الموضوع: أغير زيت فتيس و فلتر بتاعه فين

المشاركة الأصلية كتبت بواسطة h_askalany

ربنا يبارك لحضرتك
هو انا حضرتك معرفتش انزل الكتالوج ساعتها من البوست اللي حضرتك ذكرته بس نزلته من مكان تاني و بصراحة مش عارفة اذا كان مواصفات شرق اوسط أو لأ
بس انا عربيتي فيها مقياس زيت الفتيس غير مقياس زيت المتور
يبقي كده ممكن احتفظ بالزيت التويوتا اللي عندي اللي هو t- iv
و ممكن اعرف لو انا تحركي بالعربية مش كتير فلازم اغير الزيت بعد مدة قد ايه

كده فعلاً يبقى الزيت اللي عند حضرتك تمام ومش محتاجة أي زيت تاني..

بالنسبة لموعد التغيير...

كتالوجات تويوتا بتقول نفس التوصيات تقريبا بالنسبة لزيت الt-iv زي الWS.



يعني الزيت مش بيتغير إلا في حالات الاستخدام الشاقة أو الخاصة... والمفروض تكشفي عليه كل فترة وتشوفي لونه أخباره إيه...

لو بدأ يغمق يبقى المفروض نفكر في تغييره....
لو بقى اللون بني يبقى لازم يتغير..
لو بقى اسود يبقى يتغير فورا.

عموما.. أتوقع إن في الحالة دي الزيت المفروض يتغير كل 80 ألف كيلومتر كإجراء احتياطي... ده طبعا في حالة إن الزيت لونه اغمق شوية.

لو فضل اللون احمر... مفيش داعي لتغييره.

أنا هنا بتكلم على لسان الكتالوج بتاع تويوتا.


آخر حاجة...

حضرتك لازم تعملي فلش للدايرة من نفس الزيت الجديد. .. يعني هنحط الزيت الجديد ونمشي بيه يومين كده ونرجع ننزله علشان نشيل كل آثار الزيت القديم.. وبعد كده نحط زيت جديد كمان مرة.

أعتقد الكمية بسيطة ( 3 لتر في كل مرة).. يبقى حضرتك محتاجة حوالي 6 لتر علشان إجمالي الغسيل والتغيير.


...

المشاركة الأصلية كتبت بواسطة h_askalany

متشكرة جدا لحضرتك و ربنا يجازيك خير و ينفع بك دايما
معلش سؤال اخير هل زيت الفرامل بيتغير برده ولا لأ

ربنا يكرمك دايما إن شاء الله..

بالنسبة لزيت الفرامل.. أيوه الزيت لازم يتغير... وبيتغير كل سنتين.

ونوع الزيت بيتحدد من الكتالوج طبعا... وتقريبا بيبقى مكتوب كمان على غطا قربة زيت الفرامل



تقدري تدخلي على المواضيع دي لو عايزة معلومات زيادة:

http://www.nilemotors.net/Nile/16124-a.html
http://www.nilemotors.net/Nile/149434-a.html


...

المشاركة الأصلية كتبت بواسطة h_askalany

السلام عليكم معلش اسفة علي ازعاج حضرتك تاني
حضرتك انا بصيت علي مقياس زيت الفتيس لقيت مكتوب عليه
there is no need to change atf
هل ده كده امعناه ان نوعه atf ws
معلش محتاجة رد حضرتك ضروري عشان اخر ميعاد لترجيع الزيت اللي عندي بكره

خلاص.. كده الصورة واضحة تماما.. الزيت المطلوب هو atf ws

يبقى حضرتك ترجعي الزيت .. وتشتري زيت ws لو كان عنده...

ولو مش عنده يبقى نجيب حاجة من بتاعت آمسويل اللي بالتكت الأزرق...

وزي ما هما كاتبين.. الزيت مش محتاج يتغير... بس بشرط نستخدم الزيت الصح.


...

المشاركة الأصلية كتبت بواسطة h_askalany

ربنا يكرم حضرتك و يجازيك خير يا رب و الله مش عارفة اشكر حضرتك ازاي
طيب حضرتك بالنسبة لزيت الفرامل هو مكتوب عليه دوت 3 هل حضرتك ترشحلي ماركة كويسة اجيبها -و ممكن الاقيها فين - هل في فرق بينه و بين دوت 4
معلش اسألتي كتير بس الجهل وحش :-)

يا فندم اسألي زي ما حضرتك عايزة... وأنا هجاوبك على قد معلوماتي.. ولو ما أعرفش هحاول أدلك على حد تاني يعرف أكتر مني.

محدش بيعرف كل حاجة :)


طيب.. بالنسبة لزيت الفرامل..

تقدري طبعا تحطي Dot 3.. بس الـDot 4 أفضل طبعا.. لإنه بيستحمل درجات حرارة أعلى بكتير (خصوصا أثناء الفرملة لإن حرارة الاحتكاك بتتنقل للزيت)

ولو ما لقتيش Dot 4 فأنا مش شايف فيها مشكلة بصراحة لإني أتوقع إن سواقة حضرتك ما فيهاش استخدام فرامل بقسوة ... وبالتالي فموضوع الحرارة ده مش عامل مؤثر قوي.

المفروض ننزل كل الزيت القديم ونحط الزيت الجديد... بس المسألة دي عايزة واحد بيبفهم فعلا علشان ما يدخلش هوا في الدايرة.. وساعتها هتلاقي فرامل العربية تعبانة خالص.

زيت الفرامل موجود بسهولة في محطات البنزين وعند اللي بيبيعوا زيوت وسوائل العربيات في الشوارع المشهورة بتاعت قطع الغيار.

بالنسبة للماركة... بصراحة معرفش حاجة محددة غير Lockheed.. ودي أشهر حاجة في السوق... بس ابقي اشتريها من مكان محترم.. علشان الغش.


...