ألف مبروك يا باشا و ربنا يباركلك فيه
التكييف لغاية 24 مفيش مشاكل حتى لو ينام بالليل فيه (هو اصلا مالوش مواعيد نوم) بس أهم حاجه الهواء مايكونش موجه ناحيته و تغطيه بغطاء خفيف.
العطس و الكحه و الزغطه كلهم طبيعيين في الأول , ماتقلقش.
يوم الأحد يتطعم BCG و تستلم الدفتر لو لسه ماستلمتوش.
و يرضع وقت ما هو عاوز و هو المفروض هيظبط مواعيده كمان 4 أسابيع و تكرعه بعد كل رضعه عشان مايجيلوش مغص و أهم حاجه الأم ماتزهقش من الرضاعه أو تقول إن اللبن قليل..... طبيعي جدا إن اللبن في الأول (لبن السرسوب) بيبقى خفيف لكن مع الاستمرار في الرضاعة بيبدأ إفراز اللبن يتحسن و الرضاعة تكون مرة من صدر و المره اللي بعديها من الصدر التاني.
و بعد اسبوع من الولاده تروح المستشفى اللي اتولد فيها يتطمنوا عيله و على وزنه و اٍسأل الدكتور لو يكتبلك نقط Vitamin D عشان العضم و نقط للمغص و كريم للتسلخات.
البراز طبيعي ان يكون لونه اصفر على برتقالي أو أخضر لكن مايكونش فيه دم (أحمر) أو أسود.
الطهارة يفضل في أول 40 يوم و مش لازم توديه لأستاذ كبير عشان هياخد فلوس على حاجه مش مستاهله.
و بلاش كل واحد ييجي يزوركم يشيله و يبوسه من خده عشان مايلقتش أي عدوي لا قدر الله.
لو عاوز أسامي دكاتره سواء للمتابعة أو للطهارة قول لي.
المفضلات