الموضوع: مياه الراديرتير

المشاركة الأصلية كتبت بواسطة م/أحمد عبد الفتاح

موضوع هايل فعلاً اللى حضرتك شغال فيه واسمحلى اساعدك بشوية معلومات صغيرة يمكن تنفع معاك فى البحث بتاعك :
- الإيثيلين جليكول كان هو الاساس بتاع سوائل التبريد فى العربيات - وكانوا بيضيفوا ليه مواد مانعة للصدأ زى أملاح السيليكات وأملاح الفوسفات - ولايزال استخدامه مستمر حتى الان (لأن الشركات شغاله برضه فيه إحتياطى لأن إحتمال يرجعوله تانى بدل الـ oat والـ hoat )
- كبرى الشركات بتاعة العربيات الأوروبى قالوا مش عاوزين فوسفات وحطوا سيليكات وحاجات تانية بدل الفوسفات .
- كبرى الشركات بتاعة اليابان قالوا مش عاوزين سيليكات وحطوا فوسفات وحاجات تانية بدل السليكات .
- الموضوع راح قالب على الإيثيلين جليكول لأنه مادة سامة فراحوا جربوا البروبلين جليكول لقوه لما بيسخن بيكون حمض اللاكتيك ودى مادة مشجعة جداً للصدأ والتاكل للمعادن !!!!!!
- راحوا راجعين تانى للإيثيلين جليكول والخناقة اليابانى الاوروبى :)
- توصلوا لختراع الـ oat وده مافيهوش لا إيثيلين جليكول ولا سيليكات ولا فوسفات وحطين مكانهم حاجات تانية والكل انبسط :) - لقوا برضه ان تركيبة الـ oat بالحاجات التانية برضه مادة سامة جداً وملوثة والتخلص منها صعب !!!!! راحوا لفين وراجعين تانى للسيليكات والفوسفات وضافوهم للـ oat بدل الحاجات التانية اللى كانت فيه وسموه hoat والخناقة اليابانى الاوروبى رجعت تانى
- بالمنظر ده أعتقد إنهم حايرجعوا تانى للإيثيلين جليكول علشان كده قلت فى الاول إن الشركات بتاعة سوائل التبريد مأمنه نفسها ولسه بتنتج السوائل اللى اساسها الإيثيلين جليكول .
- المهم بقى فى القصة دى إن الأمريكان شغالين على كله إيثيلين جليكول شغال سيليكات شغال فوسفات شغال oat شغال hoat شغال لغاية سنة ٢٠١٤ وابتدت تحصل مشكلة فى الجيب موديلات ٢٠١٤ فمافوق : طبعاً الجيب تبع كرايزلر وكانت شغالة بمية oat لونها أحمر قبل ٢٠١٤ وبعدين اندمجت كرايسلر وفيات وبقى اسمهم fca والاجراءات بتاعة الدمج اكتملت فى اواخر ٢٠١٣ وابتدا الإخوة الطليانة بتوع فيات يلعبوا فى امريكا فى شركة كرايزلر والاخوة الامريكان يلعبوا فى ايطاليا فى شركة فيات - راح الطلاينة مقررين تغيير سائل التبريد من oat الأحمر إلى hoat فى العربيات الجيب زى إللى بيستعملوه شركة فيات فى عربياتها وكان من محاسن الصدف إن لونة بنفسجى محمر (شوف الحظ) - المهم خلال سنة ٢٠١٤ وسنة ٢٠١٥ ابتدت تظهر شكوى جديدة من جيب فى الموديلات ٢٠١٤ ومافوق وكانت الشكوى على مستوى العالم فى مصر واوروبا وامريكا !!! إيه الشكوى :
"عداد الحرارة بقى زى عداد البنزين بس بالعكس العربية بتسخن" المهم كرايزلر اتقلبت وابحاث ودراسات على المواتير الكمبيوتر والدنيا اسودت ومحدش بقى عارف يعمل ايه لغاية ماوصلوا عن طريق ملاك العربيات دى لخيط وهو : " كانت ماشية كويس لغاية معاد الصيانة ومعملوش حاجه غير انهم ربطوا الفشة وغيروا الزيوت وزودولى ميه وبعد يومين تلاتة ابتديت الاحظ السخونية" المهم اكتشفوا ان التوكيلات بتاعة كرايزلر على مستوى العالم بتحط لسه ميه oat وبالتجارب المعملية طلع ان الـ oat والـ hoat لما بيتخلطوا مع بعض ويسخنوا بيكونوا مادة جيلاتينية - طبعا اتغسلت دورة التبريد للعربيات واتحطت المية الـ hoat البنفسجى المحمر دى :) واتنبه على التوكيلات على مستوى العالم يزودوا العربيات بمية hoat .
معلش طولت شوية بس دى الحكاية لأنى متابعها من زمان !!!!

المشاركة الأصلية كتبت بواسطة م/أحمد عبد الفتاح

إستكمالا للموضوع :
السوائل الجديدة بيقولوا إنها بتقعد فى العربية ٣ سنين وفيه ٤ سنين وفيه ٥ سنين وبالكيلومتراج ارقام فلكية.
طيب أنا قلت ليه إن الأمريكان مكبرين دماغهم وشغالين على كله ليه :
هما بينظروا للموضوع ده من اتجاهين :
- حاطط سائل حايزوده باللون اللى فى العربية ومش حايحط لون تانى ولو عاوز يغير للون تانى او لسائل بيدى سنين اعلى او اميال اعلى حايغير كل السائل فى الدورة.
- السائل بتاع التبريد معمليا يقعد ٥ سنين طيب فعلياً يعرفوا منين إنه بعد مثلاً سنتين فقد خواصه وبقى وجوده مضر اكتر من نفعه ؟؟؟؟ يعملوا اختبارات بلدى يعنى الملاك بيعملوا الاختبارت دى ويقولوا لبعض - إيه الإختبارات دى :
١- يقيسوا الكثافة .
٢- يقيسوا الكهربا السارية فى السائل علشان يعرفوا السائل ده بقى الكتروليت وبياكل من معدن ويحط على معدن تانى (نظرية الطلاء الكهربى) لأن فيه فى الموتور سبايك ومعادن مختلفة بيعدى عليها سائل التبريد ولو قاسوا الكهربا فى سائل التبريد ولقوها اكتر من ٠,٣ فولت يغيروها على طول وبيقيسوها بالافوميتر العادى طرف جوه الرادياتير فى الميه وطرف على الارضى مرة عالبارد ومرة عالسخن وشكراً.
٣- الدرجة القاعدية للمية ph واهم حاجه انها تكون قاعدية واعلى من 7.8ph ولو قلت عن 7.2ph بيغيروها وبتتقاس بورق ملون بيدى المقاس بتاع الـ ph بيتباع فى كل حته.
بالنسبة لنسبة الخلط بيفضل النسبة ٥٠٪ : ٥٠٪ أو الـ ٤٠٪ : ٦٠٪ علشان درجة تركيز المواد المانعة للصدأ فى سائل التبريد تعمل مفعولها وماتبقاش زى قلتها بالاضافة إلى منع التجمد .
واسف مرة تانية على الاطالة

الله ينور يا بشمهندس أحمد..

حضرتك فعلا لخصت الموضوع المكعبل ده فعلا.. وأنا كنت وصلت لجزء كبير من اللي حضرتك قلته بس ما كنتش عارف أرتبه ازاي علشان أحاول أسهل على أصحاب السيارات كيفية اختيار سائل التبريد..

وتصديقا لكلام حضرتك.. فعلا واضح إن التوجه دلوقتي للرجوع للإيثيلين جليكول... وأنا لما بروح أعمل صيانة لعربيتي السيراتو في توكيل كيا في جدة بلاقيهم بيحطوا المية بتاعت كيا وهي خليط 50:50 وأساسه إيثيلين جليكول..




والسائل نفسه لونه أزرق فاتح شفاف.. زي كده




...