الموضوع: مشكلة زوجية

السلام عليكم ورحمة الله وبركاته

أنا عضو قديم معكم في المنتدى الفاضل ولكن سجلت باسم مختلف حفاظا على الخصوصية لعرض المشكلة فقط

ولكن الي دفعني للتسجيل وكتابة الموضوع هي مشكلة شخصية مع زوجتي احترت استشير مين فيها

أنا عندي 37 سنة، متزوج من خمس سنين وربنا رزقنا بطفلين توأم ربنا يباركلي فيهم
زوجتي تعرفت عليها بالصدفة البحتة، انا شغال في مكان يعني برستيجه عالي شوية (وهقول ليه وصفته كدة لاحقا) وهي كانت بتقدم السي في بتاعها آملا انها تلاقي شغل، قريت ملفها وشوفت صورتها وبدات ادور عليها وحصل بينا حوار فنقاش فتعارف، فعمك كيوبيد دخل في النص وانتهى الموضوع بالتهاني والزغاريد

في الاشهر الاولى من الجواز، بسيبها عادي بتتكلم مع اختها الي اكبر منها لأنهم مرتبطين جدا جدا ببعض، وعادي جدا بالنسبة لي مفيش اي مشاكل انا سايبها براحتها تعمل ما بدا لها.

ولكن لاحظت من خلال كلامها مع اختها ان حديثهم كلهم بيدور حوالين الأكل، ايوة بالظبط زي ما حضرتك قرأتها كدة... الأكل فقط

يعني الحوارات بينهم كلها على سبيل المثال:

- شوفتي حورية الجنة على فتافيت طبخت ايه النهاردة؟
- شوفتي الشيف مش عارف مين الأكل الي عمله؟
- ده انا دخلت على النت وعرفت ان الي مش عارف ايه مغذي كدة على فكرة؟
- انا دخلت المطبخ النهارده وطقت في دماغي وعجنت وخبزت مش عارف ايه وطلعت حلوة جدا ومقادريها كذا وطريقتها كذا
- شوفتي سالي فؤاد والتورتة الي عملتها
- وتتصل بوالدتها تقولها انا شوفت النهارده في التليفزيون حلقة مش عارف مين طبخ مش عارف ايه وكتبت مقاديرها ووصفتها يا ماما !!
مبتتفتحش النت واليوتيوب الا عشان تتفرج على وصفات أكل والشيف مش عارف مين والكلام ده

وهكذا، محور حياتهم واهتمامها هي وأختها او عائلتها بمعنى أخص (وده الي اكشتفته بالعشرة) هو الأكل، اهتمامهم بالتغذية والأكل هو المرتبة الأولى عندهم، وكأن في نيزك هيضرب الكوكب وهنفطس كلنا من الجوع ومش هنلاقي أكل فبيلحقوا يعملوا كل ماهو يتعلق بالأكل

في الزيارات المتبادلة يدخلوا المطبخ يعملوا اشكال واصناف من المخبوزات
قعدتهم مع بعض وفي شرب الشاي كلامهم يا اما عن احوال العائلة بشكل عام يا اما اصناف الأكل والفيتامينات وده مفيد للمخ وده مفيش للكبد وده مفيش لمش عارف ايه

خارجين جنينة كلنا احنا واختها واولادها ، يبقى ناخد معانا اكل كما أنزل، لازم سندويتشات كفتة او فراخ بانيه او لحمة مفرومة للعيال، يا ستي هو العيل لو مكلش لحمة وبروتين هيقع من طوله؟ مفيش سندوتشات بطاطش بوريه، جبنة بطماطم، فول

لالالا مينفعش العيل بيجري وبيلعب ولازم يتغذى وياكل، يا نهار مش فايت على الأكل وسنينه !!!!

أكل أكل أكل أكل

ومع العلم، أن زوجتي مش مثلا تخينة او حاجة او انها شرهة في الأكل لا عادي خالص أكلها في حدود المعقول جدا، بس اهتمامهم بالأكل وتغذية العيال حاجة تكاد تكون مرضية وهسهس، وده سلو أسرتها.

---------------
مشكلتي مع زوجتي تتلخص في:

الاهمال، هي مهملة في نفسها تقريبا من كل النواحي.. تقريبا تقريبا يعني

من اول ما تصحى من النوم لحد ما تنام وهي رابطة شعرها ديل حصان، وكم مرة أقولها بهزار طبعا وبضحك عشان ماسببش ليها اي حرج او حاجة: ماتفكي ديل القرد الي انتي عاملاه ده، فكيه وخلي شعرك نازل كدة بطبيعته حتى بيبقى شكلك كتكوت كدة وعسلية

يا تفكه وهي مضايقة يا اما مترضاش فبسكت ومبضغطش عليها بزيادة

قولتلها في مرة هو مفيش غير ديل الحصان ده، طيب ما تسرحي شعرك على جنب كدة هاتيه يمين هاتيه شمال نزليه كله لقدام زي العفاريت اي حاجة يعني غيري من شكلك شوية، تقولي لا هو كدة مريحني !!! وارجع اسكت برضه

كنا بنتفسح في سبينيس سيتي ستارز قبل ما يقفل وعدينا على قسم العناية بالشعر وكدة وعملتلها مفاجأة واشتريتلها سشوار من غير ما تعرف اني حاطه في عربية الترولي، واحنا بنحاسب عن الكاشير فشافته فبتقولي ايه ده لزمته ايه طيب!!

انا تنحت لها شوية قولتلها انا شاريه عشان انشف بيه الهدوم لما الدنيا تمطر يا هانم، انكسفت وسكتت

قولت في بالي هجيبلها السشوار اخليها تاخد شاور واقعد انا اعملها شعرها بيه يبقى مفرود كدة وشكله جميل او اي تغيير اي حاجة تتعمل بدل ماهو عمل زي المضروب سلكين كهربا

والله العظيم السشوار مشتغلش غير مرة واحدة بعد ما اشتريته عشان اجربه واشوفه هو شغال كويس ولا حاجة، وبقاله 5 سنين من يوم ما اتجوزنا وهو مركون في الدرج، للأسف الشديد، يعني هي نفسها مفكرتش تطلعه وتجربه تعمله لنفسها وتغير من شكلها

كان عندها علبة مكياج، اذكر اذا لم تخني الذاكرة ان هما مرتين تلاتة الي استخدمت فيهم قلم الروج، لحد ما صلاحية العلبة نفسها خلصت وارتمت، ومن خمس سنين لحد النهارده معندهاش علبة مكياج اصلا ولا حتى قلم كحل، مفكرتش ولا جه في بالها انها تشتري لنفسها حاجة منها

مرة واحنا خارجين عدينا على صيدلية العزبي وسحبتها ورايا ووقفنا قدام علب الوان الشعر، قعد انا وهي نختار لون لعشرها تصبغه وتعمل اي تغيير كدة في اي حاجة يا اخوانا، اشترينا العلبة بعد خناقة وبعد تصميم مني

العلبة فضلت مركونة في الدرج عندها حوالي سنتين تقريبا او سنة ونص، دخلت عليها مرة لقيتها بتروق الادارج والعلبة مرمية في باسكت الزبالة، بقولها رمتيها ليه، قالتلي اصل صلاحيتها خلصت خلاص !!!

بقعد انا وهي نتفرج على مسلسلات او افلام مع بعض وكدة وحالوت حتى اثير فيها الغيرة عن عمد واقولها يا سلام شايفة الممثلة وشايفة قصة شعرها ولونه، على فكرة حلو المكياج السيمبل الخفيف الي هي عملاه ده، وهكذا وحاجات من دي، كل الي بتعرف تعمله انها تضايق وتعلق تعليق ملهوش لزمة وبس، وهي فاهمة كويس انا اقصد ايه، ومع ذلك مفيش اي مبادرة منها لاي حاجة، للاسف برضه

كم مرة اقولها طيب روحي الكوافير اعملي كيراتين مثلا واصبغيه هناك، غيري قصة شعرك اعمليه كاريه او احلقيه قرعة او اي حاجة، ولا حياة لمن تنادي

في خلال الخمس سنين جواز راحت للكوايير مرتين بس، وهي شافتني انا قد ايه كنت طاير من الفرحة لما دخلت عليا وقلعت الايشارب ولقيت شعرها جميل وكدة وبقيت طول اليوم عمال اعاكس فيها واقولها قد ايه هي جميلة وشكلها امورة وزي القمر وكلام من ده وهي انبسطت، يومين تلاتة وكل حاجة رجعت لأصلها طبعا

بالنسبة لمكان شغلي الي ذكرته في بداية الكلامي، هو اني للاسف في شغلي بشوف بنات اشكال والوان سواء اجانب او مصريين، وانتو عارفين البنات برة بيبقو عاملين ايه في نفسهم في شكلهم ودلعهم ولبسهم ومكياجهم وكل ده، وساعات كتيرة وانا قاعد معاها لمحتلها للكلام ده عن طريق الهزار ومرة عن طريق الجد والهزار في النص علشان الموضوع ميتقلبش لزعل، يعني انا حتى بخاف على زعلها لانها طيبة جدا وست بيت شاطرة

بس الحياة يا جماعة مش كلها اكل، الحياة مش هتنتهي لو مكلناش مخبوزات وسندويتشات لحمة وبانيه، الاشكال الي برة صعبة والي في شغلي وحواليا وفي المواصلات وكم مرة فتحت الموضوع ده معاها، قولتلها يعني اي بنت بينها وبين نفسها بتحب تبان جميلة لنفسها مش علشان حد تاني حتى وهي لسة في بيت ابوها بتحب تقف قدام المراية تقعد تسرح في شعرها تجرب تحط لنفسها اي بوية على وشها، وللاسف ردودها كلها صادمة، تقولي انا عمري ما وقفت قدام مراية ولا سرحت شعري من وانا في بيت بابا، يا نهار اسود، يعني عمرك ما وقفتي قدام المراية بعد ما تاخدي شاور كدة تظبطي نفسك وشعرك وتجبيه كدة ولا كدة ولا تحطي اي ورنيش على وشك حتى وتشوفي نفسك في المراية تقولي لالالالا خالص ماما كانت بتعتبر الحاجات دي خلاعة وقلة أدب وكلام فارغ!!! لا وكمان بتقولي لالالا دي بإستنكار وكأني بقولها حاجة سافلة وقلة ادب او بقولها كلام خارج!!

ببقى هاين عليا اخرج اربط نفسي على اي قضيب قطر يعدي عليا لما بسمع منها الكلام ده

حتى واحنا خارجين برة مع بعض بتعمد اشاورلها بيني وبينها على بنت الاقيها مهتمية بنفسها وبمكياجها حتى لو مكانتش محجبة وفي الاخر ولا هي هنا، وكم مرة اقولها يعني بدل مانتي فاتحة اليوتيوب على الاكل والطبيخ، افتحي شوفي ربطة ايشارب حلوة، افتحي فيديو يعلمكك تعملي مساكات لشعرك ولا لوشك ولا اتعملي ازاي تحطي مكياج، اتفرجي على حلقات برامج بتاعة العناية بالبشرة ولا بتاعة الموديل مين ومش عارف مين... وفي الاخر بكلم نفسي

مراتي زي مابتصحى من النوم اول اليوم زي ما بتنام اخر اليوم، هي نفس ربطة شعرها وهي نفس هدومها وهي نفس كل حاجة، وامبارح زي النهارده زي بكرة زي من سنة فاتت وزي سنة جاية قدام لسة، هي ست بيت شاطرة ومهتمية بنضافة بيتها ومهتمية بالاولاد وطيبة واخلاق وذوق وكل حاجة وفيها من الصفات الطيبة الكتير

ولكن هي الحياة بتبقى صحرا كدة؟ هو انا الي ببالغ في طلباتي؟ هو انا الي بطلب حاجات صعبة تتعمل، امال الي بنشوفهم في الشغل وفي الشارع دول من كوكب ايه؟ ماهو اكيد البنت الي بتحب تنزل في الشارع وهي مهتمية باناقتهاو مكيجاها مهما كان بسيط وخفيف جدا اكيد في البيت هي برضه كدة حتى لو اقل القليل، انا مبقولش لمراتي خليكي على سنجة عشرة 24 ساعة ولا بطلب منها مستحيلات

هي شايفة ان كلامي كله تفاهات وملهوش لزمة، يعني ايه اصبغ شعري ولا اهتم بوشي ولا احط مكياج علشان المتعوس الي اسمه جوزي ده يعني، ايه المشكلة لما افضل رابطة شعري من اول ما اصحى لحد ما انام ولا كوافير ولا تسريح شعر ولا وجع قلب، حت ىلما تلاقيني ساعات كتيرة بنكشها على موضوع عدم اهتمامها باي حاجة تخصها تقولي باه هو كدة برضه، مااااشي، وفي الاخر ولا الهوا

محدش يقولي روح اتجوز لان الظروف متسمحش ولو سمحت فعلا كنت هعملها وحتى قولتلها الكلام ده، الواحد لو ظروفه تسمح يروح يتجوز وخليكي انتي في الطبيخ والخبز والعجن وانا اروح اشوف واحدة تسرح شعرها ولا بتغير من شكلها، خليكي انتي للعيال وللبيت واروح اشوف واحدة للدلع، طبعا كل كلامي ده كان بهزار وكنت بقوله لها وانا بضحك عشان تفهم اني مبتكلمش جد ولا حاجة

مع العلم، اني في البيت ايدي في اي مراتي في كل حاجة وبساعدها وساعات انا الي بدخل اعمل الغدا او اشطب المواعين وانا المسؤول بشكل كامل عن نضافة البيت نفسه والتميع الخشب ونضافة الارض، وكل طه لاني بحب اقعد في مكان نضيف وبعمل كل ده عن طيب خاطر جدا مش اجبار ولا اي حاجة، يعني مراتي مثلا مش ملخومة في البيت ومش ملاحقة على طلباتي انا والعيال ومش لاقية وقت لنفسها لا خالص نهائيا

دي مشكلتي واسف على الاطالة

ياريت حد من الاخوة الأفاضل وأصحاب العقل والحكيم والرأي السديد يفديني اتصرف معاها ازاي، كلمتها كتير ولمحت لها اني مضايق فعلا بسبب الاهمال في نفسها بالشكل ده مرة بهزار ومرات كتيرة بالجد بس من غير زعيق او خناق ولا حاجة بس هي بتشوف على وشي اني مضايق وبس، وهي باه ياريتها بتتحرك او بتحاول تعمل حاجة لا هي بتزعل مني عشان انا مضايق منها اصلا بسبب كدة، مش انها تحاول تصلح من نفسها

متشكر جدا لحضراتكم

سبحان الله

انا عندى المشكلة بالعكس تماما يعنى زوجتى بتكرهه حاجة اسمها المطبخ ونفسى ولو مرة واحدة قبل مموت اكل اكلة حلوة ولا صينيةحلويات من ايد مراتى لانى بقرف من اكل الشارع ومرةمن زمان اشتريت بيتزا من محل محترم جدا ولاقيت فية ضفر رجالى طولة متر فى عجينة البيتزا والله العظيم ومن محل مشهورجداجداا
ثانيا
مفيش انسان كامل وصدقنى انت فى نعمة فى غيرك محروم منها كتير وكل الستات خد بالك كلامهم دايما هايفوملوش لازم مش مراتك بس حتى لو كانت دكتورةهتلاقى كلامهاسخيف وهايف


اخيراحل مشكلتك وخدها من اخوك لانى بعرف صنف النسوان كويس جداجدااااااا

الحل ان مراتك ترجع تشتغل تانى وصدقنى اول ما هتنزل الشغل تهتم بمنظرها لانها هتغير جداجدا من الحريم اللى فى الشغل خصوصا لو كانت معاك فىشغلك وخدها منى كلمة لا يؤدب المراءة الا المراءة

وهتهتم بشكلها لدرجة انك انت نفسك هتطلب منها تبطل تحط مكياج وتتزوق ليك من كتر اهتمامها بنفسها وبكرة تشوف وصفة ابلة نظيرة ههههههه

لكن تقول اختها تكلمها او انت تكلمها ممكن تتغير يومين تلاتة وترجع تانى لاصلهااو هتعمل حاجة غصب عنها وملهاش اى طعم ولا ريحة

اسمع كلام ىوخليها تشتغل ساعتها هتشوف المكياج اللى على اصولة

عذرا لطريقة كلامى بس اللى شفتة فى حياتى كتيرجداااا