بكام تقدر تعيش مستور فى البلد دى ؟

عندى سؤال مهم مش للتسلية ولكن سيترتب عليه تغييرات مهمة بالنسبة لى ..
لو انت متزوج وعندك ثلاثة أولاد فى التعليم "الخاص" .. بكام تقدر تعيش وتعيشهم
عيشة متوسطة وليست حياة مرفهة ؟
يعنى على أد أكل وشرب ولبس عادى متوسط التكلفة ومواصلات شغلك وزياراتك العائلية لوالديك وفواتير الكهرباء والمياة والغاز وأجرة البواب وصيانة العمارة، ومصاريف مدارس خاصة عربى وعربيات توصيلهم ولبس المدرسة والشنط والكتب الخارجية والدروس.
ومن غير مصايف ولا فسح ولا اشتراك نوادى ولا أكل من بره ولا هدايا..
يدوبك أكل وشرب ولبس ومدارس وحياة متوسطة .. يكفى مرتب كام فى الشهر ؟؟؟
وياريت اللى يكتب مبلغ يوضح كل بند هايتكلف صرف كام فى المتوسط .

الموضوع نسبي جداً جداً
يختلف بإختلاف الكثير من الأمور من أسرة لأخرى
المتوسط عند الاخر يعتبر ستر و الستر عن آخر يعتبر فيض من خير الله :)
معتقدش حضرتك تقدر تحدد الأمر بشكل واقعي

نسبى جدا حتى كلمه متوسط دى تختلف و بشده من مستوى لاخر ممكن المعقول و عادى بالنسبالك ترف شديد لغيرك او ممكن يكون فقر شديد و غير مقبول لناس تانيه

أبدا الموضوع مش نسبى ولا حاجة
احنا بنتكلم فى المتوسط حسب الأسعار الموجودة فى البلد فى الأماكن المتوسطة
مش حسب راحة كل واحد النفسية فى اختياراته
أنا هابدأ بنفسى وأحدد .. عشان شكلكم خايفين من الحسد
مصاريف مدارس كالاتى
7 الاف جنية لكل ولد يعنى اجمالى 21 ألف جنية
800 جنية لبس مدرسة لكل ولد يعنى اجمالى ألفين ونصف
500 جنية ثلاث شنط للمدرسة
6 الاف جنية عربيات اهالى للتوصيل للمدرسة بواقع الفين جنية لكل ولد
الف جنية مستلزمات وكتب خارجية
يعنى مجموع مصارف المدارس 31 ألف جنية ..
يعنى فى الشهر 2500 جنية .. دى مدارس بس ...
اللبس الصيفى والشتوى والكوتشيات .. والولاد بتكبر والحاجة بتصغر
800 جنية لكل واحد فى السنة أى2400 جنية لثلاثة أولاد هدوم وكوتشيات
أى 200 جنية فى الشهر
1000 جنية فى الشهر فراخ ولحوم
1000 جنية سكر ورز وجبنة وزيت وخضار ..
300 جنية مواصلات
500 فواتير كهرباء ومياة وغاز وبواب
200 جنية أدوية .. منهم أدوية للضغط .. أساسى بعد كل ده
مش هاتكلم عن الطوارئ .. دكاترة .. أجهزة بتبوظ .. مناسبة فى العيلة
عيدية فى العيد ..
وطبعا الممنوعات .. مصايف .. حاجات حلوة .. اشتراك فى نوادى
يبقى كده محتاج حوالى 6 الاف جنية فى الشهر عشان تعيش عيشة متوسطة ومستور.
يعنى 6 الاف جنية بدون فسح ولا تحويش جنية لاى طوارئ.

اقتباس:

---

المشاركة الأصلية كتبت بواسطة amrgamal100

أبدا الموضوع مش نسبى ولا حاجة
احنا بنتكلم فى المتوسط حسب الأسعار الموجودة فى البلد فى الأماكن المتوسطة
مش حسب راحة كل واحد النفسية فى اختياراته
أنا هابدأ بنفسى وأحدد .. عشان شكلكم خايفين من الحسد
مصاريف مدارس كالاتى
7 الاف جنية لكل ولد يعنى اجمالى 21 ألف جنية
800 جنية لبس مدرسة لكل ولد يعنى اجمالى ألفين ونصف
500 جنية ثلاث شنط للمدرسة
6 الاف جنية عربيات اهالى للتوصيل للمدرسة بواقع الفين جنية لكل ولد
الف جنية مستلزمات وكتب خارجية
يعنى مجموع مصارف المدارس 31 ألف جنية ..
يعنى فى الشهر 2500 جنية .. دى مدارس بس ...
اللبس الصيفى والشتوى والكوتشيات .. والولاد بتكبر والحاجة بتصغر
800 جنية لكل واحد فى السنة أى2400 جنية لثلاثة أولاد هدوم وكوتشيات
أى 200 جنية فى الشهر
1000 جنية فى الشهر فراخ ولحوم
1000 جنية سكر ورز وجبنة وزيت وخضار ..
300 جنية مواصلات
500 فواتير كهرباء ومياة وغاز وبواب
200 جنية أدوية .. منهم أدوية للضغط .. أساسى بعد كل ده
مش هاتكلم عن الطوارئ .. دكاترة .. أجهزة بتبوظ .. مناسبة فى العيلة
عيدية فى العيد ..
وطبعا الممنوعات .. مصايف .. حاجات حلوة .. اشتراك فى نوادى
يبقى كده محتاج حوالى 6 الاف جنية فى الشهر عشان تعيش عيشة متوسطة ومستور.
يعنى 6 الاف جنية بدون فسح ولا تحويش جنية لاى طوارئ.

---

كلام جميل جدا...حضرتك كده حاسبها على 3 اولاد...ربنا يبارك....يعني لو ولد واحد او ولدين المفروض المبلغ المتوسط من 3الاف الى 4
على كل حال الكلام اللي حضرتك كاتبه هو كلام منطقي و مقبول ...لكن لا تنسى المعنى الواسع لكلمة البركة

دا لو مفيش ايجار كمان

لو فيه إيجار شقة 6500 جنيه
لو شقة تمليك يبقى من 4500 الي 5500 جنيه
وهأقول لحضرتك في الاخر كل واحد بيكيف حياته وأسلوب معيشته علي حسب دخله

حضرتك لا هو نسبى و كل الناس عارفه يعنى حسبتك دى نفسها انا ممكن اقولك لا المدارس مش كلها كده فى الى مدخل الولد الواحد ب 11 الف و فى الى مدخله ب 1800 جنيه و مش كل الناس عندها 3 اولاد فى عنده 1 و 2 و 4 يعتى المتوسط الى حضرتك كاتبه ملوش علاقه بالمتوسط و العيشه المرتاحه بتاعه ناس تانيه

وصلتو ل 4500 او 6500 حسب فى ايجار ولا لا و انا بقولك انه فى ناس عايشه كويس و متوسطه بمرتب كله 2500 و فى ناس اعرفها شخصيا بتقبض 13 الف و مش مرتاحين خالص :) و دائمى الشكوى من الاسعار

نسبى جدا جدا و كل واحد فعلا بيكيف حياته على مرتبه و بيعيش

لو عندك 3 اولاد في مدارس ...وعيشة متوسطة

اعتقد الدخل ميقلش عن 7000 ل 10000 كمتوسط متفاوت من شخص لشخص

زي ما الناس قالت الموضوع نسبي جدا
هتلاقي الي مرتبه 1000 جنيه مزنوق والي مرتبه 5000 مزنوق والي مرتبه اكتر من 10000 برضو مزنوق
لان كل واحد بيسستم حياته علي المبلغ التقريبي الي بيكسبه
حضرتك مثلا قلت انك بتصرف حوالي 6000 في الشهر وكل الحاجات الي ذكرتها اساسيه مش هينفع تستغني عنها
لكن مثلا لو مرتبك اقل مثلا 4000 هتلاقي نفسك بتحاول توفر انك مثلا ممكن تنقل اولادك مدرسه ارخص
في نفس الوقت لو مرتبك زاد وبقي 10000 هتلاقي زاد عليك التزامات تانيه مثلا ساعتها هتفكر تغير عربيتك وتقسط عربيه هتاخد الزياده الي زدتها
من الاخر يا عزيزي كلنا مزنوقين

ياجماعه الف جنيه اه و 500 جنيه اه
اساسيات الحياه من اكل و شرب فول و طعميه و كشرى هتحتاج لاسره اربعه افراد مش اقل من 2000 جنيه
و هنا هتبقى فقير مش متوسط

واضح إن فيه ناس اختلط عليها الأمر بين الحياة المتوسطة وبين مفهوم الرضا
أنا لم أقصد بأى مبلغ تعيش فى حالة رضا .. لان الرضا هو شكر ربنا على نعم كتير غير الأكل والشرب
أنا كان قصدى الحياة المتوسطة اللى تسمح لك تدخل ولادك مدارس عادية وياكلوا بنسب عادية بدون رفاهية
اللى يقول إن ناس عايشه ب 2500 حياة متوسطة أولا حضرتك تقدر تعيش بالمبلغ ده حياة متوسطة
الموضوع مش استعراض لتجارب الآخرين .. الموضوع تجربة كل واحد الذاتية من غير ما اقول انا اعرف واحد عايش بكذا
اللى عايش ب2500جنية ده فقير مش عايش حياة متوسطة .. لكن مع الرضا برزق الله لايشعر بضجر من قلة راتبه .. ده طبعا لو بيتقى ربنا وعايش شريف .. ودول قليلين
لكن فيه كتير مرتباتهم أقل من 2000 جنية وبيعوض ده من استعلال الآخرين .. زى المدرسين بتوع الدروس الخصوصية اللى بيسقط العيل اللى ماياخدش عنده درس .. وغيره وغيره.
الهدف من الموضوع ليس استبيان مرتبات أو التعرف على طريقة ادارة الحياة
لكن الحقيقة الهدف كان .. هل لو حدثت مشكلة فى العمل وانخفض المرتب إلى أقل من الـ 5 الاف جنية
هل وقتها اتحول لمواطن فقير وانقل اولادى مدارس حكومية وأبدأ فى تدابير تقشفية مثل تغيير السكن
يعنى لو أنا ساكن فى مصر الجديدة أروح أسكن فى دهاليز فيصل .. أم أن الأمر يحتاج لتنظيم وهناك أوجه إنفاق لا داعى لها مخفيه عنى ؟؟؟؟؟

السكن اهم حاجه
ايجار و لا تمليك الاكل ممكن يتدبر بشكل ما
المداراس طبعا حسب دخلك و القرب من السكن
لو 5000 فى الشهر يبقى تحسب مصاريفك الثابته الضروريه زى الفواتير و التعليم و المواصلات و ايجار الشقه لو فى و تبدا تعرف الباقى كام و تشوف هتقدر تمشى بيه البيت ازاى
و لو حسيت بالعجز يبقى لازم تقرر ازاى تخفض من مصاريفك حسب اولاوياتك
يعنى فى ناس عندهم التعليم اهم من الاكل و الشرب و ناس العكس
ناس اهم حاجه الهدوم و الفسح
كل واحد و عنده اولاويات تختلف عن الناس التانيه
و الشاطر االى يحاول يكيف حياته بطريقه يكون فيها سعاده و رضا مع احتياجاته

اقتباس:

---

المشاركة الأصلية كتبت بواسطة amrgamal100

أبدا الموضوع مش نسبى ولا حاجة
احنا بنتكلم فى المتوسط حسب الأسعار الموجودة فى البلد فى الأماكن المتوسطة
مش حسب راحة كل واحد النفسية فى اختياراته
أنا هابدأ بنفسى وأحدد .. عشان شكلكم خايفين من الحسد
مصاريف مدارس كالاتى
7 الاف جنية لكل ولد يعنى اجمالى 21 ألف جنية
800 جنية لبس مدرسة لكل ولد يعنى اجمالى ألفين ونصف
500 جنية ثلاث شنط للمدرسة
6 الاف جنية عربيات اهالى للتوصيل للمدرسة بواقع الفين جنية لكل ولد
الف جنية مستلزمات وكتب خارجية
يعنى مجموع مصارف المدارس 31 ألف جنية ..
يعنى فى الشهر 2500 جنية .. دى مدارس بس ...
اللبس الصيفى والشتوى والكوتشيات .. والولاد بتكبر والحاجة بتصغر
800 جنية لكل واحد فى السنة أى2400 جنية لثلاثة أولاد هدوم وكوتشيات
أى 200 جنية فى الشهر
1000 جنية فى الشهر فراخ ولحوم
1000 جنية سكر ورز وجبنة وزيت وخضار ..
300 جنية مواصلات
500 فواتير كهرباء ومياة وغاز وبواب
200 جنية أدوية .. منهم أدوية للضغط .. أساسى بعد كل ده
مش هاتكلم عن الطوارئ .. دكاترة .. أجهزة بتبوظ .. مناسبة فى العيلة
عيدية فى العيد ..
وطبعا الممنوعات .. مصايف .. حاجات حلوة .. اشتراك فى نوادى
يبقى كده محتاج حوالى 6 الاف جنية فى الشهر عشان تعيش عيشة متوسطة ومستور.
يعنى 6 الاف جنية بدون فسح ولا تحويش جنية لاى طوارئ.

---

تقييم جمييل
حضرتك كمان نسيت الايجار الشهرى للسكن من 1000-3000 جنيه شهريا

وطبعا مع معدل تضخم سنوى 15% المبلغ بيزيد سنة عن سنة اذا لم يقابله زيادة فى المرتبات

من وجهة نظري المتواضعة مش اقل من 5000 وهتعيش في مستوي عادي كمان متوسط