سفر الى شرم الشيخ بالفيرنا

**RamyEskander** · 11-07-2016 10:09 AM

يا جماعة انا مسافر الى شرم الشيخ بعربيتى فيرنا 2008 تنصحونى بإيه قبل السفر ممكن يتعمل

**mizomizomizo** · 11-07-2016 02:10 PM

شيك علي العربية كويس وفول بنزين قبل ما تعدي النفق من بنزيمة كتلكس قبل بوابة السويس عشان البنزين ممكن تلقي في بنزيمة وبنزيمة بعد النفق وخلي رخصة العربية و القيادة مع بعض لان الكماين كثير ومتجريش في الملفات الجبلية لانة رايح جي وحاول تفول او ل متوصل بالسلامة شرم من بنزيمة التعاون بعد بوابة شرم علي طول عشان البنزيم ممكن وممكن
والطريق بعد السويس 90 في المية فردة رايح جي

**samirpop2** · 11-07-2016 03:10 PM

اتأكد من كاوتش عربيتك وطبعا تكون عامل صيانه ومتأكد من دورة التبريد

**salam100100** · 11-07-2016 03:42 PM

انا بشيك على العربيه قبل كل سفر كالاتى:
1. بكون مغير زيت وفيلتر قبلها
2- بتاكد من مستوى المياه فالرادياتير (القربه)
3- بملا قربه المساحات
4- بدور العربيه وفاتح الكبوت وبدور على اى حاجه غريبه (صوت- رشح) فى مره لقيت يوم السفر الصبح العربيه بتنقط بنزين- طلع خرطوم البنزين مقطوع- كان بالصدفه معايا حته غيرته وسافرت
5- بروح محطه البنزين بنظفها من جوه بالمكنسه فقط- مش عايز حد يقرب من الموتور قبل السفر- مش عايز اى مفاجاءت- وبلمع الازاز من جوه
6- بنفخ فيلتر الهواء والتكييف
7- بظبط ضغط الكاوتش
8- بشيك على الاستبن والعده بتاعته
9- باخد معايا كومبريسور- عده بسيطه من ضمنها كشاف- ازازه ميه وليتر زيت- فيوزات استبن
10- بشيك على الانوار على السريع
11- بفول ليله السفر
12- لب وسودانى وحاجه ساقعه لزوم الطريق
13- بسيب مفتاح الشقه مع ابويا عشان لو حاجه حصلت وانا مسافر
14- بحاول افضى شنطه العربيه من اى حاجه ملهاش لازمه فالسفر
15- بخد معايا شنطه صغيره فيها ادويه بسيطه (للاسهال- مسكن- خافض حراره............)

معلش استحملنى انا اللى بيجى على بالى بكتبه حتى لو ملوش علاقه بالعربيه

هو طبعا بالنسبه للعربيه انت اكتر واحد تقدر تقييم العربيه وادائها-
الجرى جامد وكتير بيستهلك بنزين اكتر من اللازم- حاول متجريش وربنا معاك وتقضى وقت حلو

انا مسافر الغردقه ودى هتكون اول مره اسافرها بالعربيه- موضوع البنزين مهم جدا بالاخص بالنسبالى عشان الصنى الشكل الجديد تنكها صغير (41 لتر فقط)

**mizomizomizo** · 11-07-2016 04:09 PM

بالنسبة للزميل المسافر الغردقة خلي باللك الطريق مليان ليجان سرعة وتخلص من لجنة تلقي الثانية والمخلفة 150 جنية تصالح فوري

**borio1704** · 11-07-2016 05:20 PM

المشاركة الأصلية كتبت بواسطة RamyEskander

يا جماعة انا مسافر الى شرم الشيخ بعربيتى فيرنا 2008 تنصحونى بإيه قبل السفر ممكن يتعمل

الحقيقة الزميل salam100100 قال فعلا كل حاجة ممكن تتعمل قبل السفر..

نصيحتي ليك هي أثناء السفر وبالذات لما توصل المنطقة الجبلية قبل شرم الشيخ...

ما تخليش الطريق يخدعك وتجري في ملف انت مش شايف آخره..

حاول ما تستخدمش الفرامل إلا في حالة الضرورة.. واعتمد على فرملة الموتور عن طريق تعشيق ترس بطيء نسبيا ..

باختصار .. لما تلاقي الطريق نازل والعربية بتجري منك .. بدل ما تدوس فرامل طول الطريق عشق التالت والعربية هتهدي وتقدر تتحكم فيها.

استخدام الفرامل لمسافة طويلة هيخلي الفرامل تتحرق.

وربنا يسلم طريقك :)

...