تجربتي في الفحص والتجديد في مرور السلام 2016
السلام عليكم
انهارده روحت مرور السلام افحص واجدد 3 سنين
كنت في ساحه الفحص الساعه 8 صباحا ،دخلت ركنت العربيه جنب عربيات الملاكي اللي جايه تفحص وقفلتها وخرجت من ارض الفحص وتوجهت لداخل وحده المرور علشان اشتري ورق الفحص ونماذج التجديد
دخلت في الممر اللي بيودي عند شركات التامين ، في هناك كشك اشتريت منه دوسيه وورقتين حافظه ضريبه وورقه بيان لوحات كل ده ب 4 جنيه
وفي كشك تاني اشتريت منه ورق الفحص اللي هوه ورقتين فحص بيئي وفحص فني وورقه الطفايه واشتريت 3 نماذج 251 علشان حجدد 3 سنين ودفعت 50 جنيه،
كده الورق معايا كامل، قبل ما ارجع ارض الفحص تاني روحت شركه تامين وامنت 3 سنين ب310 جنيه واخدت اصل وصوره وثيقه التامين
رجعت ارض الفحص تاني ومعايا الاوراق دي
موجود في ارض الفحص واحد بيرفعلك بصمه الموتور والشاسيه في نموذج الفحص الفني وده اديته 10 جنيه
بعد كده روحت لكشك بيع شنطه الاسعافات واشتريت شنطه لان لازم تشتري شنطه كل تجديد ، وشاف المثلث بتاعي واداني وصل بالشنطه ولو ماكنش معايا المثلث كنت لازم بردو اشتريه ب 50 جنيه
اخدت الورقه دي ل مهندس الفحص ، مضي عليها وبعتني بوصل الطفايه لكشك الطفايات، اللي بص علي الطفايه وجربها واتاكد انها صالحه ومعداش علي انتاجها 5 سنين وراح خاتم علي وصل الطفايه
رجعت للمهندس بالوصل راح خاتم علي نموذج الفحص الفني، وكمان ختم ،وكده خلاص الفحص خلص بعد ما بص علي العربيه اللي مافيهاش خبطات والزجاج سليم ومفيش فاميه
اخدت العربيه وطلعت ركنت بره المرور ودفعت 10 جنيه للسايس واخدت نفس عميق ودخلت وحده المرور
اول حاجه الورقه بتاعه بيان اللوحات روحت بيها للشباك بتاع صرف اللوحات سلمتها فاضيه مع الرخصه ل امين الشرطه وروحت استنيت تحت التنده واستلمتها مختومه ومتدبس فيها الرخصه ومكتوب فيها الرقم الحالي للوحات والرقم اللي قبليه
بعد كده روحت الشبابيك بتاعه المخالفات عند برده بتوع التامين وهناك في اول شباك سلمت ورقه بيان اللوحات والرخصه وعرفت ان عليا 505 , وبعدين استنيت قدام الشباك ندهو عليا بعد نص ساعه دفت الفلوس في الشباك التاني وبعدين استنيت شويه ندهو عليا من اخر شباك استلمت شهاده المخالفات
رجعت بقه تاني للمكان بتاع الشبابيك اللي بيستلم منها الموظفين الدوسيه وسلمت الدوسيه للموظف راجع الورق وقدر الضريبه في الورقتين بتوع الضريبه ب 750 جنيه واداني الورقتين دول روحت بيهم علي الخزنه دفعت واشتريت 5 طوابع شرطه ب 5 جنيه واخدت صورتين الوصل ورجعت للموظف تاني
كده الملف بتاعي جواه
ال 3 ورقات بتوع الفحص فني وبيئي وطفايه
شهاده المخالفات
وثيقه التامين
وصل دفع الضريبه
ال 3 نماذج 251 بتوع التجديد
صوره البطاقه وصوره الرخصه
الرخصه القديمه
راجع الملف وكده تمام وقاللي روح استني تحت التنده عند مكان الاستلام اللي استلمت منه بيان اللوحات
بعد ساعه ندهو عليا واستلمت الرخصه
قضيت في المرور 6 ساعات
طبعا المرور افضل من زمان لان سكان المطريه وعين شمس اتنقلو مرور الاميريه
يارب اكون شرحت الخطوات بالتفصيل
اي سؤال انا تحت امركم
