فوانيس العربيات معمولة بهندسة عالية.. وليها غرض واضح ما ينفعش نلعب فيه..

الفوانيس مش مجرد شكل حلو للعربية بيطلع نور وخلاص... إنما النور ده محكوم بكذا شرط...

1- ينور الطريق لمسافة كافية قدامك.
2- ينور على اليفط والعلامات اللي على جنب الطريق.
3- ما يجيش في وش العربيات اللي جاية الطريق المقابل.

علشان كده.. الإضاءة اللي طالعة من فانوس العربية (النور الأوسط تحديدا) بيبقى ليها شكل محدد..

معرفش إذا حضرتك أخدت بالك ولا لأ... بس ما حسيتش مرة إن العربية المقابلة لو كانت على شمالك بيبقى نورها مقبول.. ولو كانت على يمينك نورها بيبقى قوي ومش قادر تستحمله؟؟؟؟

ده الطبيعي على فكرة.. لإن الإضاءة اللي طالعة من الفانوس بيبقى شكلها كده:




والضوء المايل على الجنب ده له غرض.. إنه ينور على اليفط الموجودة على يمين الطريق (في الدول اللي عندها يفط)

وغالبا بتلاقي العربية منورة الطريق بالشكل ده:




وعلشان تنور الطريق بالشكل ده... لازم اللمبة الداخلية تتحط في مكانها الصح اللي يخلينا نستفيد بكل الضوء اللي طالع من الفانوس و"نوجهه" زي ما احنا عايزين...




لو اللمبة حصل فيها تغيير في شكلها أو في مقاساتها... الضوء مش هينعكس زي ما احنا عايزين لإن مركز الضوء ما بقاش في بؤرة العاكس.




زمان كانت باغة الفوانيس الأمامية عليها تعريجات.. والتعريجات دي هي اللي بتوجه الضوء بحيث يطلع زي الصور اللي فوق




المشكلة الأساسية بتاعتها إن الباغة لما بتتكسر الفانوس بيفقد توجيه الإضاءة بتاعه.

دلوقتي الباغة بقت بتتعمل من البلاستيك... وبقت العواكس هي اللي فيها التعريجات






الحاجة اللي أغلب الناس كمان مش عارفينها إن إضاءة الفوانيس ليها رجلاش...


يعني بعد ما نتأكد من إن كل اللي فات ده سليم... نقدر كمان نظبط اتجاه الإضاءة بحيث تنور صح..

والضبط ده غالبا بنحتاجه بعد:

تركيب فانوس جديد
سمكرة في منطقة الفانوس
تغيير السوست
تغيير مستوى ميل العربية أثناء التحميل

ودلوقتي الفوانيس الجديدة بقى فيها ضبط تلقائي لارتفاع الإضاءة (من زرار تقدر تتحكم فيه من التابلوه).


وضبط الفانوس ليه خطوات معينة لازم تتبعها...

بس خد بالك إنك لازم توقف العربية في مكان واسع نسبيا ويكون فيه حائط مستوي وأرضه مستوية تماما (محطة بنزين مثلا أو جراج) ولازم تعمل عملية الضبط بالليل..

خطوات الضبط:
1- وقف العربية ووشها ملاصق للحائط

2- ارسم علامة (+) واضحة وكبيرة على الحائط على مركز أقوى بقعة ضوئية قصاد كل فانوس.



3- رجع العربية للخلف مسافة حوالي 7.5 متر (25 قدم).



4- المفروض تلاقي الضوء بقى في أسفل منتصف علامة (+) اللي رسمتها بحوالي 5-7 سم (حسب العربية) .. زي الرسم ده:



5- لو كان الضوء مش زي الرسم.. يبقى لازم تشوف فين مسامير الرجلاش في الفانوس وتبدأ تظبطها..

6- غطي فانوس من الاتنين بفوطة.. وابدأ اضبط الفانوس التاني

كل فانوس فيه مسمارين... واحد بيحرك الإضاءة في الاتجاه الرأسي (فوق/تحت).. وواحد بيحركه في الاتجاه الأفقي (يمين/شمال)



7- اطلع جرب العربية على الطريق... لو حسيت إن الإضاءة مش متوجهة كويس حاول تعرف فين المنطقة اللي عايزة إضاءة أكتر وبعدين ارجع واضبط الفانوس مرة تانية.

وهكذا لحد ما توصل لوضع مرضي... وخد بالك كويس علشان ماتوجهش النور بطريقة تؤذي اللي جاي في المقابل على شمالك.


في أغلب الأحوال... لو فانوسك مضبوط صح وبتستخدم اللمبة الصح .. مش هتحتاج تزود إضاءة الفانوس ولا تجيب لمبات بـ"وات" أعلى.


خلي بالك... فيه فوانيس استعمال في السوق.. بتبقى جاية من اليابان.. الهند .. انجلترا.. أستراليا...

الفوانيس دي ما تركبهاش..

علشان توجيه الإضاءة بتاعها عكسنا .. العالي بتاعهم ناحية الشمال... لإن الدركسيون بتاعهم يمين..

فالإضاءة عندهم بيبقى شكلها كده..



ولو جبت الفانوس ده.. يبقى كده كل الضوء هييجي في وش العربية المقابلة ... وخد بقى شتايم من كل اللي يقابلك...

ولو محترم شوية هيدعي عليك.. ودي أسوأ لو ربنا استجابله.



ملخص الكلام..

لما تكون التعقيدات دي كلها موجودة في الفانوس... فالافتكاسات في التعامل معاه من غير ما تبقى فاهم ما تنفعش بتاتا... لإنك هتبوظ كل الحسابات اللي فاتت.. وغالبا مش هتستفيد حاجة لإن النور بردو مش منور كويس.

وعلى فرض إنها نورت زيادة في منطقة معينة... فهتلاقيها كمان نورت في مكان المفروض ما تنورش فيه أصلا.. زي الإضاءة في أوجه السائقين المقابلين.


من الآخر... إذا ما كنتش فاهم الكلام اللي فوق ده... سيب الفانوس زي ماهو وما تفتكسش.


...