| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
صفحة 1 من 8 1 2 3 4 5 6 ... الأخيرةالأخيرة
النتائج 1 إلى 10 من 75

  1. #1

    الصورة الرمزية borio1704

    رقم العضوية : 105306

    تاريخ التسجيل : 26Jun2011

    المشاركات : 3,844

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    Lightbulb إمتى تغير زيت الموتور؟؟؟ - Facebook Twitter whatsapp انشر الموضوع فى :

    hasad">


    تغيير الزيت من الحاجات اللي عاملة لخبطة لناس كتير... والإفتاءات وشغل التسويق له دخل كبير في اللخبطة دي..

    علشان كده هحاول أشرح الأسس الصحيحة لأسباب تغيير الزيت واختيار مواعيده... لإن تغيير الزيت من أهم الحاجات اللي بتحافظ على الموتور بحالة كويسة.



    أعتقد ناس كتير سألت الأسئلة دي:

    - هو المفروض نغير الزيت إمتى؟؟
    - العربية اللي ما بتتحركش إلا مسافات قليلة خلال السنة تغير الزيت كل كام كيلو؟؟؟
    - إيه اللي يحصل لو ما غيرناش زيت الموتور؟؟.. وهل فيه ضرر لو الزيت ما اتغيرش لمدة زمنية كبيرة؟؟


    إن شاء الله هنحاول نجاوب على الأسئلة دي كلها...


    طبعا.. ناس كتير بتغير زيت الموتور لما لونه يتغير... وناس تانية بتشوف لزوجة الزيت في إيديها عاملة إيه.. وناس غيرهم بيبقوا مركزين مع صوت الموتور...

    المشكلة إن الزيت ما بيتغيرش بأي طريقة من دول....

    والحقيقة موضوع تحديد معاد تغيير الزيت يعتبر شيء معقد شوية.. لإن الزيت نفسه مكون من مواد كتير ومطلوب منه يعمل حاجات كتير... وعلشان تحدد العمر الحقيقي محتاج تعرف مدى تأثر الزيت بالحرارة والضغط والرطوبة والشوائب المختلفة اللي بتطلع من الموتور.

    والعملية دي محتاجة اختبارات في معامل متخصصة.. ونتائج الاختبارات دي بتحددلك عمر الزيت فعلا وكمان تديك فكرة واضحة عن حالة موتورك.



    المشكلة إن الاختبارات دي غالية جدا .. بالإضافة إلى إن المعامل نفسها مش متاحة إلا للمتخصصين.. فمش معقول إني ادفع 100-200 جنيه مثلا في زيت معدني.. وادفع أضعافهم اختبارات.

    وفيه شركات ومعامل بتبيعلك تحاليل بسيطة شوية وتديلك نتائج مبدئية.. بتبعتلهم عينة الزيت من عندك ويبعتولك النتيجة... بس بردو ما زالت أسعارها كبيرة (ما بين 25-40 دولار للمرة الواحدة).. وده تقريبا ثمن غيار الزيت نفسه.

    يعني تغير الزيت وتدفع قد ثمنه اختبار... !!!


    طيب نعمل إيه؟؟؟


    بما إن معظمنا غير متخصص.. فاحنا محتاجين نعرف شوية حاجات بسيطة تخلينا نحافظ على عربياتنا بدون الدخول في تفاصيل معقدة وتلخبط...



    أول حاجة لازم نعرفها ...

    المرجع الأساسي في مواعيد تغيير الزيت هو كتالوج العربية..


    للأسف.. أغلب الناس بتصنف زيوت المحركات بطريقة الـ3000 والـ5000... على أساس إن الزيت الـ3000 بيتغير على 3000 كيلومتر و الـ5000 نفس الكلام.

    وفيه بعض الناس بتفضل تشتري زيت 3000 وتغيره على 2000 كيلومتر كمان !!!!

    يا جماعة .. مفيش حاجة اسمها زيت 1000 و 3000 و 5000 و 10000... كل الزيوت بتعيش المدة المطلوبة في الكتالوج على الأقل... المهم تختار الزيت صح..

    يعني لو توصيات الكتالوج طلبت زيت بمستوى معين ما ينفعش أبدا أبدا تحط زيت مستوى أقل منه.... حتى لو هتحطه لمدة أقل.

    على فكرة... توصيات الكتالوج حتى في العربيات القديمة من 50 سنة كانت بتوصي بتغيير الزيت على 10 آلاف كيلومتر... مع إن الزيوت أيامها كان مستواها أقل بكتير من دلوقتي... وأغلب الزيوت القديمة تقدر تعتبرها في مستوى الزيوت اللي بيسموها دلوقتي "3000" أو يمكن أقل.

    علشان كده ... تغيير الزيت بنظام الـ3000 أو الـ5000 ده فيه غلط كبير لإنه :
    1- فيه ضرر على موتورك ..علشان مش بتستخدم الزيت المناسب لموتورك.
    2- فيه إسراف لتغيير الحاجة قبل معادها.. يعني بترمي فلوسك على الأرض.
    3- ضرر للبيئة.. لإنك بتستنزف موارد أكتر من اللازم.. وكمان بترميها ومحدش بيستفيد منها.
    لو عايز تعرف إزاي تختار الزيت المناسب... ارجع للموضوع ده: http://www.nilemotors.net/Nile/341680-a.html


    طيب ما دام كل الزيوت بتعيش في الموتور نفس المدة.. إيه بقى اللي يفرق الزيوت الـ3000 عن الـ5000 مثلا؟؟؟

    الحاجة الأساسية اللي بتفرق بينهم هي زيت الأساس.. اللي بيضاف عليه كل الإضافات علشان تحسن من خواصه..

    فيه زيوت أساس مليانة شمع وشوائب... وزيوت تانية نقية .. وزيوت ثالثة بتستحمل درجات الحرارة العالية قوي والمنخفضة جدا.. والحاجات دي مش بتفرق في مدة بقاء الزيت (إلا في بعض أنواع الزيوت التخليقية فقط)... إنما بتفرق أساسا في كفاءة التزييت والحفاظ على الموتور في أفضل حالة..

    لو عايز تعرف الفرق بين أنواع زيوت الأساس.. ارجع للموضوع ده: http://www.nilemotors.net/Nile/453047-a.html



    تاني حاجة لازم نعرفها...

    المواعيد دي تعتبر وقائية علشان الموتور يفضل شغال بكفاءة عالية...


    يعني إيه وقائية؟؟

    يعني الكتالوج بيقول مواعيد ممكن تبقى بدري شوية عن الواقع... فلو الكتالوج بيقوللك غير على 5000 كم... ده معناه إن الزيت غالبا هيقعد لحد 6000 أو 7000 كم بدون مشاكل.

    بس الأهم من كده.... إن الـ6-7 آلاف دول مش هيحصلوا إلا في حالة استخدام زيوت بنفس مواصفات الزيت الموصى بيه في الكتالوج... أو أحسن منها.



    تالت حاجة..

    ميعاد تغيير الزيت مش بيتحسب بالمسافة المقطوعة بس...


    مواعيد تغيير الزيت بتتحسب بأحد طريقتين:

    بالمسافة المقطوعة.. أو بالمدة الزمنية... أيهما أسبق..


    إزاي؟

    ببساطة... ارجع لكتالوج عربيتك... هتلاقي جدول الصيانة مكتوب فيه مدد التغيير لكل شيء... ودايما هتلاقيه كاتب بالطريقة دي على سبيل المثال:
    12000 كم / 6 أشهر
    36000 كم / 18 شهرا
    120000 كم/ 60 شهرا

    فلو بتمشي بالعربية كتير.. يبقى احسب التغيير كل 5000 كيلو (أو حسب ما الكتالوج يقوللك)...

    ولو بتمشي بالعربية قليل.. يبقى تحسب التغيير كل 6 شهور (أو حسب ما الكتالوج يقوللك بردو)..


    بعض السيارات بتبقى مجهزة بأجهزة بتحسب عمر الزيت بناء على طريقة سواقتك والحمل الحراري اللي الزيت اتعرضله.. بغض النظر عن المدة الزمنية أو عدد الكيلومترات المقطوعة..



    والعربيات اللي فيها الخاصية دي بتريح صاحب العربية جدا وتديله فكرة عن أداء الزيت الفعلي اللي حطه.. وفي أوقات كتير تقدر تمشي مسافات توصل لحد 15 ألف كيلومتر بزيوت معدنية (بشرط تكون مطابقة لمواصفات الكتالوج) ... بس في المقابل سعر العربية بيبقى أغلى بدون شك.



    يعني مفيش أي استثناء لموضوع الكتالوج ده؟؟؟؟؟؟؟


    الحالة الوحيدة اللي نقدر نخالف فيها تعليمات الكتالوج إننا نستخدم زيت تخليقي "حقيقي" ويكون من ضمن بيان المواصفات بتاعته جملة بتقول بكل وضوح إن الزيت بيعيش في الموتور أكتر من 10 آلاف كيلومتر.

    والحالة دي نادرة جدا في عالم زيوت السيارات... ويمكن من أشهر الماركات اللي بتحدد عمر الزيت التشغيلي بأكتر من 10 آلاف كيلومتر هي "آمسويل".. وده في بعض زيوتها فقط.. مش كلها.

    ده مثال لجزء من المواصفات في أحد زيوت آمسويل... وبيحدد بوضوح عمر التشغيل للزيت (ودي نادرا لما ماركة زيت بتحطها).. ومع ذلك بيحط استثناءات وحالات معينة ما يضمنش فيها التشغيل طول الفترة دي.




    دي الحالة الوحيدة.. غير كده.. نمشي مع الكتالوج..


    على فكرة.. أغلب كتالوجات السيارات بتنصح بتغيير الزيت عند 10 آلاف كم أو 6 شهور... بس ده في حالة القيادة المثالية (الكتالوج بيسميها "عادية")... اللي فيها تشغيل للسيارة كل يوم لمشاوير طويلة في شوارع رايقة ومستوية والجو ربيع وبسرعات ثابتة ما تزيدش عن 120 كم/س من غير تحميل للعربية بأي أوزان تقيلة أو قطر لسيارات أخرى.


    طبعا ده ما بيحصلش مع حد فينا...


    علشان كده.. اللي بيحصل معانا ده بيسموه حالات القيادة الشاقة (للزيت)... وهنا كل الكتالوجات بتقوللك غير الزيت بسرعة.. غالبا على نص المدة الأصلية (يعني 5000 كم أو 6 شهور).

    ومن الكلام اللي فوق ده.. أغلب كتالوجات العربيات بتحدد حالات الاستخدام الشاق (للزيت) كالتالي:

    • القيادة في الزحام
    • مشاوير قصيرة (أقل من 8 كيلو في الجو العادي.. و16 كيلو في الجو البارد المتجمد).
    • تدوير متكرر للسيارة على البارد خلال اليوم (تدويرها بعدما تبرد تماما).
    • القيادة في جو متطرف (بارد جدا تحت الصفر.. أو حار جدا فوق الـ35°م).
    • القيادة في جو مغبر (الخماسين مثلا).
    • القيادة في الرمل أو الطين.
    • ترك السيارة على السلانسيه لمدد طويلة.
    • أحمال عالية أو قطر سيارات أخرى أو القيادة على طرق مائلة للأعلى.
    • تدوير المحرك على دوران عالي لمدد طويلة.


    لو عندك أي حالة من دول بتتكرر كتير.. يبقى لازم تغير الزيت بدري..


    رابع حاجة ...

    لا يمكن تكون توصيات الكتالوج غلط

    تأكد إن مفيش صانع سيارات في العالم هينصح بشيء في الكتالوج ويكون عنده مجرد شك إنها ممكن تسبب مشاكل.. وفي الآخر لو العربية جرالها حاجة بسبب توصياته فده أكيد هينعكس على سمعة ماركة العربية ويأثر على مبيعاتها.

    وتأكد كمان إن صانع السيارة هو أدرى واحد بأفضل أسلوب للتعامل مع سيارته.. ولو مشيت على تعليماته فانت بتحافظ على عربيتك لأطول فترة ممكنة.


    ولسه هنكمل في المشاركة الجاية.....


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  2. #2

    الصورة الرمزية borio1704

    رقم العضوية : 105306

    تاريخ التسجيل : 26Jun2011

    المشاركات : 3,844

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    افتراضي -


    واحدة من الحالات اللي أغلب الناس مش متخيلة إنها حالة شاقة على الزيت هي "المشاوير القصيرة"..


    ليه المشوار القصير يعتبر حالة شاقة؟؟؟


    طبيعة تشغيل الموتور إن الاحتراق داخل السلندر بينتج عنه غازات (العادم).. والعادم بطبيعته إنه ناتج احتراق.. يعني عبارة عن ثاني أكسيد الكربون + بخار مية...

    والطبيعي كمان إن إحكام قفل السلندر بالشنابر مش بيكون 100%... بمعنى إن طبيعي جدا نلاقي جزء من الغازات دي بيهرب من الشنابر ويدخل جوه البلوك..



    المشكلة بقى في الاستخدام البسيط أو بتاع المسافات القصيرة إن الموتور بيشتغل ولسه خلوصاته ما أخدتش وضعها الصحيح لإنه لسه بارد... أو بمعنى أصح.. لسه ما سخنش كفاية... وبالتالي ممكن جزء من العادم يدخل إلى الكارتير ويكثف ميه هناك..

    ووجود بخار المية في الزيت بيأكسد الزيت ويقلل عمره بشدة... وممكن التكثيف يكون كتير لدرجة إن الزيت يعمل طحينة... بالذات عند غطا الزيت فوق.



    لو العربية اشتغلت لمسافات طويلة نسبيا .. الموتور بيكون سخن كله والزيت كمان بقى سخن وبخار المية المتكثف يتبخر تاني ويخرج من فتحة النفس(pcv) ... فما يفضلش عندك بخار جوه الموتور.



    لو عايز معلومات أكتر.. تقدر ترجع للموضوع ده

    http://www.nilemotors.net/Nile/418186-a.html


    طيب إيه اللي ممكن يحصل لو الزيت ما اتغيرش في معاده؟؟


    علشان نجاوب على السؤال ده لازم نعرف إن الزيت بيتكون من حاجتين.... زيت أساس + إضافات.

    والحقيقة إن الإضافات هي اللي بتعمل الفرق بين الزيوت وبعضها... مع إن نسبتها قليلة ولا تتجاوز الـ20% من إجمالي حجم الزيت.

    بالبلدي كده نقدر نعتبرها زي البهارات في الأكل.. هي اللي بتدي الطعم.


    المهم..


    مشكلة الإضافات بشكل عام إنها بتتأثر بالحرارة والرطوبة والضغط والوقت كمان.. وبالتالي ليها عمر افتراضي قبل الاستخدام (اللي بيبقى مكتوب على عبوة الزيت قبل الفتح).. وعمر فعلي بعد الاستخدام (اللي بنغير الزيت عنده).


    طبعا.. لما الإضافات بتبوظ... الزيت ما بيأديش المطلوب منه كما يجب.. ويرجع مجرد زيت بدائي زي زيت الأساس.

    وده ممكن يسبب كذا حاجة:

    1. الزيت مش هيبقى متعدد اللزوجة وهيبرجع خفيف... لإن إضافات تحسين اللزوجة بتزود لزوجة الزيت لما يسخن.. وبالتالي طبقة التزييت هتبقى خفيفة جدا ومش هتدي الحماية المطلوبة.. يعني تآكل عالي لكل الأجزاء المتحركة.

    2. الزيت مش هينظف الموتور ولا هيشيل الترسبات... علشان إضافات التنظيف استهلكت

    3. صوت الموتور ممكن يعلى.. علشان إضافات تخفيض الصوت انتهى عمرها.


    دي حاجة..

    الحاجة التانية.. إن بعد ما الإضافات بتبوظ.. زيت الأساس نفسه (المعدني غالبا) هيبدأ يتأكسد مع الحرارة العالية ويعمل ترسبات طينية جوه الموتور.. بيسموها بالإنجليزي Sludge.





    الترسبات دي عاملة بالضبط زي الزيوت الي بنشوفها على حيطان المطابخ القديمة... وإزالتها صعبة جدا.

    المشكلة إنها لما بتحصل في الموتور بتبقى لزجة جدا وممكن تسبب انسداد في مجاري الزيت وفلتر الزيت... وده لما يحصل تبقى دورة التزييت في الموتور تعتبر مش موجودة...




    ونتيجة الكلام ده هي دمار الموتور بشكل كامل... لإن كل أجزاء الموتور حصل فيها تآكل.


    دي صورة للفرق بين موتور بيغير الزيت في مواعيده وموتور تاني ما بيغيرش.





    حاجة كمان...

    لو فرضنا إن الزيت كان كويس وقعد الفترة بتاعته كلها تمام (10 آلاف كم مثلا) ومفيش حاجة حصلتله... بس قلنا نغير على مدة أطول (15 ألف كم مثلاً) ... إيه اللي ممكن يحصل؟؟


    أكبر مشكلة هي إن الزيت هيكون متوسخ بالشوائب والمواد المعدنية (رايش الموتور).. والمواد دي بتبقى عاملة زي الصنفرة وبتعمل تآكل في الأجزاء المتحركة وتضطر تعمل عمرة بدري.


    ومع إن فلتر الزيت مهمته إنه يحجز الشوائب دي.. إنما ممكن بعض الشوائب الصغيرة جدا تعدي منه..
    أو ممكن حتى الفلتر يتسد بسبب كتر الشوائب... ودي مصيبة أكبر.


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  3. #3

    الصورة الرمزية م/أحمد عبد الفتاح

    رقم العضوية : 29225

    تاريخ التسجيل : 05Jan2009

    المشاركات : 1,362

    النوع : ذكر

    الاقامة : الإسكندرية

    السيارة: لايوجد

    السيارة[2]: Jeep KK 2009

    الحالة : م/أحمد عبد الفتاح غير متواجد حالياً

    افتراضي -

    موضوع شيق جدا ومهم جدا جدا

    amadios سابقا


  4. #4

    الصورة الرمزية tasaka

    رقم العضوية : 173494

    تاريخ التسجيل : 24Mar2015

    المشاركات : 2,674

    النوع : ذكر

    الاقامة : egypt

    السيارة: none

    السيارة[2]: Speranza a620 2010

    الحالة : tasaka غير متواجد حالياً

    افتراضي -

    موضوع جميل يستكمل سلسله المواضيع الرائعه لزيوت الموتور من استشارى منتدانا العزيز المهندس بوريو

    تحياتى و اعزازى


  5. #5

    الصورة الرمزية gadoo30

    رقم العضوية : 25063

    تاريخ التسجيل : 13Nov2008

    المشاركات : 586

    النوع : ذكر

    الاقامة : القاهرة

    السيارة: افيو 2006

    السيارة[2]: دوجان 1996

    الحالة : gadoo30 غير متواجد حالياً

    افتراضي -

    معلومات جميلة بشكل مبسط سهل الفهم
    تسلم ايدك يا باشمهندس برعى


  6. #6

    الصورة الرمزية ahmedz310

    رقم العضوية : 72041

    تاريخ التسجيل : 01Jun2010

    المشاركات : 539

    النوع : ذكر

    الاقامة : شرم الشيخ

    السيارة: Rio EX DAB & ABS

    السيارة[2]: كيا كارينز 2011

    دراجة بخارية: لا

    الحالة : ahmedz310 غير متواجد حالياً

    افتراضي -

    مبدع كالعادة :)
    انا حالياً بستخدم Amsoil Signature المتوافق مع الكتالوج
    وناوي اغيره علي 20000 كم (بس هغير فلتر في النص) او سنة (ايهما اقرب) رغم ان الكتالوج بيقول 10000كم او 6 شهور ايه رأيك يا كبير!؟
    ياريت يبقي فيه موضوع بأهم اختبارات ال ASTM اللي اكيد بتميز نوع زيت عن التاني حتي لو الاتنين نفس اللزوجة والمواصفات


  7. #7

    الصورة الرمزية borio1704

    رقم العضوية : 105306

    تاريخ التسجيل : 26Jun2011

    المشاركات : 3,844

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    افتراضي -

    اقتباس المشاركة الأصلية كتبت بواسطة ahmedz310 مشاهدة المشاركة
    مبدع كالعادة :)
    انا حالياً بستخدم Amsoil Signature المتوافق مع الكتالوج
    وناوي اغيره علي 20000 كم (بس هغير فلتر في النص) او سنة (ايهما اقرب) رغم ان الكتالوج بيقول 10000كم او 6 شهور ايه رأيك يا كبير!؟
    ياريت يبقي فيه موضوع بأهم اختبارات ال ASTM اللي اكيد بتميز نوع زيت عن التاني حتي لو الاتنين نفس اللزوجة والمواصفات

    بالنسبة لزيت آمسويل سجنتشر بالذات.. فمعندكش أي مشاكل في موضوع الـ20 ألف ده أو السنة... لإن كتالوج الزيت نفسه بيقوللك كده..

    تقدر تتأكد من هنا.. http://www.amsoil.com/lit/databulletins/g2880.pdf

    ولو تاخد بالك من الموضوع الأصلي .. أنا كاتب نفس المعنى.. إن دي الحالة الوحيدة اللي بنخالف فيها الكتالوج لما الزيت نفسه يقول بصراحة إنه بيقعد مسافة أو مدة معينة.



    وبالنسبة لاختبارات الـASTM.. إن شاء الله أعمل موضوع عنها... بس مش عايز أخلي المستخدم العادي يتلخبط لإن الاختبارات دي متخصصة جدا وتفاصيلها مزعجة... ده غير إن مواصفاتها مش متاحة للناس العادية.

    وبيني وبينك.. أنا عايز أفهمها كويس أنا الأول


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  8. #8

    الصورة الرمزية ahmedz310

    رقم العضوية : 72041

    تاريخ التسجيل : 01Jun2010

    المشاركات : 539

    النوع : ذكر

    الاقامة : شرم الشيخ

    السيارة: Rio EX DAB & ABS

    السيارة[2]: كيا كارينز 2011

    دراجة بخارية: لا

    الحالة : ahmedz310 غير متواجد حالياً

    افتراضي -

    طب مش غريبة ان زيت بترومين 5w30 A-1 يكون تخليقي بالكامل من اساس غير معدني زي امسويل سجنتشر وفي نفس الوقت مش بيتمتع بفترة تشغيل طويلة زيه وكمان حاصل علي رقم TBN اقل كتير
    تقريباً 7 مقابل 12.6 ل امسويل سجنتشر


  9. #9

    الصورة الرمزية ahmedz310

    رقم العضوية : 72041

    تاريخ التسجيل : 01Jun2010

    المشاركات : 539

    النوع : ذكر

    الاقامة : شرم الشيخ

    السيارة: Rio EX DAB & ABS

    السيارة[2]: كيا كارينز 2011

    دراجة بخارية: لا

    الحالة : ahmedz310 غير متواجد حالياً

    افتراضي -





  10. #10

    الصورة الرمزية ahmedz310

    رقم العضوية : 72041

    تاريخ التسجيل : 01Jun2010

    المشاركات : 539

    النوع : ذكر

    الاقامة : شرم الشيخ

    السيارة: Rio EX DAB & ABS

    السيارة[2]: كيا كارينز 2011

    دراجة بخارية: لا

    الحالة : ahmedz310 غير متواجد حالياً

    افتراضي -

    hasad">

    فيه حاجة كمان بخصوص كود ال ACEA
    بترومين مكتوب عليه
    meets the requirement of
    وبالتالي مش مذكورة في الداتا شيت

    عكس امسويل سجنتشر اللي موافقة الكود فيه صريحة



 
صفحة 1 من 8 1 2 3 4 5 6 ... الأخيرةالأخيرة

المواضيع المتشابهه

  1. إمتى تغير كاوتش العربية !!!!!!
    بواسطة م/أحمد عبد الفتاح في المنتدى المنتــــــدى العـــــــــــام للسيــارات
    مشاركات: 25
    آخر مشاركة: 04-09-2016, 04:05 PM
  2. تغير زيت الموتور
    بواسطة matrix012 في المنتدى دايــو+شيفرولية لانوس
    مشاركات: 6
    آخر مشاركة: 29-12-2015, 01:09 PM
  3. تغير الموتور
    بواسطة zizomami في المنتدى أوبـــــل
    مشاركات: 2
    آخر مشاركة: 30-12-2012, 11:50 AM
  4. تغير صوت الموتور
    بواسطة نينو في المنتدى شــيفـرولــيه
    مشاركات: 3
    آخر مشاركة: 07-02-2012, 05:15 PM
  5. إمتى نروح التوكيل و إمتى نروح برة
    بواسطة ahmedtr9989 في المنتدى ريــــنو
    مشاركات: 9
    آخر مشاركة: 23-06-2011, 08:08 PM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2