هشترى الينترا 2009 مخبوطة فى الرفرف اليمين مسمع فى الكارتيره فاصلها عن الجنب انصحونى

**منتصر سليمان** · 10-08-2016 03:50 PM

اريد نصيحة من خبراء الموقع انا هشترى الينترا 2009 مانول وفيها خبطة فى الرفرف اليمين مسمع فى الكارتيره فاصلها عن الجنب مش كتير ممكن تسقط ابره لتحت اريد ان اعرف ما مدى خطورة الوضع ده على حالة العربية وماهو اقصى تطوراته يعنى ممكن يوصل تكلفته لكام وهل ليه غلاج ولا لا انا معلوماتى صفر فى السيارات بس ابن عمى اتفرج على العربية وعاينها حالتها كويسة وصاحبها وموافق يبيعها ب 82 الف
ارجو توضيح كل شئ عن الكارتيرة ووظيفتها فى السيارة وما اسواء تطورات الشرخ ده وسامحونى على الاطالة وانا فى انتظار دودكم

**abokoko** · 10-08-2016 04:41 PM

متابع

**hugan** · 10-08-2016 05:16 PM

الكارتيرات مش حاجه بسيطه المساعد بيثبت فيها ومع المطبات الفتح هايزيد ويخلف معاك في مقاسات العفشه وهاتدخل نفسك في متاهه انت في غني عنها
العربيه دي تعتبر معيوبه ابعد عنها

**منتصر سليمان** · 10-08-2016 05:48 PM

الله ينور عليك استاذ hugan الكلام ده اتقلى من ابن عمى بالظبت بس هوا قلى كمان ممكن تتصلح وتتلحم تانى هل الكلام ده صحيح ولا برضو مش هتبقى عملية او ممكن ترجع تشتكى تانى من نفس العيب ارجو التوضيح

**منتصر سليمان** · 10-08-2016 05:58 PM

الله ينور عليك استاذ miam0502788391 سبقت افكارى ورديت شكرا ليك جدا على التوضيح طيب حضرتك انا كده طللعتها من دماغى خالص اسمحلى من فضلك اسال عن حاجة تانى وهي عربية تويوتا يارس شوفتها امبارح موديل 2007 مانول عفشتها تعبانةخالص جربتها فى طريق ترابى بتدربك كلها من تحت وريتها لابن عمى برضو قلى دى عايزة 4 مساعدين علشان تتروق وعايزة تترش هيا موتورها عفى 60 او 70 فى الميه على حسب تقديرى والعربية ماشية 200 الف كيلو منهم سنتين العربية كانت شغالة طلبات توصيل فى قرية كلها مطبات وحفر العربية فيها رخصة سنتين فصلناها ب 55 الف الراجل رد ب 57 الف متردد اخدها ولا لا لان ابن عمى بيقولى هتصرف عليها 10 الف علشان ترجعها تويتا يارس على اصلها تانى انا خايف اخدها هتبقى دخلت فى 65 الف اة 67 الف وتبقى مش كويسة نصيحتكم ابعد عنها علشان قطع غيارها غالية وانزل سوق الجمعى استلقط الينترا فى حدود 90 الف ولا اخدها ارجو الرد وشكرا لسعة صدركم

**ahmed.biso13** · 10-08-2016 06:20 PM

بلاش
عشان ممكن تصرف عليها ويرجع العيب تانى
بالاضافة الى انها عندما تظبط زوايا بتاع الزوايا هيقولك
العربيية حدفة يمين ومحتاجة زرجينة تانية
وفى الاخر هتمشى بيها وانت كارها
ولما تيجى تبيع هتخسرمعاك قوى
ومش هتقدر تفتح بقك
عشان هتبقى عاوز تخلص

**منتصر سليمان** · 10-08-2016 06:58 PM

طيب نصيحة اخيرة من حضرتك فى الوقت الحالى انا معايا 90 الف لو نزلت سوق الجمعة ايه العربية اللى اقدر اجيبها بالسعر ده تكون عملية لانى هاكل بيها عيش هشتغل عليها طلبات توصيل وعرائس هل اجيب الينترا ولا فى حاجة عملية اكتر من الينترا وطبعا لازم يبقى شكلها حلو علشان هتبقى عرائس وكده وشكرا ليك جدا

**منتصر سليمان** · 10-08-2016 08:54 PM

شباب مستنى ردكم

**miam0502788391** · 11-08-2016 03:31 PM

المشاركة الأصلية كتبت بواسطة منتصر سليمان

الله ينور عليك استاذ miam0502788391 سبقت افكارى ورديت شكرا ليك جدا على التوضيح طيب حضرتك انا كده طللعتها من دماغى خالص اسمحلى من فضلك اسال عن حاجة تانى وهي عربية تويوتا يارس شوفتها امبارح موديل 2007 مانول عفشتها تعبانةخالص جربتها فى طريق ترابى بتدربك كلها من تحت وريتها لابن عمى برضو قلى دى عايزة 4 مساعدين علشان تتروق وعايزة تترش هيا موتورها عفى 60 او 70 فى الميه على حسب تقديرى والعربية ماشية 200 الف كيلو منهم سنتين العربية كانت شغالة طلبات توصيل فى قرية كلها مطبات وحفر العربية فيها رخصة سنتين فصلناها ب 55 الف الراجل رد ب 57 الف متردد اخدها ولا لا لان ابن عمى بيقولى هتصرف عليها 10 الف علشان ترجعها تويتا يارس على اصلها تانى انا خايف اخدها هتبقى دخلت فى 65 الف اة 67 الف وتبقى مش كويسة نصيحتكم ابعد عنها علشان قطع غيارها غالية وانزل سوق الجمعى استلقط الينترا فى حدود 90 الف ولا اخدها ارجو الرد وشكرا لسعة صدركم

لو العربية اساسيات سليمة وهتصرف عليها وبعد كا تصرف تمنها يكون اقل من واحدة جاهزة ماشى اتكل على الله
لاكن مش تكون ب 57 الف واصرف مثلا 12 الف سمكرة ودوكو وعفشة ,,,,الخ وبعدين الاقى اللى زيها ب 65 الف لأ شكرا اشوف حاجة تانية افضل