كود p0420

**yk_5** · 02-08-2016 02:57 PM

WJ 2001 V8
من حوالى اسبوعين العربية فى الدوارة بقت مش عجبانى يعنى لو ملقطتش من اول مرة وحاولت أدور تانى بقت بتغيييييب أوى عقبال ما تدور وبعد ما تدور مباشرة اسمع كأن فيه ميه بتجرى تحت العربية. ومن حوالى 5 أيام لمبة Check نورت وظهر كود P0420 دورت على النت كتير علشان اعرف تفسير الكود ده الناس حصرت الموضوع فى 4 احتمالات:
1-حساس شكمان من الإثنين اللى فى Bank1
2-علبة البيئة
3-رشاشات
4-طلمبة بنزين
منتظر عصارة الخبرات والخلاصة ... شكراً

**salam100100** · 02-08-2016 04:40 PM

هحاول اساعدك برغم انى مش خبير

موتور حضرتك V8, والكود بيقول Bank 1
دا معناها ان حساس الاوكسجين فال bank 1 بيدى قرائه غلط
Bank 1 دا رمز لمكان سيليندر رقم 1 فالشراره واعتقد دا فالناحيه الشمال

اصل عربيتك فيها اكتر من حساس اوكسجين (قبل وبعد علبه البيئه) وبردوا اعتقد انه عيب الحساس اللى فالشجره قبل علبه البيئه

**ahmed_eng2001** · 02-08-2016 06:34 PM

متابع .. و فى انتظار خبراء الجيب

**م/أحمد عبد الفتاح** · 02-08-2016 09:41 PM

الكود ده معناه إنخفاض كفاءة علبة البيئة وده ليه كذا سبب :
١- تلف علبة البيئة .
٢- الموتور بيحرق زيت وسد علبة البيئة وسبب تلفها .
٣- رشاش مسيل .
٤- طلمبة البنزين.
٥- حساس الاكسجين ( الشكمان ) اللى بعد علبة البيئة بايظ ( بيبقى فيه واحد على مانيفولد العادم وواحد بعد علبة البيئة أو عليها ) .
بس طالما العطل عندك مصاحب لصوت زى شخلله تحت العربية تبقى فى الغالب علبة البيئة باظت وعلشان تتاكد تروح لواحد بتاع شكمانات وهو حايخبط او يهز علبة البيئة حاتسمع صوت الشخلله .

**م/أحمد عبد الفتاح** · 02-08-2016 09:44 PM

وأحب ازود إن فيه عربيات فيها علبة بيئة كبيرة واخدة من الاتنين مانيفولد بتوع العادم وفيه عربيات فيها ٢ علبة بيئة أصغر- واحدة لكل مانيفولد

**م/أحمد عبد الفتاح** · 02-08-2016 11:04 PM

المشاركة الأصلية كتبت بواسطة salam100100

هحاول اساعدك برغم انى مش خبير

موتور حضرتك v8, والكود بيقول bank 1
دا معناها ان حساس الاوكسجين فال bank 1 بيدى قرائه غلط
bank 1 دا رمز لمكان سيليندر رقم 1 فالشراره واعتقد دا فالناحيه الشمال

اصل عربيتك فيها اكتر من حساس اوكسجين (قبل وبعد علبه البيئه) وبردوا اعتقد انه عيب الحساس اللى فالشجره قبل علبه البيئه

كلام حضرتك مظبوط بس العكس بالنسبة لحساس الاكسجين العيب فى الحساس اللى بعد علبة البيئة مش اللى قبلها وده بيتلاحظ عن طريق السكان . بس مع وجود صوت تحت العربية يبقى فى الغالب علبة البيئة باظت

**م/أحمد عبد الفتاح** · 03-08-2016 02:35 PM

انت فعلا لازم تشوف السبب اللى خلى العلبة تتسد وتعمل الصوت ده سواء كان زيت او بنزين زيادة فى العادم - واتاكد برضه هل الزيت بينقص معاك - هل كشفت على الشكمان ممكن يكون جوان فى المانيفولد او شرخ بسيط - راجع قفزان تثبيت الشكمان .
ويستحسن تروح لحد يقيسلك ضغط طلمبة البنزين علشان تعرف اذا كان رشاش مسيل ولا لا بالطريقة دى :
- تفتح الكونتاكت من غير ماتدور والجهاز راكب على مسطرة البنزين اللى مغذية الرشاشات ( حتلاقى فيها طبة لتركيب عداد القياس ) حتلاقى الضغط بيقرا فى العداد اللى متركب عالمسطرة .
- لو الضغط ثابت يبقى مافيش مشاكل ولو الضغط نزل بسرعة تبقى طلمبة ولو الضغط نزل بالراحة يبقى رشاش مسيل .
ده اختبار بيوفر وقت وفلوس

**م/أحمد عبد الفتاح** · 03-08-2016 04:31 PM

انا خلصت مقاس الكبس ولكن وصلة قياس ضغط طلمبة البنزين لسه باعمله ومستنى بس اللواكير ال an تجيلى من بره حتوصل مع واحد صاحبى للاسف بعد شهر ونص - بالمناسبة هل جربت لاكور خراطيم شحن التكييف على البلف اللى على مسطرة الرشاشات ولا لسه ؟