ازاى اروح المهاجرين فى عين شمس؟ وايه ظروف المواصلات العامة؟

السلام عليكم ورحمة الله وبركاته

اذا سمحتم انا نازل القاهرة فى شغل فى رمسيس وهاعمل مشوار على السكة فى سوق للأدوات الصحية فى عين شمس اسمه المهاجرين. والمفروض نازل من غير عربية ولو اتزنقت حاخد المترو فى ربع ساعة وكله تمام. بس واحد زميلى قالى انه يعتقد ان السوق دا بعيد قوى عن محطة المترو

هل حد يعرف السوق دا يقدر يوصفلى مكانه بالظبط؟
انا غالبا حاخد تاكسى لو معييش عربية لكن عايز بردو اعرف السكة لأن تاكسيهات القاهرة للأسف ميعرفوش البلد خالص.
وهل لو اتزنقت اركب مترو؟ ولا فى مواصلات تانية من وإلى رمسيس افضل واقرب من المترو؟

الفكرة ان انا رايح على حاجة صغيرة ملقتهاش عندى فى اسكندرية وملقيتهاش فى الفجالة. هل فى اسواق تانية اقرب لرمسيس؟

وشكرا مقدما

أفضل حاجة مترو الأنفاق أسرع وأرخص وأنضف
حضرتك هتركب مترو الأنفاق خط المرج وتنزل محطة عين شمس وتعدى الرصيف الناحية التانية تتمشى شوية لشارع عين شمس الرئيسى وعند الكنيسة هتلاقى ميكروباصات بتقول الجراج تركب مفيش دقيقتين بالظبط تنزل الزهراء عند المزلقان ، بقيت فى المهاجرين وأنت راجع تركب أى ميكروباص يوديك تانى محطة مترو عين شمس ، وإن شاء الله تلاقى طلبك وربنا يوفقك

متشكر جدا ياصديقى. ربنا يسهل المشوار