المشاركة الأصلية كتبت بواسطة memo_sms
بوص ياباشا نفس اللى انت فيه دلوقت ده انا مريت بيه اول السنه تقريبا بس فى السعوديه
وفعلا الخيارات صعبه مش بالسهوله اللى الناس متخيلاها والعربيات اللى شوفتها كالتالى
كيا كارينز 1600, حلوه وواسعه وفى منها نسختين بس سعرها عالى وامكانياتها اقل من مصر وواطيه جدااا على الارض, يعنى لو نزلت مصر هتتهان من المطبات لحد ما تشتكى.
كيا سبورتاج مكنش في منها 1600 ساعتها, دلوقت نزل نسختين النسخه العاديه فقيره شويتين يعنى اربع عجلات ودريكسيون انا محبتهاش, والافضل النسخه الاعلى اللى بتنزل بتربو لكن سعرها مبالغ فيه 90 الف على الاقل.
هيونداى كريتا تقفيل هندى عربيه عاليه جداااا وواسعه جداااا لكن تقفيل وخامات مش اد كده وانا حاسيت ان فى حاجه غلط فى سواقتها مش مرنه فى الملفات, بس سعرها مناسب جدااا على امكانياها, وهتنتشر بقوه.
فورد ايكو سبورت,تقفيل هندى زى الكريتا بالظبط مع موتور 1500 الا ان ملهاش مستقبل على العكس الكريتا منتشره وهتكتر جداااا, لو هتختار بينهم الكريتا افضل
رينو كابتشر, جميله جداا وراقيه وواسعه وعاليه, 1200 سى سى لكن بالتربىو اداءه حلو زى 1600 مشكلتها انها مش هتنتشر عشان صناعه اوروبى (اسبانى) و سعرها عالى, وخوف الناس من جمله 1200 سى سى
نيسان جوك, يابانى وعاليه على الارض وسريعه وناعمه ماشاء الله عيبها انها ضيقه
.
انا جبت الجوك الصراحه لانها افضل الخيارات وقتها بالنسبه ليا وكنت حابب شكلها كمان ولانى مش عايز ابقى متضايق وانا راكب عربيه جايبها عشان لما اجى ابيعها بعد 5 سعرها مش عارف هيحصله ايه
عشان كده نصيحتى ليك هات العربيه اللى تحب تسوقها, ارضى نفسك اولا, عشان متعش متكدر مع عربيه جبتها لاى اعتبارات تانيه.