغيير سوي تيل الفرامل مرتين . وكاوتش المساحات . وطبعا الزيوت - والكاوتش غيرته علي 75 ألف وجبت دانلوب ب 1000 ريال . البوجيهات تتغير كل 100 ألف وسعرها معقول .