ممكن حد يساعدنى محتار بين جيلى امجراند 7 مانيوال 2016 او byd f3 2017 او اسبرانزا انفى 2017 حيره غريبه
عرض للطباعة
ممكن حد يساعدنى محتار بين جيلى امجراند 7 مانيوال 2016 او byd f3 2017 او اسبرانزا انفى 2017 حيره غريبه
سلام عليكم .أخي فيليب السيارة جيلي ام جراند ممتازة وهي معي منذ ٢٠١٤ من الزيرو عدادها ٣٥ ألف كيلو بعد فيرنا زيرو ٢٠١٢ وكانت ممتازة وقيد تقديري جيلي أفضل من فيرنا في عدة أشياء مثل المحرك . وزن السيارة وثباتها . قوة الفرامل . الوسائد الهوائية . سعة صالون السيارة والشنطة . لكن يعيبه عدة أمور قد لا تكون من وجهة نظري عيوب في السيارة من حيث كفاءتها مثل التكييف ضعيف نسبيا (وجهة نظري .البعض يراه مناسب )الكاسيت وهو رديئ جدا .بعض الأمور مثل لصق جوان الزجاج الأمامي وهي أمور يمكن حلها في التوكيل بسهولة ولا تؤثر في تقديري على قرار اختيار السيارة .وقد قصدت عقد المقارنة بين فيرنا لانك قد تكون بحكم انتشارها على دراية بها ولعدم معرفتي بالبي واي دي او اسبرنزا وان كنت أميل لشكل الإم جراند لكنها أذواق تختلف من شخص لآخر . موفق ان شاء الله.تحياتي
الانفي كويسة كرأي فقط
انا برده محتااار زيك ووالله ما عارف خصوصا ان فرق الثمن بين الاثنين حوال ١٩ الف جنيه
في المقابل ان ارتفاع الام جراند اعلى وده بيخليها عدم ثبات على الطىيق بالمقارنة بالانفي انها اكثر ثباتا
صالون الجيلي ام جراند فخم جداا ولونه الفاتح يحسسك براحة نفسية عن الانفي غامق
ظهر الكنبة الخلفية في الانفي حتة واحدة على عكس الجيلي قطعتين
مكان تخزين العدة والكوريك في الجيلي اجمل من الانفي
كذلك يوجد ٢ لمبة صالون في السقف للجيلي عن الانفي لمبة واحدة في السقف
الجيلي يوجد بها اربع سماعات و٢ تويتر والانفي سماعتين فقط و٢ تويتر
الجيلي مافيهاش فوج لايت امامي لموديل ٢٠١٧ اما الانفي فيها فوج لايت امامي
كل ده كووم والناس ملاك الانفي بيشكرو في اداءها جدا واعتماديتها عن الجيلي خصوصا في الفتيس
سمعت ان موتور الانفي زي موتور الزيتك بتاع الفورد.. بالاضافة ان دائرة التبريد مصممة للانفي انها متسخنش نهائي ولذلك هي نازلة بدون مؤشر بنزين زي بعض موديلات التويوتا اللى مواتيره مبتسخنش نهائي
ويظل التفكير عندي معلق ومش عارف اخد قرار هل اجيب الجيلي ام الانفي خصوصا ان الفرق ١٩ الف في المقابل ان العائد اللى هيدخل منها واحد للاثنين لو شغلتها
برجاء النصيحة للى ركب الاثنين وجربهم
انا هقول راى بسيط فى اختبارات التصادم الاوربى نجحت الانفى والتيجو وحصله على موافقة الاتحاد الاوربى والاميجراند 7 كانت خلفهم بنجمه بمعنى الانفى عربيه قويه ؟اما موتور الانفى الزيتك 480 اسكورت اسمه كده وده موجود فى الشيرى a11وa15 وطبعا فرق وش السلندر من 8صباب للقديم والانفى 16 والمحرك ده موجود فى موديلات كتير للشيرى وهو اساسا محرك انتاج شركةفورد موجود فى الفورد اسكورت مو98 كاربراتير انتاج مصنع فورد فى انجلترا وممكن تدخل قسم الشيرى وتعرف معلومات كتير عن المحرك ؟؟؟؟؟اما الاميجراند 7 موجوده عند خالت المدام وبتقول قطع غيارها غاليا وغير متوفره غير فى التوكيل المشكله التانيه البارومه او الصداء ظهر فى الباب من تحت وعند شنبر البرابريز بدئت البارومه وفى مشكله فى الجنوط مع المطبات الكتير صعب ظبطها فى الترصيص وطبعا التكييف ضعيف وانا ركبت دى والانفى لمرسى مطروح فى طريق العالمين العربيه ثابته لحد 160 وطبعا انا بخاف من السرعات الكبيره مع انى فى الاصل ميكانيكى وكنت مجنون سرعه لكن بعد 45 سنه بسابق السلحفه ؟ الانفى سافقه مربحه فيها كل اللى انتى محتاجه موتور قوى عربيه وزنها 1300 كيلو تكييف على 2 وكنت بردان وشنطه كبيره شايله حجات مصيف وكانت فيها حماتى بجوارى من الوزن التقيل ودمها عسل على قلبى طول السكه وانا فى سعاده :crying2:حتى ال 15 يوم عده كانهم جبل تقيل اهم حاجه الاولاد اتبصته وطبعا المدام وابنى شاب وبنتى واختى وابنها والله حموله تقيله لكن العربيه بصراحه تستحق الفلوس دى تجربتى مع الانفى وربنا يوفق الجميع ؟
جزاك الله خيرًا اخي على النصيحة
أنا اشتركت في جروب انفي على الفيس بوك وبصراحة اتصدمت من كتر المشاكل إللي الأعضاء عمالين بيقولوا عليها أن العفشة بتدبدب ووحشة جدااا والمساعدين والبطاحات سيئة جداا والتكييف وحش لدرجة أن زميل في الجروب رماها عندهم في توكيل أبو رواش لمدة ستة أيام واتخانق معاهم وعمل اضراب عن عدم استلامها وبعد ما استلامها حلولوا كل المشاكل في العفشة والعربية دلوأتي بيشيد بآداء العفشة
انا والله محتااااار علشان والله الفلوس دي مش جاية بالساهل دي جاية بالدين والسلف
ياريت أراء أكثر يا جماعة
بص انا راى الشخصى
احنا لدينا 3 عربيات فى العيلة احدهم 60000 كيلو قابل بعض المشاكل وتحلت فى التوكيل بكل احتراف ( صدا - وتغيير تكييف كامل - ومشكلة فى الفتيس ) والتوكيل حلهم بصراحة وموش ناوى يغير العربية
انا عامل تقريبا 16000 والحمد للة بعض المشاكل وبصراحة اتحلت ( طرمبة باور - كباس فتيس )
العربية الثالثة مافيش مشاكل
مافيش عربية مافيش مشاكل بها بس غبور احسن من غيرة والعربية حققت انتشار فظيع وقطع الغيار متوافرة وستتوافر بعد الانتشار بتاعها
اتزان العربية على الطريق اكثر من رائع عفشة وفرامل ممتازة شكل ورفاهية رائعة
اعتقد انها صفقة رابحة ربنا يوفقك للخير
خلينا نتفق ان الصيني كله مشاكل فمبدأيا نبعد عن اي حاجه اتوماتك لان المانوال فيه مشاكل فمبالك بالاتو
اختبارات التصادم مش هاستخدمها في الحكم
لان للاسف اغلب العربيات الدارجة في مصر او اللي ليها شعبية فاشلة في الموضوع دا فانبعد موضوع الصاج والشاسيه او نجنبه في المقارنه وانت اختار اللي يجي على هواك لكن حكم السوق يهمك
احسنهم Byd بس مشكلتها التوكيل سيء جدا وبدأت تزيد مشاكل بعد تغيير الموتور لكن قطع غيارها متوافره وارخص من الجيلي والانفي وسوقها اعلى في المستعمل
بعدها جيلي امجراند ٧ عشان توافر قطع الغيار برا التوكيل اكتر
بعدها شيري انفي
الاتنين نفس الوكيل غبور احسن من الامل بس قطع الغيار والصيانه فيه اعلى واغلى من الامل
من حيث السوق بيحب f3 ثم الامجراند اكتر من الانفي
من حيث التوكيل افضلهم الامجراند لانها بنت غبور شرعي مع وجود حوارات برده في غبور .
لكن الانفي داخل مع غبور ابو الفتوح هتلاقي حوارات قدام بعد كذا الف كيلو هايقلك روح هنا لا مش موجود لا دا ضمان الجزأيه دي خلص
اسوأهم f3 شركة الامل لو عديت صيانتين خلال ٦٠ الف كم الاولى هاتخرج برا الضمان نهائي
من حيث انتشار ورخص اسعار قطع خارج وداخل الوكيل احسنهم f3 اقل سعرا واكثر انتشارا
ثم الامجراند جيدة الانتشار لكن سعر اعلى
ثم الانفي اقل انتشارا وزي سعر الامجراند ومقاربه ليها
الخلاصة : خليك في f3 او الامجراند
واستبعد الانفي لغاية ماتشوف السوق هايعمل معاها الا لو غاويها انت وهواك دخول غبور في الموضوع مديها تقله مع ان برده كتوكيل بيواجه مشاكل بس نتفق ان عندهم سيستم حلو ومعدات قوية وفنيين كويسين وخلينا نكون ايجابيين وعمليين افضل