ايهما افضل عند البيع : ترش عربيتك عشان تبقى نضيفه ؟ ولا تسيبها مبهدله عشان الفبريكه ؟

**a raafat** · 30-07-2016 07:37 PM

السلام عليكم

دلوقتى يا جماعه وزى ما هو واضح من العنوان لو حضرتك هتبيع عربيتك الافضل تظبطها وترشها عشان تبقى نضيفه وتجيب سعر كويس ؟ ولا تسيبها معفنه ومبهدله بحجه انها كده فبريكه ؟
اللى خلانى اعمل الموضوع ده انى للحظه وانا عند الميكانيكى فكرت ابيع العربيه الشيروكى بتاعتى فسألته ياترى العربيه دى تعمل كام دلوقتى بحالتها دى ؟ كنت متوقع انه هيقولى من 42 ل 45 لقيته بيقولى 38 الف !اتصدمت وقولتله ليييييييييييييه ؟ ده انا لسه عامل عمره موتور كامله وبطاريه وكاوتش جديد وبتاع ازاى السعر ده ؟ قالى لانها محتاجه سمكره ودوكو
فبدأت افكر بقى هل فعلا ارشها عشان تجيب السعر اللى عايزه ده ؟ ولا اسيبها مبهدله على اساس انها كده فبريكه ؟

ياريت يا جماعه تقولوا رايكوا فى الموضوع ده

**م/أحمد عبد الفتاح** · 30-07-2016 10:27 PM

اللى يصدق إن عربية قديمة بقالها مثلاً ١٥ او ٢٠ سنة ماترشتش يبقى بيضحك على نفسه وبالذات فى العربيات الكبيرة زى الجيب واللى مقاسها لأن مساحة الكبوت والسقف بالذات كبيرة والشمس والاتربة بتأثر عليها بسرعة وبتلاقى البوية بتبهت أو تنقر - فحضرتك إحسب تكلفة الرش والسمكرة لو لقيتها حاتكلفك كتير ويبقى سعرها اكبر من المعروض فى السوق يبقى تبيعها على كده - وحاول تاخد رأى واحد تانى غير اللى قلك السعر ده

**رامي مصطفى** · 30-07-2016 11:55 PM

على حسب الحاله الخارجيه للعربيه
لو متبهدله اوي وخبطات وكده لازم تظبطها لأن الشكل العامما يشجعش المشتري
لو مش مخبطه والدهان حتى لو ضايع بس الصاج شكله محترم سيبها ع حالتها افضل
شوف انت شكل العربيه من بره.
بالتوفيق