الافتكاسات في الفوانيس... افهم قبل ما تعدل

فوانيس العربيات معمولة بهندسة عالية.. وليها غرض واضح ما ينفعش نلعب فيه..

الفوانيس مش مجرد شكل حلو للعربية بيطلع نور وخلاص... إنما النور ده محكوم بكذا شرط...

1- ينور الطريق لمسافة كافية قدامك.
2- ينور على اليفط والعلامات اللي على جنب الطريق.
3- ما يجيش في وش العربيات اللي جاية الطريق المقابل.

علشان كده.. الإضاءة اللي طالعة من فانوس العربية (النور الأوسط تحديدا) بيبقى ليها شكل محدد..

معرفش إذا حضرتك أخدت بالك ولا لأ... بس ما حسيتش مرة إن العربية المقابلة لو كانت على شمالك بيبقى نورها مقبول.. ولو كانت على يمينك نورها بيبقى قوي ومش قادر تستحمله؟؟؟؟

ده الطبيعي على فكرة.. لإن الإضاءة اللي طالعة من الفانوس بيبقى شكلها كده:

http://nileup.com/up/uploads/nilemotors_14725608241.png


والضوء المايل على الجنب ده له غرض.. إنه ينور على اليفط الموجودة على يمين الطريق (في الدول اللي عندها يفط)

وغالبا بتلاقي العربية منورة الطريق بالشكل ده:

https://www.hotrodhotline.com/sites/...ts%20MD-18.jpg


وعلشان تنور الطريق بالشكل ده... لازم اللمبة الداخلية تتحط في مكانها الصح اللي يخلينا نستفيد بكل الضوء اللي طالع من الفانوس و"نوجهه" زي ما احنا عايزين...

http://www.vwt4forum.co.uk/picture.p...ctureid=239065


لو اللمبة حصل فيها تغيير في شكلها أو في مقاساتها... الضوء مش هينعكس زي ما احنا عايزين لإن مركز الضوء ما بقاش في بؤرة العاكس.

http://www.k1tyres.co.uk/images/bulb-1.jpg


زمان كانت باغة الفوانيس الأمامية عليها تعريجات.. والتعريجات دي هي اللي بتوجه الضوء بحيث يطلع زي الصور اللي فوق

http://www.carid.com/images/articles...-headlamps.jpg
http://www.carbodyparts.net/images/p...new/sb6014.jpg

المشكلة الأساسية بتاعتها إن الباغة لما بتتكسر الفانوس بيفقد توجيه الإضاءة بتاعه.

دلوقتي الباغة بقت بتتعمل من البلاستيك... وبقت العواكس هي اللي فيها التعريجات

http://monsterautoparts.com/Toyota/H...HT%2004-06.jpg
https://www.hotrodhotline.com/sites/...ts%20MD-23.jpg



الحاجة اللي أغلب الناس كمان مش عارفينها إن إضاءة الفوانيس ليها رجلاش...


يعني بعد ما نتأكد من إن كل اللي فات ده سليم... نقدر كمان نظبط اتجاه الإضاءة بحيث تنور صح..

والضبط ده غالبا بنحتاجه بعد:

تركيب فانوس جديد
سمكرة في منطقة الفانوس
تغيير السوست
تغيير مستوى ميل العربية أثناء التحميل

ودلوقتي الفوانيس الجديدة بقى فيها ضبط تلقائي لارتفاع الإضاءة (من زرار تقدر تتحكم فيه من التابلوه).


وضبط الفانوس ليه خطوات معينة لازم تتبعها...

بس خد بالك إنك لازم توقف العربية في مكان واسع نسبيا ويكون فيه حائط مستوي وأرضه مستوية تماما (محطة بنزين مثلا أو جراج) ولازم تعمل عملية الضبط بالليل..

خطوات الضبط:

1- وقف العربية ووشها ملاصق للحائط

2- ارسم علامة (+) واضحة وكبيرة على الحائط على مركز أقوى بقعة ضوئية قصاد كل فانوس.

http://nileup.com/up/uploads/nilemotors_14725637141.png

3- رجع العربية للخلف مسافة حوالي 7.5 متر (25 قدم).

http://www.porscheownersmanuals.com/..._232_img_2.jpg

4- المفروض تلاقي الضوء بقى في أسفل منتصف علامة (+) اللي رسمتها بحوالي 5-7 سم (حسب العربية) .. زي الرسم ده:

http://nileup.com/up/uploads/nilemotors_14725638701.png

5- لو كان الضوء مش زي الرسم.. يبقى لازم تشوف فين مسامير الرجلاش في الفانوس وتبدأ تظبطها..

6- غطي فانوس من الاتنين بفوطة.. وابدأ اضبط الفانوس التاني

كل فانوس فيه مسمارين... واحد بيحرك الإضاءة في الاتجاه الرأسي (فوق/تحت).. وواحد بيحركه في الاتجاه الأفقي (يمين/شمال)

http://ww2.justanswer.com/uploads/AM...adjustment.jpg

7- اطلع جرب العربية على الطريق... لو حسيت إن الإضاءة مش متوجهة كويس حاول تعرف فين المنطقة اللي عايزة إضاءة أكتر وبعدين ارجع واضبط الفانوس مرة تانية.

وهكذا لحد ما توصل لوضع مرضي... وخد بالك كويس علشان ماتوجهش النور بطريقة تؤذي اللي جاي في المقابل على شمالك.

في أغلب الأحوال... لو فانوسك مضبوط صح وبتستخدم اللمبة الصح .. مش هتحتاج تزود إضاءة الفانوس ولا تجيب لمبات بـ"وات" أعلى.


خلي بالك... فيه فوانيس استعمال في السوق.. بتبقى جاية من اليابان.. الهند .. انجلترا.. أستراليا...

الفوانيس دي ما تركبهاش..

علشان توجيه الإضاءة بتاعها عكسنا .. العالي بتاعهم ناحية الشمال... لإن الدركسيون بتاعهم يمين..

فالإضاءة عندهم بيبقى شكلها كده..

http://i2.photobucket.com/albums/y50...mingStep4a.jpg

ولو جبت الفانوس ده.. يبقى كده كل الضوء هييجي في وش العربية المقابلة ... وخد بقى شتايم من كل اللي يقابلك...

ولو محترم شوية هيدعي عليك.. ودي أسوأ لو ربنا استجابله.



ملخص الكلام..

لما تكون التعقيدات دي كلها موجودة في الفانوس... فالافتكاسات في التعامل معاه من غير ما تبقى فاهم ما تنفعش بتاتا... لإنك هتبوظ كل الحسابات اللي فاتت.. وغالبا مش هتستفيد حاجة لإن النور بردو مش منور كويس.

وعلى فرض إنها نورت زيادة في منطقة معينة... فهتلاقيها كمان نورت في مكان المفروض ما تنورش فيه أصلا.. زي الإضاءة في أوجه السائقين المقابلين.


من الآخر... إذا ما كنتش فاهم الكلام اللي فوق ده... سيب الفانوس زي ماهو وما تفتكسش.


...

موضوع جميل

بس أنا عايز أفتكس
الإضائة حاسسها مش دايما كافية
ساعات بحتاج إضائة أقوى

اقتباس:

---

المشاركة الأصلية كتبت بواسطة sherif_mahalla

بس أنا عايز أفتكس
الإضائة حاسسها مش دايما كافية
ساعات بحتاج إضائة أقوى

---

كنت زمان باستعمل لمبات المانى 150 على 240 .. بس لازم تركب كتاوت

بس ممكن تحتاج تغير لمبات كل فتره ( يعنى بعد فترات طويله ) .. و دى لمبات عاديه سعرها رخيص

اقتباس:

---

المشاركة الأصلية كتبت بواسطة sherif_mahalla

بس أنا عايز أفتكس
الإضائة حاسسها مش دايما كافية
ساعات بحتاج إضائة أقوى

---

أنا مش بقوللك ما تعدلش..

كل اللي بقوله إننا ﻻزم نفهم احنا بنعمل إيه الأول.. وبعدين نبقى نعدل على أساس سليم..

وقبل ما تفكر في أي تعديل.. اتأكد إنك بتستخدم اللمبة الصح بنفس أبعاد الفبريكه... واضبط التوجيه صح.. وبعد كده زود الإضاءة زي ما انت عايز...

بشرط واحد.. إنك تتأكد من إن اللمبة بنفس المقاسات.


...

تسلم ايدك، موضوع ممتاز

موضوع اكثر من رائع ربنا يبارك فيك؟

جزاكم الله خيرا
معلومات جميله

اقتباس:

---

المشاركة الأصلية كتبت بواسطة borio1704

أنا مش بقوللك ما تعدلش..

كل اللي بقوله إننا ﻻزم نفهم احنا بنعمل إيه الأول.. وبعدين نبقى نعدل على أساس سليم..

وقبل ما تفكر في أي تعديل.. اتأكد إنك بتستخدم اللمبة الصح بنفس أبعاد الفبريكه... واضبط التوجيه صح.. وبعد كده زود الإضاءة زي ما انت عايز...

بشرط واحد.. إنك تتأكد من إن اللمبة بنفس المقاسات.


...

---

http://www.nilemotors.net/Nile/435110-a.html
ممكن أعرف رأيك يا بشمهندس في التعديل ده
هو يمشي معايا نفس النظام تويوتا 1994 نفس النظام تقريبا
تركيب فوجات ليد أو زينون بكتاوت و لمض أوسرام 55 عادية

اقتباس:

---

المشاركة الأصلية كتبت بواسطة sherif_mahalla

http://www.nilemotors.net/nile/435110-a.html
ممكن أعرف رأيك يا بشمهندس في التعديل ده
هو يمشي معايا نفس النظام تويوتا 1994 نفس النظام تقريبا
تركيب فوجات ليد أو زينون بكتاوت و لمض أوسرام 55 عادية

---

بصراحة معنديش فكرة عن موضوع الزينون والكتاوتات والحاجات دي..

بس خلي بالك إن الموضوع بناعنا هنا بيتكلم على الإضاءة الرئيسية بتاعت الفانوس... يعني مالهاش علاقة بالفوجات

وحسب الموضوع بتاع اللينك... الخوف الأساسي من حاجتين..

فانوس الشبورة يكون كبير بحيث يقلل من دخول الهوا للرادياتير..
والحاجة التانية.. إنك تتأكد من إن الوات بتاع اللمبة مش أقوى من اللازم علشان الحرارة اللي طالعة من اللمبة ما تسيحش الفانوس نفسه.


...

الله ينور عليك يا بش مهندس تحياتى لك....... انا عن نفسى اكتر حاجه بتتعبنى لما بيقابلنى ويكون شايل الطربوش اللى جوه الفانوس لانه لما بيقلب لى نور بلاقى النورين عاليين زى بعض وهو فى خياله انه بيدينى نور واطى لكن للاسف هو سعادته شايل الطربوش اللى مايعرفش انه خاص بالنور الواطى اصلا ....انا من الناس اللى مش بحب اضايق اى مقابل بالنور حتى لو حد ماشى على رجله. عموما تحياتى لصاحب الموضوع الاكثر من رائع ده. تقبل مرورى

اقتباس:

---

المشاركة الأصلية كتبت بواسطة فتح الباب

الله ينور عليك يا بش مهندس تحياتى لك....... انا عن نفسى اكتر حاجه بتتعبنى لما بيقابلنى ويكون شايل الطربوش اللى جوه الفانوس لانه لما بيقلب لى نور بلاقى النورين عاليين زى بعض وهو فى خياله انه بيدينى نور واطى لكن للاسف هو سعادته شايل الطربوش اللى مايعرفش انه خاص بالنور الواطى اصلا ....انا من الناس اللى مش بحب اضايق اى مقابل بالنور حتى لو حد ماشى على رجله. عموما تحياتى لصاحب الموضوع الاكثر من رائع ده. تقبل مرورى

---

أتفق معاك تماما...

وللأسف نادرا لما تلاقي حد فاهم هو بيعمل إيه في بلدنا الحبيبة لإن الجهل انتشر في كل شيء.


أنا مرة واجهت موقف عكس اللي حضرتك واجهته..

من حوالي 5 سنين كنت مأجر عربية لانسر بومة.. وكان المفروض العربية هتفضل معايا يومين تلاتة أنزل بيها القاهرة في مأمورية وأرجع تاني..

عندنا في اسكندرية في عقدة اسمها نور العربية... أي حد منور نور عربيته العادي في شارع ضلمة هيلاقي سيل من النور العالي جاي في وشه وكإنه ارتكب جريمة لا تغتفر... وعلشان كده نادر لما تلاقي حد منور النور الواطي في عربيته في الشوارع المنورة في اسكندرية...

المهم.. صاحب العربية كان مخلي النور ضارب في الأرض علشان محدش ينور في وشه.. على أساس إنه يا دوب ينور تحت بوز العربية لو احتاج يشوف مطب.


أنا أخدت العربية وسافرت بيها الصبح معنديش مشكلة... بس وأنا راجع كنت سايق بالليل... وتخيل بقى تطلع بعربية زي دي عالصحراوي...

اضطريت أقف عند داندي مول عند البوابة وجبت مفك من شنطة العربية وقعدت أضبط نور العربية علشان أعرف أسوقها بأمان.

بس طبعا ما وقفتش قدام الحيطة.. إنما أخدتها بالتقريب كده بحيث أقدر أشوف مسافة كافية قدامي... ولما وصلت الرست نزلت تاني أضبط... لحد ما اطمنت على نفسي في العربية.


...

إزاي أعرف أظبط نور العربية؟

اقتباس:

---

المشاركة الأصلية كتبت بواسطة sherif_mahalla

إزاي أعرف أظبط نور العربية؟

---

خطوات الضبط مشروحة بالتفصيل في الموضوع الأصلي


...

و الله ربنا يباركلك. انت بتتكلم ميكانيكا و ثرموستات الكوعة قولت عادي مهندس ميكانيكا فاهم. بتتكلم في الزيوت باستفاضة. قولت مش لازم يكون كيميائي ممكن مهندس ميكانيكا قاري شويتين لكن كهربا كمان مش عارف أقولك ايه غير ان ربنا يباركلك و يزيدك من فضله عشان بتحاول تفيد الناس.

اقتباس:

---

المشاركة الأصلية كتبت بواسطة svneleven

و الله ربنا يباركلك. انت بتتكلم ميكانيكا و ثرموستات الكوعة قولت عادي مهندس ميكانيكا فاهم. بتتكلم في الزيوت باستفاضة. قولت مش لازم يكون كيميائي ممكن مهندس ميكانيكا قاري شويتين لكن كهربا كمان مش عارف أقولك ايه غير ان ربنا يباركلك و يزيدك من فضله عشان بتحاول تفيد الناس.

---

ربنا يكرمك.. الكلام ده كتير عليا والله ..

بس الحقيقة لحد دلوقتي ما اتكلمتش في الكهرباء خالص... ده مجرد ضبط بمفكات ومسامير... يعني مفيش لا فولت ولا أمبير ولا أي حاجة من دي ..

ودي باختصار كانت معلومات قريتها في أحد المجلات المتخصصة في صيانة السيارات من حوالي 20 سنة.. وكلامها موجه أساسا للفنيين (أو الميكانيكية) في الورش... وأنا شخصيا نفذته كتييييير في كذا عربية قبل كده...


والحقيقة الأهم .. إن الكهربا بالذات هتبقى آخر حاجة أتكلم فيها لإني بصراحة شديدة... مش بفهم فيها...


بس كل اللي أنا مقتنع بيه إني ما دام مش فاهم.. يبقى أمشي بالضبط زي ما الكتالوج بيقول.. ولما أفهم فعلا أبقى أشوف إيه اللي أقدر أعمله علشان أحسن على الموجود..

ده إذا احتجنا للتحسين.


...

موضوع جميل
تسلم ايدك
احب اضيف شيىء بعض الناس لما تحب تعدل النور من عادى لزينون فى الغالب الامر لا يتم بصورة صحيحية وتلاقى الزينون الواطى او العالى بيضرب فى وش المقابل فى الجانب الأخر لما تشوف عربية نازلة اصلا بالزينون ( زى الاوكتافيا مثلا ) تلاقى النور قدامة ما شاء الله يعنى بيكون ماشى من جنبى كاشف الطريق ولما يقابلك فى وشك النور بتاعه بيكون غير مؤذى بالمرة

اقتباس:

---

المشاركة الأصلية كتبت بواسطة miam0502788391

موضوع جميل
تسلم ايدك
احب اضيف شيىء بعض الناس لما تحب تعدل النور من عادى لزينون فى الغالب الامر لا يتم بصورة صحيحية وتلاقى الزينون الواطى او العالى بيضرب فى وش المقابل فى الجانب الأخر لما تشوف عربية نازلة اصلا بالزينون ( زى الاوكتافيا مثلا ) تلاقى النور قدامة ما شاء الله يعنى بيكون ماشى من جنبى كاشف الطريق ولما يقابلك فى وشك النور بتاعه بيكون غير مؤذى بالمرة

---

للأسف معظم الناس معندهاش المعلومات دي... وده فعليا اللي خلاني أعمل الموضوع ده...

وهدفي إن كلنا نستفيد.. اللي بيعدل علشان يشوف طريقه كويس.. واللي ماشي في المثابل مش بيتأذي من النور.


...

معلومات جديدة بالنسبالي :)

طيب مفيش حد يتكلم عن العدسات شوية, و ليها فايدة والا ملهاش, و اللمبات الليد و الزينون بالمره !!!!

جزاكم الله خيرا
معلومات جميله

موضوع ممتاز جزاك الله خيرا

الله ينور موضوع ممتاز