الموضوع: اقوى مقارنة تفصيلية ٢٠١٧ بين رينو لوجان اعلى فئة وشيفروليه اوبترا ونيسان صني اعلى فئة

السلام عليكم وكل عام وانتم بخير.. انا لاحظت ان ناس كتيرة محتارة بين التلات عربيات دول وانا كمان كنت زيهم بس خلاص حسمت امري والحمد لله وحبيت انقل تجربتي الشخصية وكل واحد يختار اللي يناسبه.. اناكتبت المقارنة دي قبل كده كرد على اكتر من استفسار وحبيت اكتبها تاني كموضوع مستقل علشان افيد بيه اكتر عدد من الاعضاء..

انا قضيت شهرين محتار و بدور على عربية في حدود من ١٤٠ الى ١٥٠ الف تقريباً وبقارن وأدور وأسأل وزهقت الناس هنا في المنتدى وزهقت أصحابي وجيراني من كتر الأسئلة علشان اعرف الفرق التفصيلي بين النيسان صني (أعلى فئة) والرينو لوجان (أعلى فئة بالنافيجيتور) والشيفروليه اوبترا الجديدة.. وفي النهاية انا شخصياً اخترت الاوبترا الجديدة (التجميع المصري موديل ٢٠١٧)...الحجز من التوكيل أفضل لأن سعرها الحالي 140 الف وإستلام خلال 45 يوم (والحقيقة خلال اقل من اسبوعين ان شاء الله.. انا حجزت وكلموني بعد ١٢ يوم علشان استلم والحمد لله استلمت بس ركنتها لحد ما أأمن عليها.. خايف احركها قبل ما أأمن.. ربنا يستر )

العربية دي غلبت الكل من وجهة نظري وعندي أسبابي.. انا اعرف اللي اشترى الصني والستيب واي (اللي هي نسخة من اللوجان) وبيندموا ومنهم اللي بيدور يبيعها بعد شراءها باسبوعين !!! فيه طبعاً ناس مبسوطين منهم وبيشكروا كمان لكن إقرأوا المقارنة دي اللي تعتبر خلاصة مجهود شهرين مني ويارب تفيدكم وربنا يوفق الجميع لأفضل اختيار حتى لو كان حاجة تانية..

مقارنة بين النيسان صني (أعلى فئة) ورينو لوجان (أعلى فئة بالنافيجيتو) وشيفروليه اوبترا الجديدة (اللي بدأ تجميعا في مصر في ابريل 2016 تقريبا)

طبعا فيه اوبشنز كتيرة مشتركة زي الجنوط الاسبور والمرايات الكهربا والباركينج سنسور ونظام مانع السرقة.. الخ.. ودي امور مش هتكلم عنها.. انا هتكلم عن الاختلافات فقط..

بالنسبة للصني أعلى فئة:

مزاياها:
سمارت كي (مفتاح ذكي) يعني تدور العربية من زرار start/stop engine والمفتاح في الميدالية في جيبك
- طي المرايات الجانبية كهربائيا (بس دي ميزة وعيب لان لو سايس قفلهالك بإيده هيكسرها او يبوظها وتبقى مصيبة)
- تكييف تاتش
- صالون واسع جداً (بس باقي العربيات مش ضيقة.. مش فارقة كتير يعني)
- فتحة تكييف للكنبة الخلفية بمروحة سرعتين (بس تكييف الصني اساسا ضعيف)
- زجاج فاميه خلفي (بس موجود برضو في الاوبترا)
- مسند يد بالكنبة الخلفية: الكرسي الاوسط يمكن طيه ليتحول لمسند يد به حامل لكوبين من المشروبات (بس ده موجود في الاوبترا ومش موجود في اللوجان)
- قطع الغيار الاساسية منتشرة وسعرها معقول لان العربية بقالها سنين في السوق (بس فيه طبعاً تغيير بسيط.. الفوانيس شكلها اتغير مثلاً)


عيوبها:
- صاجها ورق (كل العربيات صاجها ضعيف صحيح بس الصني أضعفهم على الاطلاق... سمك الصاج حاجة تقرف)
- صحيح بيقولوا ان مشكلة الطنابير والفرامل بتاعة 2015 اتحلت بس بسمع ان فيه ناس تانية ظهرت عندهم والله اعلم
- أسوأ توكيل في العالم من وجهة نظري.. (كل التوكيلات ممكن تستهبل في تصليح عيب صناعة لشخص معين .. عربية او اتنين او عشرة مثلاً لكن توكيل نيسان كان بيستهبل في أسطول كامل من العربيات اللي كان فيها مشكلة الفرامل وكانوا بيتهربوا من المسئولية ومش عاوزين يعترفوا بالمشكلة).. حتى نيسان قشقاي الجديدة فيها مشكلة في الفتيس ومش سائلين في العملاء .. من الآخر اكتر توكيل عليه أحكام وسوابق وقضايا في المحاكم وحماية المستلهك.. واكتر توكيل معموله جروبات للمتضريين منه للمطالبة بحقهم..
شكلها لسه وحش من ورا (حسنوا شكلها من ادام بس لسه وحش من ورا..تحسها واخدة شالوت) بس دي طبعاً أزواق

بالنسبة للوجان:
مزاياها:
- موتورها 1600 (الاوبترا والصني موتورهم 1500.. بس قوة موتورهم والعزم تقريبا هو هو.. فرق بسيط اوي .. بالعكس المواتير ال 1500 يمكن توفر شوية في البنزين)
- فيها مثبت ومحدد سرعة (وده هيريحيك اوي في السفر.. اما لو مكنتش بتسافر كتير مش هيفرق معاك.. خصوصاً انه بيفصل اول ما تدوس على الفرامل او البنزين.. وهتحتاج تشغله تاني ساعتها).. باختصار يعني مش مهم اوي في القيادة داخل المدن.. ده حتى الدائري بتاعنا مش هتقدر تشغله عليه
- أكبر شنطة 510 لتر (لكن الفرق مش كبير... الصني 490 والاوبترا 480.. يعني تقريبا زي بعض)
- جودة عالية (لكن هتتفاجيء لما تقارنها بالاوبترا.. إنبهارك بيها هيروح وهتلاقي الاوتبرا جنبها جوهرة بتلمع.. زي ما تقارن الدهب بالماس.. اللوجان حلوة بس الاوبترا تحفة)
فيها كاسيت بشاشة ونافيجيتور (دي اعلى فئة..بس اي عربية ممكن في المستقبل تركبلها كاسيت فيه نافيجيتور عادي يعني)
- عالية عن الارض (لكن ده يعتبر ميزة وعيب لأنها مش عربية كبيرة suv لا دي عربية صغيرة سيدان وارتفاعها هيقلل من ثباتها.. رغم ان اللي معاهم مش بيتشتكوا من ثباتها لكن بالعقل كده الارتفاع مبالغ فيه فعلاً وكان المقصود انها تبقى مناسبة لمصر وده فعلاً شيء كويس في السرعة البطيئة لكن فعلاً بيأثر على الثبات على السرعات العالية لأن حجم العربية صغير.. وفيه ناس بعد ما بتجيبها بتعدل العربية علشان توطيها شوية!! هتلاقي النت مليان مواضيع عن كده)

عيوبها:
- فتيسها 4 سرعات (صوت موتورها بيعلى على السرعات العالية لأن الفتيس جاب الرابع ومفيش غيارات تاني) اما الاوبترا ففتيسها 6 سرعات والصني ٥
- سحبها وحش لحد 60 كم/ساعة.. واعرف ناس بتحاول تبيعها علشان كده!!
- مفيهاش سمارت كي زي الصني (بس بصراحة تغور الصني بمشاكلها)
- مفيهاش زجاج فاميه (مش هتفرق مع البعض) لكن الاوبترا والصني فيهم زجاج فاميه خلفي
- مفيهاش فتحة سقف (الأوبترا فيها فتحة سقف وكمان التحكم فيها الكترونياً)
- مفيهاش مسند يد بالكنبة الخلفية

بالنسبة للاوبترا الجديدة (التقفيل المصري):
مزاياها:
- فئة واحدة هاي لاين فيها تقريبا معظم الاوبشنز اللي في أعلى فئة من كل العربيات المنافسة (مش عاملينها فئات لإستغلال المشتري ورفع السعر مقابل بعض الكماليات تحت اسم فئة اولى وتانية وتالتة.. إلخ)
- فخمة جداً من الداخل والخارج: شكل خارجي رائع وتقفيل وعزل ممتاز
- فرش جلد وتابلوه فخم فعلاً (تحس إنك راكب نسخة من الكروز)
- فيها فتيس 6 سرعات (وده بيوفر بنزين ويخلي صوت الموتور منخفض حتى على السرعات العالية)
- موتورها صحيح 1500 بس قوته 110 حصان وعزمه شديد زيه زي مواتير ال 1600 (يعني هيوفر بنزين وكمان بنقس القوة)
- فيها فتحة سقف والتحكم فيها الكتروني كمان (والاوبشن ده تحفة بجد..بيحسسك بالفخامة)
- تكييفها أفضل من اللوجان والصني
- شنطتها كبيرة (تقريبا 480 لتر)
- مسند يد بالكنبة الخلفية: الكرسي الاوسط يمكن طيه ليتحول لمسند يد به حامل لكوبين من المشروبات (بس ده موجود في الصني ومش موجود في اللوجان)

عيوبها:
- البعض بيعتبر من عيوبها ان معظم مكوناتها مصنوعة في مصنع جينيرال موتورز بالصين وبعضها مصري وبعضها كوري.. وبتتجمع في مصر.. لكن أقسم بالله انا لما ركبتها حسيت بفرق شاسع في الفخامة بينها وبين اللوجان اللي تقفيلها مغربي.. والله قلت لنفسي هشتريها حتى لو كانت صيني صيني ماركة جاكي شان او بينج بونج :) .. أركب اللوجان واركب الاوبترا وانت تفهم انا اقصد ايه.. مش هتصدق فرق الفخامة والرفاهية.
- مفيهاش مثبت سرعة (بس ده برضو مش موجود في الصني.. ومش مهم غير في السفر.. واعرف ناس كتير عندهم ومش بيستخدموه اساسا)
باختصار هتلاقي فيها كل ما تتخيله من مواصفات وكماليات وبأفضل سعر وجودة عالية لم أكن انا شخصياً أتوقعها لحد ما شفتها بعيني..

بس أقولك فكرة أحسن وان شاء الله هتدعيلي لو عملت الفكرة دي؟؟ روح الشيخ زايد.. على المحور من بره.. بعد هايبر وان على طول.. هتلاقي توكيلات نيسان ورينو وشيفروليه.. التلاتة لازقين في بعض !!! .. ادخلهم واحد واحد واركب الصني واللوجان وخلي الأوبترا للآخر علشان هتنبهر !! مش هتصدق نفسك... هتحس بفخامة وجودة واوبشنز عالية جداً ..

انا بعد ما كنت هجيب اللوجان خلاص لما شفت الاوبترا وركبت الاتنين ورا بعض زي ما بقولك حسيت ان مفيش وجه للمقارنة.. حسيت ان اللوجان (اللي كنت شايفها عربية تحفة وفاكر انها فخمة) لما ركبت الاوبترا بعدها بنص دقيقة حسيت ان اللوجان جنبها عاملة زي اللانوس !!!!
انا نفسي انبهرت ومكنتش مصدق الفخامة والاوبشنز العالية.. فتحة سقف الكترونية وفتيس 6 سرعات وزجاج فاميه... تحس انك راكب نسخة من الكروز... وب 140 ألف بس.. بس خلي بالك ان سعرها غلي من حوالي اسبوعين بعد ما كان 137.. بسبب زيادة الطلب عليها..
وزي ما اللوجان ملت الشوارع الفترة اللي فاتت هتشوف الايام الجاية الاوبترا هتعمل ايه... بدأت فعلاً تغرق الشوارع..
صدقني انا قبل ما اشوفها قلت لنفسي اكيد مش هجيبها دي صيني بس بعد ما شفتها وقعدت في اللوجان قبلها وبعدين قعدت فيها (توكيل رينو وشيفروليه لازقين في بعض في الشيخ زايد) قلت لنفسي انا هجيب العربية دي حتى لو كانت مش شيفروليه (حتى لو كانت ماركة صيني صيني ماركة جاكي شان او بينج بونج مثلاً)..

وبصفة عامة إلحقوا اشتروا بسرعة لأن الأسعار غالبا هتغلى قريبا جدا..كل السيارات.. وده خبر شبه اكيد والله اعلم.. عالاقل بسبب ارتفاع الدولار

وأخيراً متنساش ان العربية اللي مناسبة لشخص ممكن متكونش مناسبة لشخص آخر (يعني عربية لشاب غير لرب أسرة..إلخ) علشان كده انصحك بالإستخارة وإستشارة آخرين..

ملحوظة أخيرة: انا فكرت أعصر نفسي واطلع 15 او 20 الف كمان (كده كده انا سالف فلوس) واشوف عربية تانية بس لقيت العربيات اللي في السعر ده برضو مش هتفرق كتير.. هتزنقني فلوس وكمان مش هتكون أعلى فئة وهيكون ناقصها أوبشنز مهمة.. فقلت ملهاش لزمة خليني في اللي على ادي ..سعرها كويس وهاي لاين فيها كل الاوبشنز..

الرد على موضوع ان الاوبترا صيني:
معظم الشركات متعددة الجنسيات (Multinationals) في العالم كله لجأت في السنين الأخيرة لفتح مصانع في الصين بهدف تقليل تكلفة التصنيع والإستفادة من توافر الأيدي العاملة الرخصية و التكنولوجيا.. بص لجيب حضرتك هتلاقي فيه موبايل سامسونج.. سامسونج مثلاً فتحت مصنع في الصين وبقت تنتج من هناك من كام سنة وناس كتير يمكن متعرفش !! .. بس طبعاً عندهم إدارت للرقابة على الجودة Quality Control وتأكيد الجودة Quality Assurance للحفاظ على سمعة العلامة التجارية.. علشان كده كتير مننا بيشتري موبايلات سامسونج وغيرها ومبيهتمش هي مصنوعة فين وده بسبب ثقته في اسم سامسونج..

ولو جينا للحق بأه ففيه شركات صيني صرف (صيني صيني يعني مش مالتي ناشيونال) منتجاتها أفضل من الشركات العالمية المنافسة... زي شركة هواوي للموبايلات مثلاً. موبايلات وتابلت هواوي أفضل 100 مرة من سامسونج...

يعني من الآخر المشكلة مش ان المنتج صيني ولا اوروبي... المشكلة في الجودة والرقابة على الجودة والرقابة على الواردات واننا في بلد زي مصر محتاجين بجد نحط ونفعل مواصفات جودة لازم تكون في العربيات المستوردة وإلا يتم رفض دخولها البلاد (لو كانت تأثر على سلامة الركاب) اما لو فرق الجودة في أمور غير هامة او كماليات فممكن السماح بيها بهدف وجود تنوع وكل واحد يشتري اللي على اد فلوسه (طالما مش حاجة خطيرة تأثر على السلامة)

ده رأيي الشخصي في موضوع صيني ده.. بس بصراحة مكنتش مقتنع بيه اوي قبل ما اشوف الاوبترا الجديدة.. كان وجهة نظري عن الصيني ان معظمها عربيات رديئة.. لحد ما شفت الاوبترا الجديدة وحسيت بالجودة العالية والفخامة اللي بجد خليتني أعيد النظر وأتأكد ان الكويس موجود والوحش موجود.. حتى اللي مش صيني فيه منه الكويس والوحش.

اوخيراً أنصحك كمان لازم تقرأ الموضوع ده هيفيدك اوي ان شاء الله:
http://www.nilemotors.net/Nile/329150-a.html (عايز تشتري عربية ومحتار؟؟؟؟ تعالى أقوللك إزاي تختار) (عايز تشتري عربية ومحتار؟؟؟؟ تعالى أقوللك إزاي تختار)

وربنا يكتبلك اللي فيه الخير
تحياتي

تكملة للمقارنة نسيت أقول الآتي:

من مزايا الاوبترا أيضاً:
- الاوبترا فيها نظام الثبات/الاتزان الالكتروني esp (بالإضافة طبعاً لنظام منع إنغلاق الفرامل abs ونظام توزيع قوة الفرامل ebd الموجودين في باقي العربيات) مش متأكد بصراحة اذا كان موجود برضو في النيسان صني ولا لأ.. بس على حد علمي انه مش موجود في اللوجان

- اكبر خزان وقود بسعة 54 لتر (اللوجان 50 والصني 41)

- 6 سماعات للكاسيت مش 4

-فيها فتحة usb (لشحن الموبايل) في ظهر مسند اليد الأمامي (بحيث يستخدمه اللي قاعدين في الكنبة الخلفية)

- أقصى عزم للموتور 146 نيوتن وقوته 110 حصان رغم انه 1500 سي سي (أقصى عزم لموتور اللوجان ال 1600 سي سي هو 148 نيوتن وقوته برضو 110 حصان والنيسان ال 1500 سي سي هو 134 نيوتن وقوته 108 حصان) يعني بيدي نفس قوة موتور اللوجان ويوفر في البنزين

من مزايا اللوجان:
كاسيت اللوجان فيه بلوتوث.. والاوبترا مفيهوش. بس طبعاً كاسيت الاوبترا فيه فتحات usb و aux.. وان كان انا عندي في العربية كاسيت بلوتوث ونادراً ما بستخدمه.. عادة بستخدم الهيد فونز بتاعة الموبايل نفسه.. بس دي طبعاً أزواق

من عيوب الصني:
- الأكثر استهلاكاً للوقود

ملحوظة اخيرة:

انا استبعدت تقييم التوكيلات من مقارنتي.. صحيح ساعات بسمع عن منصور كلام مش حلو وشفت اللي راح صيانة نيسان وبيقول المعاملة كويسة اوي فعلاً بس يافرحتي بالمعاملة الكويسة والعربيات فيها مشاكل ومحدش بيحلها.. واللوجان برضو توكيلهم بيتقال عليه كلام زي اخواته..
فقلت لنفسي بم اني عايش في بلد مفيش فيها مستهلك بياخد حقه.. وكل اللي بناخده بس شوية ابتسامات واحنا داخلين التوكيل..لكن وقت الجد ولما يكون فيه مشكلة حقيقية بيظهر الوش الحقيقي وتلاقي معاملة زبالة او كلام حلو بدون حل حقيقي.. فقررت استبعد سمعة التوكيل من حساباتي بصراحة.. خصوصاً اني اعرف كذا حد معاه الافيو ومحدش بيشتكي من التوكيل.. وربنا يستر علينا كلنا

اخيرا ارجو ان كلامي ميتاخدش كنوع من التحيز للاوبترا.. انا صحيح منبهر بيها لكن كل المزايا والعيوب دي امور غير قابلة للتحيز.. يعني وجود فتحة سقف في الاوبترا او مثبت سرعة في اللوجان او صالون واسع جدا في الصني دي امور لا تحيز فيها.. اما عن الجودة والتقفيل فنصيحة روحوا شوفوا العربيات بنفسكم..
تحياتي

بالنسبه للصنى انا لسه ممون انهاردا الصبح
مشيت 450 كم وحطيت 33 ليتر

يعنى ليتر البنزين بيمشينى 450/33= 13.6 كم
يعنى لكل 100 كم بتستهلك 100/13.6= 7.3 ليتر
المعدل دا داخل المدينه بالتكييف طول الوقت

فالسفر على السرعات العاليه بتستهلك 6.8 ليتر لكل 100 كم عن تجربيه

اعتقد دى انسب طريقه لحساب متوسط الاستهلاك هى عن طريق انك بتيتدى بتنك فول وبتمون تانى على تنك اوشك على الانتهاء
دا بيديك مؤشر كويس جدا على اد ايه التنك بيمشيك اد ايه

فعلا تنك البنزين بتاع الصنى صغير ودا عيب فالعربيه- وبيبان فالسفر المسافات الكبيره