الموضوع: مشكله ف طقم البيوجهات الجديد ؟!

ممكن تكون البوجيهات حصل فيه حاجة من الاتى :
- بوجيهات غير اللى راكبة فى العربية يعنى مختلفة وغير مناسبة للعربية - تاخد بوجيه قديم وتروح تجيب زيه بالظبط من حيث طول الشمعة بالذات ومتعتمدش على موديل العربية وتروح تشترى نظرى وممعاكش بوجيه قديم ودايماً احتفظ ببوجيه قديم معاك فى العربية علشان تشترى زيه ومتستناش لما تخلع القدام .
- ممكن يكون فيه سلك بوجيه اتركب مكان سلك بوجيه تانى .
- اللى ركب البوجيهات لعب فى الخلوص بتاع الالكترود وقفله شوية

أول حاجه إنك تعرف أرقام الاسطوانات بتاعة الموتور وهى بتبقى وانت فاتح الكبوت وباصص للعربية من قدام حتلاقى الترتيب من الشمال لليمين ١ -٢ - ٣ -٤ ( يعنى ١ دى ناحية الكرسى اللى جنب السواق)
بعد كده حاتمشى ورا السلك اللى طالع من البوجيه لغاية اوله (البوبينة أو الاسبراتير حسب عربيتك) حتخلعه وتنور بكشاف حتلاقى رقم الاسطوانة مكتوب على البوبينة أو غطا الاسبراتير جنب السلك حاتشوف هل رقم كل سلك داخل مظبوط على الاسطوانة بتاعته ولا لأ .

المشاركة الأصلية كتبت بواسطة tasaka

زى ما قال لك المهندس احمد .. بوجيهات موش بتاعتها .. او الفتحه موش مظبوطه

او ان عربيتك بتأخذ بوجيهات عاديه نيكل .. و انت اشتريت بلاتينيوم بدلها

الرعشه بتيجى مع الدوس الخفيف .. و لو دوست دوسه شديده دايما .. مفيش رعشه تحصل




سؤال للمهندس احمد

- كنت تحدثت عن مشاكل سلك البوجيه فى ردود ليك قبل كده .. ممكن نعرف ايه هى الاعراض اللى ممكن نعرف منها ان سلك البوجيه وحش

- انا وضعت بوجيهات بلاتينيوم بدل النيكل .. هل ممكن الاقى بوبينه مناسبه للبلاتينوم و سلك .. علشان تعطى كهربا كافيه ؟؟

- انا غيرت البوجيه الفابريكه و هو نيكل BKR6E-11 .. و استعملت بوجيه سن رفيع بلاتينيوم G-Power موديل BKR6EGP .. يعنى نفس الرقم و لكن فتحته 1 مم ( بدلا من 1.1 مم الاصلى ) .. ابتدأت رعشه تظهر من 1800 لفه حتى 2000 لفه .. لا توجد رعشه قبلها او بعدها

- انا عملت كده علشان الاستهلاك عندى رهيب .. 120 كم فى الصفيحه جوه اسكندريه فى زحمه خفيفه الى متوسطه .. العربيه عندى شبه زيرو ( 15 الف كم فقط ) اسبرانزا 620 موتور 2000 سى

تحياتى و تقديرى

علشان تعرف السلك بتاع البوجيهات كويس ولا لأ :
بعد إذن صاحب الموضوع معلش حانخرج شوية عن مشكلتك.
- أشهر طريقة سماع صوت زنة فى الراديو (تبان أكتر فى الراديو أكترمن الكاسيت أو السى دى) وبتزيد لما بتزود دواسة البنزين .
- ميس فاير وده بيحصل معاك .
- إستهلاك بنزين كبير وده بيحصل معاك .
- إحتمال إضاءة لمبة التشيك انجن.
طيب إزاى نعرف إن فيه سلك او اسلاك للبوجيهات مش كويسة :
- حانفك سلك واحد من البوبينة للبوجية ونطلعه بره العربية ونكشف على الكلبس اللى بيدخل فى البوجيه والكلبس اللى بيدخل فى البوبينة إنهم مايكونوش مجنزرين أو فيهم تاكل او واسعين (عن طريق بوجيه قديم ندخل السلك ونشوفه هل واسع على البوجيه ولا محكم)
- حانفحص السلك كويس على مجمل طوله بدقة ونشوف هل يوجد عليه اى اثر للهباب او كربون أو قطع أو تنيه أو متاكل نتيجه احتكاكه باى حاجه وهل الغطا اللى فى اول السلك واللى فى اخره كويس ولا مقطع ومهرى ومتاكل. وهكذا كل سلك نكشف عليه ونرجعه تانى مطرحه علشان الدنيا ماتتلخفنش.
- فيه طريقة تانية بس دى عاوزة ضلمة تماماً - تدور الموتور وتبص على اى شرارة حتبان معاك فى الضلمة يبقى السلك بيهرب. (ممكن تديها بخة ميه بالبخاخة بتاعة القزاز بس ده ممكن يكهربك :) فبلاش )
- فيه طريقة تانية لو لمبة التشيك انجن منورة بانك تحطها على السكان وتشوف الميس فاير مثلا P0301 يعنى ميس فاير فى السطوانة رقم ١ وبعدين تبدل سلك بوجيه رقم ١ اللى شاكين فيه مع سلك بوجية تانى مكان بعض بس التبديل يكون السلك كامل من البوبينة للبوجيه وتحطها على السكان تانى لو الميس فاير اتنقل معاك وبقى P0303 مثلاً يعنى الاسطوانة رقم ٣ (اللى نقلت ليها السلك اللى شاكك فيه ) يبقى السلك بايظ ولو فضل الميس فاير زى ماهو فى الاسطوانة رقم ١ يبقى السلك تمام.
بالنسبة لإنك تغير السلك بسلك أحسن من مصر ده شبه مستحيل والاحسن انك تشترى طقم من بره مصر إسمه performance ودى مش ماركة لكن توصيف بانه ليه اداء عالى وبيتركب على العربيات اللى بيعملوا بيها سباقات بلدى ( يعنى شوية شباب عاوزين يشدوا مع بعض :) ) فده بيحسن الاداء بتاع الموتور شوية ومن ضمن التعديلات الرخيصة غير طبعا عربيات السباق .
**** بس انت غيرت البوجيهات للبلاتينيوم وكمان الخلوص مش مناسب فممكن ده يكون زود معاك المشكلة - خلى بالك فيه عربيات مش بينفع معاها تكنلوجيا البوجيهات يعنى مثلا الجيب مابتاكلش غير مع البوجية اللى قطبه نحاس ولا بلاتينيوم ولا ايريديوم بينفع معاها :) - ولو ينفع تظبط الخلوص بتاع البوجيهات شوية وتوصله للمطلوب يكون احسن.