الموضوع: التعامل مع موظفين الحكومه

المشاركة الأصلية كتبت بواسطة ahmedwagdy03

من الآخر لما بحب أخلص حاجة فى الحكومة بروح على الفراش أو الساعي أو بتاع الأمن و ألاغيه و هو حيخلص لإنه بيبقى عارف مين اللى بياخد و يخلص

هي البلد ماشية كدة و الناس اللى فى الحكومة عارفين إنها سبوبة

للاسف انا مسافر برة مصر من زمان اوى واخر مرة كنت فى اجازة الشهر اللى فات
المهم كنت عايز انقل ولادى واحد اعدادى وواحد ابتدائى من ادارة الى ادارة داخل القاهرة صراحة لم اكن اتخيل ان الوضع فى مصر فى القطاع الحكومى وصل لهذه الدرجة
المشكلة انا ممكن ادفع فلوس لاى حد واشترى وقتى وكرامتى ايضا لكن ماعرفش مين اللى بياخد ومين اللى مش بياخد وممكن تيجى تدفع لحد يطلع شريف ويعملك مصيبة
العجيب انه الموظفين الحكوميين اللى قاعدين على مكاتب بيعملوا اشياء ادارية مع احترامى لاى انسان هم اوطى الطبقات الاجتماعية ثقافيا وماديا والغريبة انهم بيتعاملوا مع الناس بطريقة فى منتهى قلة الذوق وعدم الاحترام ولا ادرى ما السبب فى ذلك
لدى موضوع لو حكيته لن يصدقنى احد يدل على ما وصل اليه الحال عند هؤلاء
عندى ابن انتهى من المرحلة الابتدائية وعنده ضعف سمع فكان فى مدرسة خاصة بضعاف السمع وطلع التانى على محافظة القاهرة واسمه وصورته طلعت كانت موجودة فى كل الميديا وموقع الوزارة وانا اصلا ولا امه نعرف حاجة
جينا ننقل له من المدرسة قالوا ورقه راح المدرسة الاعدادى ومالناش اى علاقة بيه روحنا الادارة قالوا ضعاف السمع مش تبعنا طيب تبع مين قالوا ما نعرفش اسال فى المديرية
روحت المديرية لقيتهم بيقولوا ازاى بقى تبع الادارة اياها فقلت لهم هما بينكروا قالوا لا غلط طيب مين يلزمهم بالكلام ده اعمل طلب مثلا وتوقعوا عليه والا اهبب ايه قالوا لا مالناش دعوة طيب انا عايز انقله فى مكان اقامتى الجديد فين الولد يروح قالوا اقرب مدرسة لضعاف السمع طيب ايه هى اقرب مدرسة قالوا ما نعرفش امال مين اللى يعرف ؟
طيب بلاش انا عايز اطلع بيان نجاح انه الولد حصل على الشهادة الابتدائية قالوا ما نعرفش لكن اسالة فى حاجة اسمها لجنة الامتحانات جنب معهد التعاون
روحت هناك الناس ضحكوا على وقالوا هنا ثانوية عامة ودبلوم بس قلت لهم يعنى فى المديرية بيوجهونى غلط ومش عارفين قالوا ايوة طيب اروح لمين ؟قالوا روح الوزارة
روحت الوزارة علشان ادخل ده موال كانك رايح امن الدولة وعلشان توصل لقسم التربية الخاصة ده موال تانى وماحدش عارف حاجة ومافيش استعلامات وكله بيقولك بناء على مفهومه الشخصى ومافيش اى قوانين ولا لوايح ثابتة تنظم اى اجراء فى البلد
وصلت الوزارةاخر اوضة فى الدور السابع بعد ماسالت طوب الارض وقابلت ناس قاعدة مااعرفش بتعمل ايه وقالوا لى انه فيه مدرسة بيبقى فيها كونترول المدارس هى اللى بتطلع بيان النجاح
رجعت المدرسة وبدات من الاول قالوا لى عليها فى احمد سعيد فى العباسية سالت هناك رفضوا وقالوا احنا كونترول بس ومالناش دعوة ببيانات النجاح
بعد كدة شوفت معرفة ورجعت تانى للادارة اللى روحتها الاول وقابلت فيهل راجل مخضرم قالى ما تتعبش نفسك لو لفيت مصر كلها مافيش اى حد هيديك بيان نجاح والمشكلة دى فى الادارة من 4 سنين طيب ليه كده؟
قالى لانه المدارس بتاعت ضعاف السمع رافضة تنصاع لاوامر الادارات التعليمية اللى تتبعها فالادارات اتخذت قرار بانها تنفى اى علاقة بينهم وعيش حياتك بقى شوف مين ينفعك فى مااااسر ام الدنيا
وحتى الان لا يوجد اى هيئة تتبع وزارة التعليم ممكن تدينى بيان نجاح لابنى اللى طالع التانى على المحافظة والوزارة حاطة اسمه وصورته على الموقع الرسمى ليها
الانكى من كدة تخيلوا واحد عايش برة مصر فى دولة بتعمل كل مصالحك وانت فى بيتك على النت والمصالح الحكومية فيها قصور مكيفة فيها كل حاجة واضحة بالدور والنظام والاحترام وفجاة تلاقى نفسك فى صفيحة زبالة اسمها المصالحة الحكومية
كل المصالح الحكومية الناس اللى فيها لابسين هدوم قذرة ومافيش حد منهم استحمى من كام سنة وقاعدين على دكك وكراسى مكسرة فى اماكن فى منتهى القذارة كلها زبالة وتراب وطين وفاكرين نفسهم بنى ادمين وكمان بيتعالوا على خلق الله والواحد فيهم استغفر الله العظيم فى سوق البنى ادمين لو اتباع ما يجيبش جنيه
وكل المبانى مافيش فيها اكسجين والدنيا حر نار ومراوح قديمة مشغلينها على وشك انها تولع او تعمل ماس كهربائى
انا فرحان فيهم انه الدولة هتفصل 3 مليون موظف اللهى يولعوا بجاز كلهم

المشاركة الأصلية كتبت بواسطة البليهيس

ههههههه والله هم يضحك وهم يبكي......قصتك عشتها بكل تفاصيلها استاذي السنه اللي فاتت دي.....طب يجماعه كده ربنا مش حيبارك ف حاجه....الراشي والمرتشي ف النار.....الهي كل مرتشي يولع بجاز وسخ.....يعني ايه طيب.. نعمل ايه

لا بقى معلش استاذى الفاضل
سعادتك لازم تحكى لى كل التفاصيل الله يبارك فيك
يا اما نعمل موضوع منفصل كل واحد يكتب فيه خبراته مع المصالح الحكومية