عايزني امضي على القائمة المنقولات قبل مالحاجه تيجي

**Karim Alaa** · 02-09-2016 08:38 PM

المشاركة الأصلية كتبت بواسطة أحمد كمال

1- انا ضد القايمة شكلا و موضوعا
2- لو مصمم تمضي ما تمضيش حاجة قبل ما الحاجة تيجي
3- هيقول لك مخوننا قول له لا بس انت كده اللي مخونني
4- لو عمل مشكلة بناقص الجوازة
5- ما تلفش حبل المشنقة على رقبتك بايدك

+10000000000

**عﻻء سالمان** · 03-09-2016 10:14 AM

واضح من الشكل العام انهم مش ضامنينك و مجهزين نفسهم لمشاكل متوقعين حدوثها فى اى لحظة .. انت ليك كبير معاهم ولا انت كبير نفسك؟ مدى التزامك و قربك من ربك ومدى رضى والديك عنك و نجاحك فى شغلك + عشرتك مع نسايبك فيها مؤشرات تدلك مثلا حماك كريم؟ بيضايفك كويس؟ بيحترم عيلتك؟ بيجيب فى سيرة الناس بالكويس فى وجودك .. ذو توجهات عقلانية؟ بيخاف ربة؟ مش بيدقق على كل حاجة.. ؟ حماتك مدى تدخلها فى حياتك؟ مدى تهذب لسانها فى الحديث عن الغير و الظاهر من الزامها فى علاقتها بربها
متمضيش على حاجة قصاد ناس قلبهم ميت.. لو موجدتش فية حرص على الصلاة ورحمة بالضعيف و عطف عالفقير و عدم الشكوى المستمرة و الوجة الصبوح الواثق فى الله ثم فيك .. إدرس لو ليها اخوات قبلها اتعمل معاهم اية و استخير ربك قبل ما تمضى

**Colin Chapman** · 03-09-2016 10:42 AM

المشاركة الأصلية كتبت بواسطة melouk1

انا مره زمان قولت القايمة دي شيء مقزز
وانا من رأي استاذ احمد كمال
الجواز ده فيه رحمة و معاشرة بالمعروف
مش شركة بنمضي بعض على ورق و جو رخيص

شوفت جوازات من كل المستويات من غير قايمة و شايلين بعض فوق الراس والله

بس طالما انت راضي بكده يبقى متمضيش الا على اللي عينك تشوفه عشان متتحبسش

تخيل واحد بيتجوز و داخل على شهر عسل اجمل ايام العمر ( ده المفروض ) و بيفكر يمضي على نفسه ورق :))))

لا حول ولا قوة الا بالله ..

يمضى فقط على اى شيء خشب وموبيليا فقط لاغير

**ESO101** · 03-09-2016 11:52 AM

توقيت الإمضاء زي توقيت دفع المهر
بندفع المهر وقت كتب الكتاب
لكن معرفش العرف في موضوع القايمة
والمفروض إن المتفق عليه بيتنفذ محدش بيطلب تنفيذه

لو خايف ينصبوا عليك يبقى بلاها الجوازة كلها
مش واثق فيهم إخلع

**melouk1** · 03-09-2016 02:10 PM

المشاركة الأصلية كتبت بواسطة colin chapman

يمضى فقط على اى شيء خشب وموبيليا فقط لاغير

انا ضد الحاجه اللي اسمها الزوج يمضي على قايمة لزوجته مش واثقين فيه بلاها الجوازه

لان الاولى يمضي تعهد على نفسه انه ميزعلهاش او يتعرضلها بسوء اهم من انه يمضي انه استلم خشب

ولا البنت مش مهم و الحاجه اهم طالما الموضوع اهل الزوجة بيأمنو نفسهم منه ..

مجرد التفكير في الموضوع بيجيبلي إشمئزاز والله ربنا يكون في عون اللي بيرضى بالحاجات دي !!

**sherif_mahalla** · 03-09-2016 02:21 PM

القايمة دي وصل أمانة و لا دخل له بالزواج
يعني لو بعد ما مضيت بيوم رفع عليك قضية تبديد أمانة هتخسرها في أسبوع و هتبقى مطالب تسلمهم محتويات القايمة أو الثمن لو مكتوب أو تتحبس
لكن الناس بتبان إن كان ده تمسك بعادة أو طمع أو جبروت

**AHMED12345678** · 03-09-2016 03:22 PM

المشاركة الأصلية كتبت بواسطة elpilot

امضي يا باشا متقلقش هو مأمنك علي بنته وانت مش عايز تمضي ورقة !!!

مع احترامى لحضرتك يعنى انه الاب مأمنه على بنته
ما هما عايزينه يمى على ورقة هتوديه السجن لو حصل بينهم اى خلاف لاى سبب وخصوصا ان المنقولات غير موجودة يعنى هيدخل السجن هيدخل السجن

**AHMED12345678** · 03-09-2016 03:44 PM

المشاركة الأصلية كتبت بواسطة ahmedabohgr

عايزني امضي على القائمة المنقولات قبل مالحاجه تيجي طب لاقدر الله محصلش نصيب بعد الامضاء ولسه مكتبناش كتاب هل عليا ضرر بالنسبه للقايمه

هقولك على اررد من وجهه النظر القاونية ومن واقع تجربة شخصية لاحد اقاربى

من الناحية القانونية فقائمة المنقولات فى حالة المطالبة بالمنقولات وعدم ردها فده يشكل جريمة خيانة الامانة
وخلى بالك انه فى حالة تم مطالبتك برد المنقولات و عرضت رد قيمة المنقولات نقدا فده لاينفى قيام جريمة خيانة الامانة فى حقك يعنى احتمال دخولك السجن كبير جداااا
وكمان المفروض متمضيش على القايمة إلا بعد الحاجة متيجى عندك فى البيت كلها وتكون المنقولات المكتوبة فى القايمة مطابقة للموجود عندك فعلا
وكمان تمضى على القايمة قبل كتب الكتاب مباشرة
وده مش عيب لان ده الى بيحصل والى الناس بتعمله وانا واخواتى واصحابى الى مضينا على قايمة عملنا كده ومحدش فينا مضى على قايمة الا بعد وجود المنقولات فى الشقة فعلا وفرشها وقبل كتب الكتاب ....... لانى ازاى الواحد يمضى على حاجة ممكن تدخله السجن وهيا مش موجوده عنده

ومتقولش ان مفيش مشاكل هتحصل لان اكيد اكيد فى مشاكل هتحصل خصوصا بعد الزواج لان حدوث المشاكل شئ طبيعى بين الازواج بس بيفرق نوعية اهل الزوجة وهل هيخافوا على بيت بنتهم ولا مش هيفرق معاهم
ومع العلم ان نسب الطلاق مرتفعة جداااا وخصوصا فى السنة لاولى من الزواج واخطف رجلك لاى محكمة اسرة وشوف كم قضايا الطلاق والخلع والنفقات وتبديد المنقولات المتداولة فى المحاكم وعلى اسبب اتفه مما تتخيل
وبرده متقولش ان نسيابك مختلفين لان ساعة المشاكل هتشوف وش تانى خالص غير الى شوفته ايام الخطوبة

اما بالنسبة للتجربة الشخصية فإبن خالى عمل كده ومضى على قايمة منقولات قبل ما المنقولات ما تيجى عنده الشقة وحصلت مشاكل بينه وبين مراته بعد اربع شهور زواج فقط علشان الزوجة كانت عايز تركب وتدلدل وتكون هيا راجل البيت وهو مرضيش وطبعا اهلها وقفوا معاها فى الغلط وطبعا شاف الوش التانى عالطول ورفعوا ضده قضية تبديد منقولات وفوجئ انهم كاتبين حاجات كتير فى القايمة مش موجودة عنده وبرده لو عرض قيمة المنقولات نقدا فده برضه ممكن لا يعفية من المسؤلية وهو حاليا فى حيص بيص

ومتقولش ان ابو خطيبتك مامنك على بنته لان دى مش طريقة الناس المحترمين فى تامين البنت وكمان القانون بيامن الزوجة كويس وبتاخد المنقولات والذهب ومؤخر الصداق ونفقة المتعه ونفقة العدة ونفقة الصغير واجره الحضانة ومسكن الحضانة وكل حاجة وحضرتك يا مولاى كما خلقتنى وده كله ممكن يحصل حتى من غير غلط من ناحيتك ولمجرد العوج من الزوجة واهلها

كونك انك تمضى على قايمة فده مفيهوش مشكلة بس يكون بعد الحاجات ما تيجى بيتك وتكتب مطابقة للمكتوب فى القايمة وقبل كتب الكتاب عالطول

ومتزعلش منى بس مفيش ناس محترمين يطلبوا من خطيب بنتهم يمضى على قايمة قبل الحاجات ما تيجى والناس دى داخلة على طمع او ناويين ان بنتهم تكون هى المسيطرة ورأس البيت وعاوزين يكتفوك بالورقة دى علشان يعروفوا يعملوا الى هما عاوزينوا معاك

**أحمد كمال** · 03-09-2016 05:35 PM

المشاركة الأصلية كتبت بواسطة ahmedabohgr

أحمد كمال 1- انا ضد القايمة شكلا و موضوعا
2- لو مصمم تمضي ما تمضيش حاجة قبل ما الحاجة تيجي
3- هيقول لك مخوننا قول له لا بس انت كده اللي مخونني
4- لو عمل مشكلة بناقص الجوازة
5- ما تلفش حبل المشنقة على رقبتك بايدك

تمام كلامك بس اذا مضيت ومحصلش نصيب قبل كتب الكتاب ....هل القايمه بتكون دليل ادانه ضدي برضه في الحاله دي ...

القايمة وصل امانة عليك

حتى لو ما طلقتش

اقول لك ...... لو واحد (مش قصدي عليك) ...... دخل لقى مراته مع راجل غريب و سجنها في قضية زنا ممكن هي تسجنه بالقايمة برضه

القايمة وصل امانة ...... يعني ايه امضي على وصل امانة هو انا مأجر عجل طلوقة ؟؟؟؟؟

-

الموضوع: عايزني امضي على القائمة المنقولات قبل مالحاجه تيجي

LinkBack

أدوات الموضوع

عرض

-

-

-

-

المواضيع المتشابهه

هل يجوز كتابة شيك على الزوج بدلا من قائمة المنقولات الزوجية ؟؟؟

حد عايزني اجبله ايفون 4 اس الجديد؟؟؟

عايزني معاكم ولا مش عايزني يا بايكرز :)

انا رايح بكرة اعمل صيانة الـ 5000 كيلو حد عايزني اسئله على حاجة ؟

الكلمات الدلالية لهذا الموضوع

المفضلات

المفضلات

ضوابط المشاركة