ترموستات ax

**gem** · 13-08-2016 12:27 PM

كل ما اشتري ترموستات 90 -80 العداد اللي في العربية الاقيه بيقرا لغاية 80 و بعد كده الحرارة تنزل 70 مش عارف العيب في العداد ولا التترموستات و المروحة علي الطرق السريعة بتفضل شغالة ما بتفصلش و الحرارة ثابته علي 90 ارجو الافادة من اهل الخبرة في الستروين

**hinrey_2** · 13-08-2016 04:32 PM

http://www.nilemotors.net/Nile/304628-3.html

**gem** · 16-08-2016 03:08 PM

متشكر لاهتمام حضرتك بس المشكلة اللي عندي هل الترموستات و لا عداد الحرارة و ازاي اعرف اذا كان العداد بيقري مظبوط ولا لأ

**hinrey_2** · 16-08-2016 11:17 PM

ابحث فى اليو تيوب عن الموضوع ده

طريقة فحص بلف ثرموستات السيارة

**mbx4e** · 17-08-2016 06:35 AM

بتكلم عن. اي ثرموستات ؟؟
ثرموستات الكوعه؟؟؟!!!!!
ولا ثرموستات الراديتير ؟؟؟!!!!
ودا علاقته ايه بس !!!! هو وظيفته تشغيل مراوح الراديتير الكهربا لما يحس بالحراره ويفصل لما يبرد وشكله زي الطبه فيها طرفين كهربا وصاموله ٣٠ واسمه الكتركال ثرمو سويتش او مفتاح كهربا حراري و الاسباني منه كويس جدا بس ييقى اصلي.
ثرموستات الكوعه بيركب في كوعة وش السلندر ودا حساس ميكانيكي حراري وظيفته انه شغال بوابه لما يبرد الشمع اللي جوا الكبسوله بتاعته يجمد السوسته تضغط على الابره وتقفل البوابتين عل بعض فتحبس المياه المتبرده في الراديتير وجايه منه عن طريق ضغط طرمبه المياه وتقليبها عشان تبرد الموتور .
و لما الميا تسخن الشمع يكبس على الابره وتضغط على السوسته اللي فيه فاتفتح البوابه والميا السخنه تعدي للراديتير عشان تتبرد بهوا المراوح.
وظيفتها بقى بتحافظ على درجة حراره ثابته للموتور مايقلش ويزيد عنها ولا في زحمه او جري عشان تاخد اقصى عزم وكفائه للماكنه .
بس ....!!!!!
اكيد بقى انت تقصد حساس الحراره او صباع حساس الحراره اللي بيركب في كوعة الثرموستات كمان في وش السلندر من فوق هو دا اللي بيقرا الحراره ويوصلها للعداد ودا طبه بصاموله صغيره ١١:١٣ مش فاكر مقاسها بالزبط بس صغير بطرف واحد هو دا اللي مهيس او متراكم عليه صدا ووساخه بتأخر معاك قراية عداد الحراره فكه وصنفره ونظف دورة مياه الراديتير في بنزينه وشوف جرب كام يوم لانه ممكن يكون بايظ بيعلق او مابيقراش صح وممكن ييقى عيب عداد بيعلق برده

**mbx4e** · 17-08-2016 07:06 AM

نايل موتورز - NileMotors.net
ثرموستات الكوعه المفترى عليه شوف الموضوع من اوله

**mbx4e** · 18-08-2016 12:02 AM

http://www.nilemotors.net/Nile/328708-a.html

**gem** · 20-08-2016 12:36 PM

ترموستات الكهربا اللي بيشغل المروحة

**gem** · 20-08-2016 12:39 PM

انا غيرت الترموستات تاني و العداد بيقرا لحد قبل التسعين بحاجة بسيطة وبعدين المروحة تشتغل ومعني كده ان العيب من الترموستات فالسؤال دلوقتي منين اجيب ترموسات اصلي اللي بيشتغل علي 92

**mbx4e** · 21-08-2016 01:16 AM

لو مش مستريح ليه وحاسس انه مأخر او بيعلق عن غيره 92 مش فرق جامدا الدرجتين الاصلي متوفر عند تجار البيجو والستروين في مجلس الامه والتوفيقيه وجنب شارع معروف او شارع رمسيس ادوار فريد وسط البلد وشارع دمشق في مصر الجديده وخالد كولومبووفي احمد عصمت في عين شمس متفرع من جسر السويس و مشمش في الجيزه
وعند ك اخر شارع بورسعيد ناحية السواح عند محطة الترام نور بيجو ورضا عشماوي وعندك في وسط البلد في المول تجار تخصص قطع الغيار الكهربا متخصصين وكمان واحد اسمه ميشيل بتاع بيجو ممكن تلاقي عندهم وكمان في واحد قصاد المدرسة الالماني شارع محمد محمود عند وزارة الداخلية وسط البلد عابدين متخصص رفايع الكهربا بس
الاسباني اسمها fae تقريبا وليها درجات مختلفة
80:90
يشتغل عند 90
يفصل عند 80
ايه اعراض المشكلة كاملة عشان افيدك؟عشان اقدر اقلك دا عيب ايه ؟
الحل هايبقى كذا خطوة مش تغيير ثرموستات اصلي بس ولازم تشيك على الراديتير والقربة وغطاها وكمان تاخد هوا كويس من دورة المياه