الموضوع: فعلا صدق اللى قال ان السفر تساهيل

حكاية غريبه حصلت معايا قررت اسردها حتى يستفيد منها كل اللى ناوى يسافر مسافة طويلة بالسيارة
انا عندى سيارة اونو 94 ( مش مكيفة ) وقررنا زى كل سنه نروح الغردقه مصيف لان عندنا عمارة هناك
كتبت قائمة بالاشياء اللى عايز اعملها فى السيارة قبل السفر وبدأت انفذها فى اليوم السابق للسفر مع انى عارف ان اى اصلاحات لازم تتعمل قبل ميعاد السفر بأسبوع على الاقل علشان لو فى مشاكل تظهر خلال الاسبوع وتتظبط قبل السفر نفذت كل المكتوب فى القائمة ماعدا شراء فردتين كاوتش جداد لان الكاوتش الخلفى والاستبن ممكن يمشوا داخل القاهرة لكن فى السفر الطويل والتحميل مش ممكن وعدم شراء الكاوتش كان بسبب ظروف الوقت الذى لم يكفى لشراء كاوتش وقررت التحرك الساعة 3 فجرابعد النوم لمدة 3 ساعات زى كل سنة ونزلت فتحت السيارة وحملت الشنط واللوازم ونظرت للكاوتش الخلفى بعد التحميل بصراحة شكله يخوف لكن مفيش حل المهم اتحركت وبعد ما فولت بنزين نظرت الى الكاوتش مرة اخرى اترعبت قلت للمدام الحموله جامد جدا وشكلها كده الكاوتش ده مش هيكمل معانا ال500 كيلو متر ربنا يستر واتحركنا بعد صلاة قصيره وطلبنا من ربنا ان لو فيه مشكلة هتحصل يبقى يخليها تحصل قبل داخل القاهرة مش فى الصحراء وخصوصا انا معايا المدام و3 بنات اكبرهم 4 ابتدائى ووصلت الطريق الدائرى من عند السلام وفجاة توقفت بجانب الطريق وقلت للمدام انا خايف اكمل كده ايه رأيك قالتلى لف وارجع تلنى وغدا غير الكاوتش ونسافر فى امان إن شاء الله قلتلها فعلا نتأخر يوم ونرجع بعد كل الاستعداد ده افضل من المخاطرة وفعلا رجعت وانا راجع لقيت واحد بتاع كاوتش امام سوق القنال الدولى فاتح وعنده كاوتش جديد لكن معجبنيش الانواع اللى عنده وكملت ورجعت وعند البيت بالظبط بالظبط بالظبط
العربية بطلت لوحدها وفصلت كهرباء تماما ولا كونتاكت ولا انوار ولا اى حاجة شغالة نظرت للمدام وتنهدنا وقانا يااااه الحمد لله الف شكر ليك يا رب نرجع عشان الكاوتش تقوم الكهرباء تفصل كلها يعنى لو كنا جازفنا ومشينا كنا محدش يعرف وحتى لو كنا غيرنا الكاوتش قبل ما نسافر كنا طبعا سافرنا على طول وكانت حصلت المشكلة بالنسبة للكهربا انا من ضمن القائمة اللى نفذتها كان تغيير سير الدينامو ولما غيرت السير حصل خشونة شديدة فى بلى الدينامو وفعلا غيرت بلى الدينامو واتضح ان الولد اللى ركب الدينامو نسى يربط سلكة مش عارف الارضى ولا ايه فحدثت المشكلة
والحمد لله صلحت الدينامو وغيرت الكاوتش وسافرنا ورجعنا بالسلامة الحمد لله وعرفت فعلا ان السفر تساهيل لا هو ذكاء ولا فهلوة ولا سيارة جديدة ولا سيارة قديمه انا هو فقط توفيق من الله
وطالما ان الانسان بيتوكل على الله ميخافش ابدا ابدا
اوعى تعمل اى اصلاحات فى السيارة قبل السفر مباشرة
اسف جدا جدا للاطالة

حمد لله علي سلامتك بس ياريت معنتش تجازف تاني. عشان مش كل مرة تسلم الجرة.











______________
محمد عبدالله