الموضوع: كيف أعرف البارت نمبر

البارت نمبر هو رقم تعريفى بيوصف القطعة وكل شركة سيارات ليها البارت نمبرز بتاعتها متكودة بطريقة معينة بواسطة الشركة دى - بمعنى ان ممكن جدا قطعة غيار تركب فى عربيتين متصنعين فى شركتين مالهومش علاقة ببعض زى مثلا ميتسوبيشى وجيب ممكن تلاقى نفس القطعة ليها ٢ بارت نمبر مختلفين وده ناتج من ان قطعة الغيار متصنعة فى شركة تالتة متخصصة فى حاجات معينة ممكن تركب على كذا عربية من ماركات مختلفة زى مثلا الفلاتر وطلمبات البنزين والايرباج والبوجيهات ليهم شركات متخصصة بتنتج حاجات تركب فى عربيات كتير فحتلاقى كل شركة سيارات منزلاها بالبلرت نمبر الخاص بيها وعليها علامة شركة العربيات مش علامة الشركة المصنعة لان شركات السيارات عبارة عن محطات تجميع وبتصنع بس بعض اجزاء السيارة مش كلها - حتى الموتور حتلاقى الشركة بتاعة العربية مصنعة اجزاء فيه مش مصنعاه كلة زى مثلا انظمة الوقود والاشعال حتلاقيها فى عربيات كتير من شركة بوش - الايرباج حتلاقيها فى عربيات كتير من شركة تاكاشا اليابانية.
اللى بيفرق بس فى قطعة الغيار هو السيريال نمبر بمعنى انك ممكن تلاقى البارات نمبر بتاع مليون قطعة غيار هو هو بس مش ممكن تلاقى سيريال نمبر لقطعة غيار متكرر بيبقى عامل زى رقم الشاسية - بس المشكلة ان مش كل قطع الغيار حتلاقى عليها سيريال نمبر نظرا لصغر حجمها او لاى سبب اخر .
فيه على العلبة بتاعة قطع الغيار باركود وده ليه جهاز بيقراه هو اللى بيطلع كل المعلومات الخاصة بقطعة الغيار دى من حيث اسمها والبارت نمبر والسيريال نمبر كمان وفيه برنامج بينزل على التليفون المحمول بيقدر يعمل سكان للباركود ويترجمه للمعلومات اللى بتعرف بيها ايه قطعة الغيار دى والارقام بتاعتها بس لسه البرنامج مش بيقدر يطلع كل حاجه انت عاوزها ولكن بيتطور .
مشكلة قطع الغيار اصلية ولا لا التجار بقوا بيضربوا كل حاجه فى الصين حتى العلب والباركود والارقام فمن الصعب على المواطن العادى انه يقدر يفرق بين الاصلى والمضروب - الا لو قارنت بين قطعتين عليهم سيريال نمبر ولقيت الرقمين متشابهين يبقوا مضروبين بس مين بيعمل كده ؟؟؟؟ وكمان مش كل قطع الغيار عليها سيريال نمبر - الموضوع صعب جدا للاسف .

فعلا ... المسألة صعبة جدا... حتى على المتخصصين.

عموما.. مسألة السيريال نمبر بتتعمل أساسا علشان مشكلة التعقب (traceability) .. يعني لو حصل أي مشكلة من المنتج فصانع المنتج بيقدر يعرف المنتج ده إمتى اتعمل ومين اللي اشتغل فيه وإيه المعدات اللي أنتجته وإيه المكونات اللي دخلت فيه.. إلى أخره من المعلومات اللي بيحتفظ بيها الصانع.

ولتقليل مسألة اللخبطة بين السيريال نمبر والبارت نمبر.. فالسيريال نمبر بقى بيتعمل بشكل الباركود.. وأحيانا QR Code..




الصورة دي مثلا لطقم بوجيهات .. كلهم ليهم نفس البارت نمبر... بس مفيش باركود زي التاني.




المشكلة بقى لما تيجي تشتري قطعة غيار واحدة.. مش هتقدر ساعتها تقارن بين القطعة والتانية.


بعض الشركات بتحط علامات مميزة علشان تميز المنتج الأصلي عن المنتج المضروب..

ده غير شركات تانية زي تويوتا مثلا بتعمل توعية للمستهلك عن علامات المنتج الأصلي.. وتويوتا من أكتر الشركات اللي بتعاني من موضوع قطع الغيار المضروبة دي..


ده موقع ناشره أحد موزعي تويوتا في الفلبين بيوضح الفرق بين قطع الغيار الأصلية والمضروبة:

Anti-Counterfeit Campaign | Toyotaa Abad Santos - The Dealer of Choice!


عموما.. جرب اعمل سيرش بالجملة دي.. How to Detect a Counterfeit auto Parts.. وممكن تحط معاها اسم الماركة اللي انت عايزها.. وغالبا هتلاقي معلومات من الشركة الأم.


...