الموضوع: زيت فتيس نوبيرا ؟؟

الفتيس بتاع النوبيرا موديله ZF 4HP 14 ... من إنتاج شركة ZF الألمانية

الفتيس ده ركب على عربيات فرنسية كتير.. أشهرها البيجو 405... والبيجو 305 .. والبيجو 205

https://en.wikipedia.org/wiki/ZF_4HP14_transmission

وواضح إن الفتيس ده مشاكله كتير للأسف... مجرد ما تعمل بحث في النت على موديله تلاقي النتايج كلها من نوعية "المشاكل والحلول"..

المهم... دايما أفضل زيت لأي مكنة هو المكتوب في كتالوجها...

وكتالوج النوبيرا بيقوللك تحط زيت بمواصفة ديكسرون III...





وديكسرون 3 ده أشهر زيت في السوق المصري... موجود باسم موبيل 320



وحسب الكتالوج .. الكمية المطلوبة 2.5 لتر.. ولو عايز تغير الزيت بالكامل (شامل محول العزم) تبقى الكمية 5.4 لتر..

وتغيره (مع الفلتر بتاعه) في حالات الاستخدام الشاق كل 20 ألف كيلومتر أو كل سنة... أيهما أقرب.


وعلشان تبقى عارف إيه هو الاستخدام الشاق للفتيس الأوتوماتيك في النوبيرا... فالكتالوج بيقوللك:

1- القيادة في الطرق المزدحمة داخل المدن حيث تزيد درجة الحرارة الخارجية عن 32 درجة مئوية.
2- القيادة على الطرق المرتفعة والجبلية
3- عند تكرار استخدام السيارة في السحب والقطر
4- الاستخدام الخاص مثل سيارات التاكسي والشرطة وخدمات النقل والتوصيل.

لو عايز تتعرف على عربيتك أكتر.. أنصحك تنزل كتالوج العربية من الموضوع ده:
http://www.nilemotors.net/Nile/14170...c-edition.html


...

المشاركة الأصلية كتبت بواسطة abo_mahmoud

يا بشمهندس الف مليون شكراً على المعلومات القيمه دي
بس انا راجل بسيط عمري ما هشتغل ميكانيكي ولا ليه ف الهندسه

العربيه اتوماتيك موديل 2001 نوبيرا2 كوري

المطلوب صوره لمكان تغيير زيت الفتيس ..
عشان البيه الميكانيكي بيقولي مابيتغيرلوش زيت ولا ليه طبه حنى عشان نقيسه دا انت تخلص عليه وترميه وتجيب غيره ..

صوره لمكان قياس زيت الفتيس وتغييره ..

وسكراً

على فكرة يا فندم.. كل المعلومات اللي قلتها لحضرتك دي ما فيهاش أي معلومة هندسية.

الكلام ده أنا جايبه من كتالوج العربية اللي بينزل معاها.. واللي المفروض أي مالك عربية يقراه علشان يعرف يستخدم عربيته ويستفيد منها على أفضل وجه.

ملخص كلامي إن زيت الفتيس مع الفلتر بيتغير كل 20 ألف... ونوع الزيت موجود في كل مكان.

ورأيي تغير الميكانيكي اللي بتتعامل معاه وتشوف حد بيفهم في الفتيس الأوتوماتيك.


للأسف أنا مش معايا العربية .. وبالتالي مش حعرف ألبي طلب حضرتك بتاع الصورة... وممكن حد من الزملا يفيدك..


أرجو إنك تعدي بردو على الموضوع ده:
http://www.nilemotors.net/Nile/434256-a.html


...