استفسار بخصوص السيارات الفان والملاگى
بسم الله الرحمن الرحيم
دلوقتى يا جماعة ما خاب من استشار والمشورة لإهل الخبرة مفيدة وكنت محتاج ارأكم معايا
دلوقتى انا معايا مبلغ من بين ٧٠ الى ٧٥ الف وزى ما حضراتكم شايفين حال البلد فى الشغل المرتبات ما تكفيش مصاريف فرد واحد كلها ما بين ١٠٠٠ الى ١٢٠٠
المهم قررت انى افكر فى مشروع من مشروعين
الاول :
انى اجيب عربية فان مكيفة شانا نيو ستار او جنباى x30
ومحتاج حد يعرفنى انهى واحدة فيهم كويسة وبتاعت شغل وخصوصا ان شانا توكيلها مودرن موتورز بتاع سوزوكى توكيل كويس نسبيا
والجنباى توكيلها برليانس توكيل برضو محترم
فى ناس هتقولى هات سوزوكى فان عادية عشان قطع الغيار و سهلة فى الصيانة هقولهم تمام بس الصيف فى مصر بقى زى الخليج وفعلا العربية اللى مش فيها تكييف ده اسمه عذاب مش شغل
وكنت عاوز اعرف شغلها فى الشركات ونقل الافراد و دورات المدارس هل هتبقى جايبة همها ولا برمى الفلوس محتاج جدا جدا مشورتكم فى الموضوع ده
الموضوع التانى :
انى ادفع المبلغ ده مقدم عربية ملاكى تكون كويسة بيجو ٣٠١ او هيونداى اكسنت
المهم عربية تكون فيها ايرباج و ABS وانزل بيها شغل كريم واوبر وهل حد هنا جرب انو ينزل بعربيته فعلا وشاف نتيجة كويسة تستحق انى اجازف واعمل كده ولا لا
واسف جدا على الاطالة والكلام الكتير بس فعلا محتاج رأيكم معايا بجد لأن الوقت بيجرى وانا داخل على جواااااز يعنى جحيم فلوس ...
والسلام عليكم ورحمة الله وبركاته
