مرتبات المهندسين المصريين الخبرة مابين 7 إلى 10 سنوات في السعودية

السلام عليكم ورحمة الله وبركاته
نحن في صدد إنشاء شركة استشارات هندسية في السعودية
وأنا في حاجة لمعرفة مرتبات المهندسين المصريين الخبرة مابين 7 إلى 10 سنوات
قابلت عدد من المهندسين وشوفت سيرهم الذاتية واستمعت لطلباتهم
طبعًا المهندسين المدنيين المصريين بيطلبوا 10 و أعلى رغم إنهم حاليًا في شركاتهم 6 و 7
فحبيت أعرف المرتب المعقول لمهندس مدني خبرته 7 سنين في السعودية
الأردنيين مرتباتهم أقل ...
عايز أعرف المتوسط المناسب لوجود تباين كبير بين طلبات المهندسين
مع أن الخبرة و الإنجازات متشابهة تقريبًا
وكذلك الكوادر المهم تواجدها في الفترة الأولى
مع العلم إن المناقصات المستهدفة لمشاريع سكنية و خدمية و بنية تحتية

وعليكم السلام ورحمة الله وبركاته
الكوادر المهم توافرها فى الفتره الاولى مدير طبعا ويكون خبره باعمال التصميم والتنفيذ والتسعير يعنى يكون من الاخر مهندس عقر وده تكون خبرته من 15 لـ 20 سنه ومعاه فى البدايه المهندسين اللى تساعده خبره من 10 لـ 15 سنه ودول الـ suniors لبقية المهندسين اللى هيكونوا خبره من 5 لـ 7 سنوات. بالنسبه للمرتبات تختلف حسب حجم اعمال المكتب المراد انشاؤه. لان المهندس اللى اشتغل فى مشاريع كبيره غير المهندسين اللى اشتغلوا فى مشاريع صغيره. يعنى ممكن تقسم المهندسين جروبز حسب الشغل. النقطه الاخيره ياريت تدرس توقيت انشاء المكتب فى السعوديه فى الوقت الحالى دراسه جيده لان المشاريع العقاريه معمول لها هولد من فتره بالسعوديه وبالتوفيق

شايف ان المشروع ده فى التوقيت الحالى مش مربح خصوصا ان معظم شركات المقاولات قفلت وسرحت عمالها وانا فى السعوديه اشتغلت اربع سنين فى شركه وقفلت ونقلت على شركه تانيه ولاقيت ان الرواتب متاخره اربع شهور لان مفيش سيوله وسألت على كذا شركه لاقيت الوضع فى السعوديه كلها كده ...
المرتبات بتختلف على حسب نشاط الشركه من 5 ل 8 الاف ريال اساسى وبدل سكن وبدل انتقال وشريحه اتصال وتأمين طبى ليه ولاسرته غير الاجازه شهر مدفوعه الراتب كل سنه وتذاكر الطيران ذهاب وعوده وفى ناس بتطلب باكدج ويوصل 12 ل 15 الف ريال

الغرض من مكتب الإستشارات الهندسية ( تفادي الخسارة مش الربح بشكل مباشر )
فيه شركات بسبب الإنهيار الإقتصادي اللي حصل خسرت وقفلت
وشركتنا كانت متعاقدة مع بعض الشركات اللي قفلت لإنهاء مراحل من المشاريع المتعاقدين على إنجازها
هما أبدوا إستعداد لتحمل المسؤولية القانونية لفسخهم للعقود أو دفع الغرامات والوفاء بالشروط الجزائية وتسويتها بالتراضي
وإحنا نظرًا لإننا بنسابق الوقت قررنا نمشي ودي معاهم
وقررنا ننشأ سلسلة من الشركات وننجز الأعمال بشكل متكامل نظرًا لإن المشكلة دي هتتكرر

ومن مدة وأنا متوقع الخلل .. وعملت قاعدة بيانات لبعض المناقصات اللي هتطرح
واليومين اللي فاتوا قابلت عدد من الهندسين .. وعايز أقول بصراحة أني ناوي أرجع لطريقتي المعتادة في التوظيف
( أستقطب كفاءات )
والطريقة دي بيجي الموظف مع شغله مع معارفه مع قاعدة بياناته ويبدأ يشتغل هوا وزمايله فجروب متعاون زي خلية النحل

فاللي هيحصل دلوقتي زي ماقال باشمهندس عمرو
هستقطب مهندس محترف خبرة من 15 لـ 20 سنة وأشرحله الوضع
وأسيبه يعمل تصور وهيكلة كاملة وربنا يسهل

اقتباس:

---

المشاركة الأصلية كتبت بواسطة a7medsh3rawi

شايف ان المشروع ده فى التوقيت الحالى مش مربح خصوصا ان معظم شركات المقاولات قفلت وسرحت عمالها وانا فى السعوديه اشتغلت اربع سنين فى شركه وقفلت ونقلت على شركه تانيه ولاقيت ان الرواتب متاخره اربع شهور لان مفيش سيوله وسألت على كذا شركه لاقيت الوضع فى السعوديه كلها كده ...
المرتبات بتختلف على حسب نشاط الشركه من 5 ل 8 الاف ريال اساسى وبدل سكن وبدل انتقال وشريحه اتصال وتأمين طبى ليه ولاسرته غير الاجازه شهر مدفوعه الراتب كل سنه وتذاكر الطيران ذهاب وعوده وفى ناس بتطلب باكدج ويوصل 12 ل 15 الف ريال

---

عشان كدا بسأل مانا إستغربت من الأرقام
كل اللي قابلتهم طالبين 10 و 12 و15 أساسي رغم إن خبرتهم أقل من 10 سنين
وبصراحة معظمهم الأسلوب مش لبق والمظهر مش مناسب
و فيه منهم قالها بصراحة إن حل مشكلتنا في اللعب في المواصفات
واحد بالمنظر دا وإعترفلي بكدا أأمنه على رقبتي إزاي
بصراحة أنا تفاجأت من مستوى المهندسين اللي قابلتهم ..
إختيار الموظف بعينه وإستقطابه هيا الطريقة المثلى لإنجاح أي مشروع
ولكن معدل المرتبات اللي هيفرق .. الفترة دي فترة تقشف ( كله شادد الحزام )
فإيه الأرقام دي بس
المفترض المرتبات تقل في الأيام الصعبة دي مش تزيد

فيه فكرة معظم شركات كبيره فى السعوديه والامارات عاملينها وهى انهم يفتحوا فرع فى مصر خاص بالتصميمات المعماريه الهندسيه واعداد الكميات والمناقصات وتتبعت من خلال النت للفرع الرئيسى فى السعوديه مثلا. ميزة الموضوع ده للمكتب الهندسى فى حاجتين. اول حاجه انه طبعا هيوفر فى المرتبات وتذاكر الطيران وبقية البدلات. الميزة التانيه ان المكتب هيقدر يستقطب كفاءات فعلا وبالتوفيق

السلام عليكم

الرواتب للخبرات ( الجيدة ) بحدود 5 ل 8 سنوات خبرة ...اساسي الراتب 6500 - 8000
الرواتب للخبرات من 8 الي 12 بحدود 9 ل 13
الرواتب للخبرات من 12 ل 16 ..تبدأ من 13 ل17
الخبرات فوق ال20 تبدأ من 18 الف

مهندس مصري من 7-10 سنين خبرة يبقى فى حدود 8-10 فى المتوسط غير السكن و المواصلات و لو معاه أسرته حيطلب أكتر

الأسعار فى السعودية دلوقتى عالية قوى عن زمان غير كلام عن فرض ضرايب على الدخل

و زي ما قالوا فوق المهندس اللى بيشتغل فى مؤسسة أو شركة صغيرة بتبنى مول أو عمارات أو حاجات صغيرة غير اللى بيشتغل فى شركات أجنبية بتاخد مشاريع عملاقة لإن الأخير خبرته أعلى و طلباته أكتر . أعتقد اللى يناسبك مهندسين من شركات صغيرة