| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
النتائج 1 إلى 8 من 8

  1. #1

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,839

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    Lightbulb إضافات الزيوت... إيه الحكاية؟ - Facebook Twitter whatsapp انشر الموضوع فى :

    hasad">


    السوق مليان شركات بتنزل إضافات للزيوت.. وأغلب الشركات دي بتعمل إضافات بس... وبعض شركات الزيوت غير المشهورة بتنزل إضافات بردو..

    كل الشركات دي بتقول إنك لما تحط الإضافات على الزيت هتحسن من أداء الزيت وتحافظ على الموتور وتقلل استهلاك البنزين.. وكلام كتير من النوعية دي..



    في الحقيقة ... صعب جدا تعرف مكونات الإضافات دي إيه... والمعلومات المتوفرة على الإنترنت في الموضوع ده قليلة قوي.


    المعلومات اللي قدرت أوصلها عن الإضافات ملخصها حاجة واحدة...

    ما تشتريش إضافات للزيوت

    لإنها ... يا إما مالهاش تأثير ... يا إما ليها تأثير مدمر


    إزاي؟؟؟؟ وكل الكلام ده إيه؟؟؟


    اشتغالات...


    واللي يأكد الكلام ده إن كل مصنعي السيارات في العالم بلا استثناء بتقوللك : ما تحطش إضافات على الزيوت.. وراجع الكلام ده في كتالوج عربيتك..

    ومش إضافات زيوت الموتور بس... ده زيت الفتيس وزيت الباور وزيت الباكم.. وأي زيوت تانية في العربية ممنوع تحط عليها أي إضافات.


    والأكتر من كده... شركات الزيوت المحترمة في العالم كله بتقوللك: زيوتنا فيها إضافات كفاية ومش محتاجة أي إضافات تانية..


    الأسطورة جاية من زمان (من أكتر من 50 سنة) .. لما كان اختراع الإضافات له فايدة كبيرة فعلا لإن تكنولوجيا الزيوت كانت متأخرة نوعا ما... والإضافات كانت فعلا بتعمل شغل...


    إنما دلوقتي الزيوت بقت أحسن بكتير من زمان... وما بقيناش محتاجين الإضافات دي نهائي..

    وعلشان نعرف ليه... خلينا نفهم الأول يعني إيه زيت محركات السيارات؟؟؟


    زيوت السيارات اللي بنستخدمها في عربياتنا في الوقت الحالي هي عبارة عن خليط من : زيت أساس + إضافات


    زيت الأساس بيشكل حوالي 80-90% من الزيت اللي بنشتريه فعلا... واللي لو اعتمدنا عليه لوحده مش هنعرف ناخد الأداء المتعارف عليه في الزيوت في وقتنا الحاضر..



    والإضافات هي اللي بتعمل أغلب الفرق في الحقيقة.. ودي فيه منها أنواع كتير على حسب الهدف منها... زي:

    تحسين مؤشر اللزوجة ...اللي بتحول الزيت من أحادي اللزوجة إلى متعدد درجات اللزوجة
    تحسين الثبات الحراري.. علشان ما يتحللش مع ارتفاع درجات الحرارة
    تحسين خواص التنظيف.. علشان يفضل الموتور بحالته بدون رواسب
    تحسين التشتيت الحراري.. علشان تساعد في سحب الحرارة الزايدة من أجزاء الاحتكاك
    خفض الضوضاء.. اللي جاية نتيجة تحرك الأجزاء الميكانيكية جوه الموتور

    وإضافات تانية تختلف على حسب الغرض من الاستخدام.



    في الحقيقة .. أكواد مستوى الخدمة المكتوبة على الزيوت هي عبارة عن مواصفات بتحطها هيئات عالمية متخصصة في الزيوت .. والمواصفات دي بتشترط مستويات أداء محددة علشان تحافظ على الموتور وتخليه يشتغل أطول مدة ممكنة بأحسن أداء ممكن...


    وأغلب شركات الزيوت بتضطر تحط إضافات على زيوتها علشان الزيت يحقق طلبات الكود ده..


    وبالتالي لما تشتري الزيت وعليه كود معين لـAPI أو ACEA مثلا زي ما كتالوج العربية طالب... فخليك واثق تماما إن الزيت فيه ما يكفي من الإضافات للمحافظة على موتورك.

    علشان تعرف أكتر عن مستوى الأداء... ادخل على الموضوع ده:
    http://www.nilemotors.net/Nile/341680-a.html




    بالنسبة للإضافات اللي في السوق .. فهي أحد أربع أنواع من ناحية المكونات:

    1- إضافات مغشوشة... ودي طبعا مش أكتر من مجرد زيت عادي ممكن يكون مضاف إليه لون أو رائحة أو أي شيء ليس له علاقة بتحسين الأداء


    2- إضافات أساسها مادة الـPTFE أو المعروفة تجاريا بـ"التفلون"، ودي المادة الأساسية في أواني "تيفال" المشهورة... ودي مشكلتها الأساسية إنها ممكن تعمل حماية فعلا على الأجزاء المتحركة... بس غالبا بتعمل سدد في مجاري الزيت الضيقة وكمان ممكن تسد فلتر الزيت


    3- إضافات أساسها مادة من أحد مركبات فوسفات الزنك (داي.ألكايل.داي.ثيو.فوسفات الزنك Zinc dialkyldithiophosphate)
    ودي بردو ممكن تكون مفيدة جدا وبتعمل حماية للأجزاء المعدنية بالذات لو المحرك تعرض لأحمال قوية جدا... زي السباق أو جر أوزان ثقيلة مثلا

    طيب ده حاجة كويسة جدا... إيه المشكلة بقى؟؟؟

    المشكلة إن مركب فوسفات الزنك ده موجود دلوقتي في كل الزيوت العادية تقريبا، ولو حبيت تزود الفايدة وتحط إضافة... المركب (الزيادة) ده هيخرج مع الزيت المستهلك في السلندر ويبقى سبب رئيسي في سدد علبة البيئة بتاعة الشكمان

    يعني من الآخر: الشيء اللي يزيد عن حده بينقلب ضده


    4- إضافات أساسها مواد مذيبة ومنظفة: غالبا مواد زي الكيروسين والنفتالين والأسيتون... ودي مهمتها إنها تذوب الرواسب من الأجزاء المتحركة... زي فكرة زيت الديزل أساسا.

    فكرة إزالة الرواسب ماهياش فكرة سيئة... إنما إضافة المواد المذيبة ممكن تكون زيادة عن الحد لإنك ما تعرفش تحط منها قد إيه... يعني حطيت كفاية ولا بزيادة؟؟؟ وزي ما قلنا.. حطيت بزيادة يبقى بتعمل تآكل زايد في المحرك.


    ولو فكرت تشتري الإضافات دي... فالمؤكد إنك لازم تجيب الإضافة من نفس ماركة الزيت اللي حضرتك حطيته....


    ليه؟؟


    المشكلة الكبيرة إنك ممكن تشتري إضافى زيت وتحطها مع زيت يكون فيه نوع إضافات تاني.. فيتفاعلوا مع بعض... وهنا ممكن تحصل أي حاجة من دول:



    1- تأثير الإضافة اللي في الزيت يختفي وتأثير الإضافة اللي حضرتك حطيتها يختفي.. وكده تبقى حطيت زيت أساسي عمره قصير وما بيديش حماية للموتور

    2- يتكون مركب جديد له آثار مختلفة ( عادة بتبقى وحشة ).. زي سدد في الفلتر أو مجاري الزيت أو حتى سدد في علبة البيئة.

    3- زيادة نسبة الإضافات من نفس النوع.. وده في الحقيقة ما لوش أي تأثير إيجابي ﻹن الإضافات ليها نسبة تركيز بتدي فيها أعلى كفاءة.. واللي غالبا بتبقى موجودة أصلا في الزيت اللي حضرتك شاريه.

    وده هو نفس السبب اللي بنرفض عشانه خلط ماركات الزيوت



    بس إزاي لسه فيه شركات بتعمل إضافات ؟؟؟؟ معقول كل الشركات دي بتشتغلنا؟؟؟

    أكيد لأ...

    الاستخدام الوحيد للإضافات دي هو إنها تتحط على الزيوت المخصصة لسيارات السباق..



    إيه ده؟؟؟ هو فيه زيوت للسباقات مخصوص؟؟؟


    أيوه... والزيوت دي مع إنها متطورة جدا... إلا إنها مش معتمدة من أي هيئة عالمية للزيوت.. وبالتالي فبتبقى ناقصها بعض الإضافات اللي بتتحط على الزيت في كل سباق على حده.. وحسب ظروف وطبيعة السباق نفسه.. وحسب طلبات الموتور اللي هتتحط فيه...



    علشان كده .. الحالة الوحيدة اللي ممكن ننصح فيها باستخدام الإضافات هي إنك تكون بتستخدم زيت مخصص للسباقات وتكون متخصص في سباقات السيارات...

    يعني لازم تبقى فاهم كويس قوي انت بتعمل إيه وعايز إيه بالضبط من الزيت... وموتورك عايز إيه..

    خد بالك إن سيارات السباق مفيهاش علبة للبيئة مثلا.. ولا عايزين موتورها يعيش مسافة كبيرة..

    وأغلب مواتير السباق عمرها لا يتعدى 10 آلاف كيلومتر على أقصى تقدير ... لإن المطلوب منه إنه يطلع أقصى طاقة ممكنة... يعني ما يهمهاش استهلاك البنزين ولا تلويث البيئة... ومسألة عمر الموتور دي من أواخر الأولويات اللي فرق السباقات بتبصلها.

    على سبيل المثال.. مواتير سيارات الفورميولا 1 مثلاً عمرها "3 سباقات" (ما يعادل 1000 كيلومتر تقريبا)... والكلام ده حصل بعد ما تم فرض العمر ده على الفِرَق لتقليل الفارق بين الفِرق الغنية (اللي تقدر تغير موتور كل سباق) والفِرق الفقيرة (اللي ما تقدرش)..


    بعد المعلومات اللي فوق دي... قوللي انت كده... رأيك إيه؟؟؟


    من الآخر... أغلب الإضافات اللي فوق موجودة أساسا في الزيوت العادية... والإضافات دي كانت كويسة مع الزيوت القديمة من 50-60 سنة... إنما دلوقتي... كل الزيوت المتوفرة للعربيات العادية بتاعتنا عليها إضافات كافية تغنيك عن أي مغامرة ما تعرفش نتايجها.


    فيه إضافات تانية بتتحط على الزيت... لأسباب تانية...




    هنتكلم عنها في المشاركة الجاية..


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  2. #2

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,839

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    افتراضي زيت الشنبر... زيت الفلش... بلاش أرجوك -


    كتير بنسمع عن زيت الشمبر .. إيه هو وبيعمل إيه؟؟؟

    المعروف عن زيت الشمبر إنه بيتحط لما يبدأ يحصل تسريب في الضغط جوه السلندرات نتيجة التآكل في السلندر نفسه أو في حلقات البستم "الشنابر".. والزيت ده بيقولوا إنه بيمنع التسريب بشكل أو بآخر وتتم إضافته لكل غيار زيت.. وبيعتبروه علاج مؤقت لحد ما تعمل عمرة للموتور.

    بس حقيقة زيت الشمبر إنه عبارة عن إضافات تضاف إلى زيت المحرك... اسمها بالإنجليزي "Oil Treatment" أو "علاج للزيت"






    هدف الإضافة دي هو زيادة "ثبات القص" في الزيت Shear Stability.. و"القص" ده هو فعليا الحاجة المسؤولة عن لزوجة الزيت...


    معنى الكلام ده إن زيت الشنبر بيزود اللزوجة؟؟؟


    فعلا... وزيادة اللزوجة ممكن يكون ليها فايدة في منع التسريب وزيادة الحماية على الأجزاء اللي بيحصل عليها ضغط كبير.. بالإضافة إلى تقليل الضوضاء.. لإنها بتبقى عاملة زي المرتبة اللي بتمتص الصدمات..


    كده طبعا هيبقى الاستنتاج المبدئي يقول: "طيب دي حاجة كويسة جدا"


    إنما الحقيقة .. ﻷ .. لإن اللزوجة العالية ليها عيوب بدون شك...

    باختصار .. اللزوجة العالية زيادة عن اللزوم هتخلي انسيابية الزيت أبطأ بكتير من المطلوب.. يعني التزييت هيقل جامد جدا في بداية التشغيل.. وكمان ممكن جدا ما يوصلش لبعض الأماكن الضيقة جدا... ده غير زيادة استهلاك البنزين (اللي هي أصلا زايدة علشان الموتور مفوت).

    يعني ممكن الموتور يبوظ زيادة أثناء استخدامه !!



    زي ما حضرتك شايف... زيت الشمبر بقى عبارة عن اشتغالة علشان تعدي من اختبارات المرور أو علشان تستريح نفسيا إن عربيتك مش بتدخن من الشكمان.

    والأحسن إنك تصلح موتورك بدل ما تصرف فلوسك في حاجة وهمية بغرض الراحة النفسية.

    ______________________


    سمعنا كمان عن زيت الفلش... إيه فايدته؟؟؟


    زيت الفلش Flush Oil أو Motor Flush هو مادة زيتية بتضاف على الزيت القديم لتنظيف الموتور من الترسبات بكافة أنواعها..

    بيتكون أساسا من مواد مذيبة .. ومواد تنظيف.


    زيت الفلش بيستخدم لإزالة الرواسب من المواتير اللي حصل فيها تكون لرواسب طينية (Sludge) ..

    حاجة زي كده:





    ودي غالبا بتحصل مع الناس اللي بتسيب الزيت في الموتور وما بتغيروش.. (بعض الناس في أمريكا مش بتغير زيت.. يادوب بيزودوا اللي بينقص وخلاص.. دي أكتر ناس بيحصل معاها المشاكل دي).


    أصلا كلمة فلش Flush بتستخدم في الإنجليزي بس مع تشغيل المرحاض... يعني باختصار المقصود منها هو نزح القاذورات ..

    وبالتالي .. فاستخدام الفلش في الموتور مقصود بيه نفس الكلام تقريبا..



    عموما.. تقدر تعرف لو موتورك محتاج فلش ولا لأ بمجرد النظر...


    افتح غطا تزويد الزيت وبص على الأجزاء الداخلية اللي تقدر تشوفها.. لو لقيت منظر زي ده... تبقى محتاج فلش



    أو ببساطة روح لأي ميكانيكي وخليه يشيل غطا التاكيهات..


    لو موتورك شكله كده... يبقى موتورك زي الفل ومش محتاج أي حاجة:


    أو كده



    أو حتى كده




    ده الفرق باختصار:




    على فكرة... لو حضرتك بتغير الزيت في مواعيده.. فاستخدام الـEngine Flush ضرره أكتر كتير من نفعه.

    لإن استخدام الفلش بدون داعي بيعمل تآكل في الموتور في الأجزاء المتحركة بالذات... خصوصا إذا تم استخدامه بطريقة خاطئة...

    وأغلب المواتير اللي استخدمته بدون داعي بدأ الزيت ينقص فيها والموتور أصبح خفيف.


    علشان كده مصنعي السيارات الحديثة بتمنع استخدام زيوت الفلش في مواتيرها... وأنا كمان ما أنصحش بيه إلى في حالات وجود رواسب طينية فقط...



    ملخص الكلام...


    موتورك فيه رواسب طينية .. ممكن تستخدمه...

    غير كده... خلي موتورك سليم زي ما هو.


    ونصيحة.. ما تستخدموش نهائي.


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  3. #3

    الصورة الرمزية khmshry

    رقم العضوية : 53223

    تاريخ التسجيل : 17Nov2009

    المشاركات : 394

    النوع : ذكر

    الاقامة : giza

    السيارة: فيرنا2013 - كيا سيراتو ٢٠١٦

    السيارة[2]: هيونداي نيو أكسنت2010

    دراجة بخارية: لايوجد

    الحالة : khmshry غير متواجد حالياً

    افتراضي -

    الله ينور ياهندسه وهي فعلا اضافات الزيوت للمواتير القديمه وبتحط زيوت عاديه بس سؤال لو الزيت بينزل قبل ميعاده ده شئ كويس ولا غلط


  4. #4

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,839

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    Smile -

    اقتباس المشاركة الأصلية كتبت بواسطة khmshry مشاهدة المشاركة
    الله ينور ياهندسه وهي فعلا اضافات الزيوت للمواتير القديمه وبتحط زيوت عاديه بس سؤال لو الزيت بينزل قبل ميعاده ده شئ كويس ولا غلط

    ولا حتى المواتير القديمة... ما تصدقش الكلام ده...

    لو بتستخدم الزيت الصح زي توصيات الكتالوج يبقى حضرتك مش محتاج أي إضافات..

    ولو الموتور بيتحطله إضافات بحجة إنها تجدده مثلا... فالموتور ده الأفضل يتعمر أو يتغير.. لإن الإضافات بتاعت التجديد دي مش بتجيب نتيجة فعلية.


    بالنسبة لموعد تغيير الزيت.. ادخل على الموضوع ده.. فيه كل التفاصيل:

    http://www.nilemotors.net/Nile/490076-a.html


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  5. #5

    الصورة الرمزية tasaka

    رقم العضوية : 173494

    تاريخ التسجيل : 24Mar2015

    المشاركات : 2,674

    النوع : ذكر

    الاقامة : egypt

    السيارة: none

    السيارة[2]: Speranza a620 2010

    الحالة : tasaka غير متواجد حالياً

    افتراضي -

    اقتباس المشاركة الأصلية كتبت بواسطة borio1704 مشاهدة المشاركة

    كتير بنسمع عن زيت الشمبر .. إيه هو وبيعمل إيه؟؟؟

    المعروف عن زيت الشمبر إنه بيتحط لما يبدأ يحصل تسريب في الضغط جوه السلندرات نتيجة التآكل في السلندر نفسه أو في حلقات البستم "الشنابر".. والزيت ده بيقولوا إنه بيمنع التسريب بشكل أو بآخر وتتم إضافته لكل غيار زيت.. وبيعتبروه علاج مؤقت لحد ما تعمل عمرة للموتور.

    بس حقيقة زيت الشمبر إنه عبارة عن إضافات تضاف إلى زيت المحرك... اسمها بالإنجليزي "Oil Treatment" أو "علاج للزيت"

    هدف الإضافة دي هو زيادة "ثبات القص" في الزيت Shear Stability.. و"القص" ده هو فعليا الحاجة المسؤولة عن لزوجة الزيت...


    معنى الكلام ده إن زيت الشنبر بيزود اللزوجة؟؟؟


    فعلا... وزيادة اللزوجة ممكن يكون ليها فايدة في منع التسريب وزيادة الحماية على الأجزاء اللي بيحصل عليها ضغط كبير.. بالإضافة إلى تقليل الضوضاء.. لإنها بتبقى عاملة زي المرتبة اللي بتمتص الصدمات..

    كده طبعا هيبقى الاستنتاج المبدئي يقول: "طيب دي حاجة كويسة جدا"

    إنما الحقيقة .. ﻷ .. لإن اللزوجة العالية ليها عيوب بدون شك...

    باختصار .. اللزوجة العالية زيادة عن اللزوم هتخلي انسيابية الزيت أبطأ بكتير من المطلوب.. يعني التزييت هيقل جامد جدا في بداية التشغيل.. وكمان ممكن جدا ما يوصلش لبعض الأماكن الضيقة جدا... ده غير زيادة استهلاك البنزين (اللي هي أصلا زايدة علشان الموتور مفوت).

    يعني ممكن الموتور يبوظ زيادة أثناء استخدامه !!

    زي ما حضرتك شايف... زيت الشمبر بقى عبارة عن اشتغالة علشان تعدي من اختبارات المرور أو علشان تستريح نفسيا إن عربيتك مش بتدخن من الشكمان.

    والأحسن إنك تصلح موتورك بدل ما تصرف فلوسك في حاجة وهمية بغرض الراحة النفسية.

    ...
    موضوع جميل من استشارى منتدانا الصديق العزيز المهندس بوريو

    كتوضيح اضافى لما ذكره المهندس بوريو بأخنصار و هو ( اللزوجة العالية ليها عيوب بدون شك .. اللزوجة العالية زيادة عن اللزوم )



    احب اوضح النقطه دى بتفصيل لفائده الزملاء فى المنتدى .. لان الفكره عندنا هى استعمال لزوجات اعلى .. حتى التوكيلات

    عندما تكون اللزوجه اعلى من اللازم :

    1- ستزداد قوه القص ( Shear ) بقيمه اضافيه ( نتيجه اللزوجه الاعلى من اللازم ) فى الاماكن التى يحدث فيها ضغوط عاليه على طبقه الحمايه الرقيقه للزيت oil flm thickness .. كمثال جدران السلندرات و عمود الكرنك

    2- سيتولد عن هذا ال Shear حراره اضافيه .. تزداد قيمتها حسب نسبه زياده اللزوجه عن المسموح

    3- كمبدأ عام .. الزيت تقل لزوجته بارتفاع درجه الحراره

    و بالرغم من ان من يتجه لاستعمال لزوجات عاليه يكون بغرض الحصول على حمايه افضل .. لكن هذه الحراره الاضافيه المتولده عن ال Shear الاضافى ستخفض اللزوجه نسبيا

    ( بمعنى ان لو كانت اللزوجه الاعلى من اللازم دى قيمتها 50 .. فلن يحصل على ال 50 و لكن سيحصل كمثال افتراضى للتوضيح على لزوجه وقتيه قيمتها 35 او 40 ) .. هذا الفقد لللزوجه مؤقت ( الرقم 35 او 40 مثلا ) (هو تأثير طبيعى لارتفاع حراره الزيت.. و لكن الزيت مازال محنفظ بلزوجته التصميميه ( 50 مثلا )

    4- بعد فتره طويله نسبيا من الاستعمال .. و نتيجه ال Shear الزائد عن التصميمى .. ستبدأ
    اضافات حفظ اللزوجه VI بالتكسر .. و حينها يفقد الزيت نسبه من لزوجته بصفه مستديمه تتناسب مع مدى تكسر اضافات اللزوجه VI .. بمعنى ان الى حط لزوجه اعلى من اللازم سنتهى به الامر الى لزوجه اقل من اللازم و زيت فقد خواصه المطلوبه

    5- بالطبع سيحدث فقد لقوه المحرك و استهلاك اضافى للبنزين بسبب المقاومه الاعلى للزيت .. و كمان موتور بيشتغل فى حراره اعلى من التصميميه و بيبذل جهد اكبر للتخص مها

    6- و لو تصنيف الخدمه للزيت منخفض ( زبوت رخيصه ) .. يبقى كمان فى عامل اضافى و هو HTHS .. و ده حيتسبب فى اضرار اضافيه لخواص الزيت و الاضافات عند ارتفاع درجه حراره الزيت زياده عن الطبيعى .. و ارتفاع الحراره ده هو نتيجه طبيعيه لاستعمال لزوجه اعلى من اللازم


    يعنى من وجهه نظرى .. استعمال اقل لزوجه مفضله مسموحه فى الكتالوج ( و عاده بتكون هى الاقل المناسبه لجو بلد ما ) افضل حتى من استعمال لزوجه مسموحه اعلى لغرض الحمايه
    .

    Conversely, if you switch to a 20W-50 oil in the belief it will give you better lubrication in hot or high-load conditions, you may not be getting the improvement you expect.

    This is because the additional viscosity will cause additional shear in the oil which results in shear heating and a viscosity reduction. Studies9 show that a doubling of viscosity grade will cause as much as a 20°F (11°C) rise in oil temperature in the bearing under shear.

    If we assume a 20°F increase in oilbearing oil temperature when switching to 20W-50 oil, the viscosity in the bearing will drop as much as 30% in responseto the temperature increase. Instead of the expected doubling of viscosity by using 20W-50 oil, the increase would be around 35%, with increased viscous drag and resulting power loss.

    The data obtained in the study was for industrial hydrodynamic bearings under a normal load, so the rise in temperature for a viscosity doubling may vary in an IC engine. Under heavy-duty conditions, the shear induced heating and viscosity reduction would be even more severe. Another possible long-term effect of the additional shearing with higher viscosity oil is irreversible thinning due to breakdown of the VI improver molecules.

    One conclusion this study reached is to use the lowest viscosity consistent with adequate flm thickness, which applies to internal combustion lubrication as well. To correctly decide what oil would satisfy these requirements, it would require a laboratory of expensive instrumentation. Fortunately, your engine’s OEM has this equipment, and uses it to develop their recommendations

    تحياتى و اعزازى و تقديرى


  6. #6

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,839

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    افتراضي -

    اقتباس المشاركة الأصلية كتبت بواسطة tasaka مشاهدة المشاركة
    موضوع جميل من استشارى منتدانا الصديق العزيز المهندس بوريو

    كتوضيح اضافى لما ذكره المهندس بوريو بأخنصار و هو ( اللزوجة العالية ليها عيوب بدون شك .. اللزوجة العالية زيادة عن اللزوم )



    احب اوضح النقطه دى بتفصيل لفائده الزملاء فى المنتدى .. لان الفكره عندنا هى استعمال لزوجات اعلى .. حتى التوكيلات

    عندما تكون اللزوجه اعلى من اللازم :

    1- ستزداد قوه القص ( shear ) بقيمه اضافيه ( نتيجه اللزوجه الاعلى من اللازم ) فى الاماكن التى يحدث فيها ضغوط عاليه على طبقه الحمايه الرقيقه للزيت oil flm thickness .. كمثال جدران السلندرات و عمود الكرنك

    2- سيتولد عن هذا ال shear حراره اضافيه .. تزداد قيمتها حسب نسبه زياده اللزوجه عن المسموح

    3- كمبدأ عام .. الزيت تقل لزوجته بارتفاع درجه الحراره

    و بالرغم من ان من يتجه لاستعمال لزوجات عاليه يكون بغرض الحصول على حمايه افضل .. لكن هذه الحراره الاضافيه المتولده عن ال shear الاضافى ستخفض اللزوجه نسبيا

    ( بمعنى ان لو كانت اللزوجه الاعلى من اللازم دى قيمتها 50 .. فلن يحصل على ال 50 و لكن سيحصل كمثال افتراضى للتوضيح على لزوجه وقتيه قيمتها 35 او 40 ) .. هذا الفقد لللزوجه مؤقت ( الرقم 35 او 40 مثلا ) (هو تأثير طبيعى لارتفاع حراره الزيت.. و لكن الزيت مازال محنفظ بلزوجته التصميميه ( 50 مثلا )

    4- بعد فتره طويله نسبيا من الاستعمال .. و نتيجه ال shear الزائد عن التصميمى .. ستبدأ
    اضافات حفظ اللزوجه vi بالتكسر .. و حينها يفقد الزيت نسبه من لزوجته بصفه مستديمه تتناسب مع مدى تكسر اضافات اللزوجه vi .. بمعنى ان الى حط لزوجه اعلى من اللازم سنتهى به الامر الى لزوجه اقل من اللازم و زيت فقد خواصه المطلوبه

    5- بالطبع سيحدث فقد لقوه المحرك و استهلاك اضافى للبنزين بسبب المقاومه الاعلى للزيت .. و كمان موتور بيشتغل فى حراره اعلى من التصميميه و بيبذل جهد اكبر للتخص مها

    6- و لو تصنيف الخدمه للزيت منخفض ( زبوت رخيصه ) .. يبقى كمان فى عامل اضافى و هو hths .. و ده حيتسبب فى اضرار اضافيه لخواص الزيت و الاضافات عند ارتفاع درجه حراره الزيت زياده عن الطبيعى .. و ارتفاع الحراره ده هو نتيجه طبيعيه لاستعمال لزوجه اعلى من اللازم


    يعنى من وجهه نظرى .. استعمال اقل لزوجه مفضله مسموحه فى الكتالوج ( و عاده بتكون هى الاقل المناسبه لجو بلد ما ) افضل حتى من استعمال لزوجه مسموحه اعلى لغرض الحمايه
    .

    conversely, if you switch to a 20w-50 oil in the belief it will give you better lubrication in hot or high-load conditions, you may not be getting the improvement you expect.

    This is because the additional viscosity will cause additional shear in the oil which results in shear heating and a viscosity reduction. studies9 show that a doubling of viscosity grade will cause as much as a 20°f (11°c) rise in oil temperature in the bearing under shear.

    If we assume a 20°f increase in oilbearing oil temperature when switching to 20w-50 oil, the viscosity in the bearing will drop as much as 30% in responseto the temperature increase. instead of the expected doubling of viscosity by using 20w-50 oil, the increase would be around 35%, with increased viscous drag and resulting power loss.

    The data obtained in the study was for industrial hydrodynamic bearings under a normal load, so the rise in temperature for a viscosity doubling may vary in an ic engine. Under heavy-duty conditions, the shear induced heating and viscosity reduction would be even more severe. another possible long-term effect of the additional shearing with higher viscosity oil is irreversible thinning due to breakdown of the vi improver molecules.

    one conclusion this study reached is to use the lowest viscosity consistent with adequate flm thickness, which applies to internal combustion lubrication as well. To correctly decide what oil would satisfy these requirements, it would require a laboratory of expensive instrumentation. Fortunately, your engine’s oem has this equipment, and uses it to develop their recommendations

    تحياتى و اعزازى و تقديرى

    توضيح سليم 100% وإضافة جميلة جدا للموضوع.

    أشكرك جزيل الشكر لإضافاتك ومداخلاتك المثمرة اللي فعلا بتضيف للمواضيع الكثير من القيمة.

    وعلى الرحب والسعة دائما :)


    ...

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية


  7. #7

    الصورة الرمزية خالدالرفاعى

    رقم العضوية : 193128

    تاريخ التسجيل : 12Oct2016

    المشاركات : 6

    النوع : ذكر

    الاقامة : دمياط

    السيارة: دايو لانوس

    السيارة[2]: ماروتى

    الحالة : خالدالرفاعى غير متواجد حالياً

    افتراضي -

    ربنا يبارك فى حضراتكم على المعلومات القيمة جدا جدا
    منكم نستفيد يا أهل الخبرة


  8. #8

    الصورة الرمزية borio1704

    رقم العضوية : 105306

    تاريخ التسجيل : 25Jun2011

    المشاركات : 3,839

    النوع : ذكر

    الاقامة : اسكندراني بره مصر

    السيارة: Not Yet

    السيارة[2]: KIA CERATO EX 2014

    الحالة : borio1704 غير متواجد حالياً

    افتراضي -

    hasad">

    اقتباس المشاركة الأصلية كتبت بواسطة خالدالرفاعى مشاهدة المشاركة
    ربنا يبارك فى حضراتكم على المعلومات القيمة جدا جدا
    منكم نستفيد يا أهل الخبرة
    أشكرك جزيل الشكر.. وما زلت في انتظار ردودك عن طريقة استخدامك للسيارة.

    لا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
    مَثَلٌ صينِيّ
    Trust me, I'm an Engineer
    Ahmed Nabil Al-Bora'ie

    أعشق السيارات.. أحب اليابانية، الكورية... ولا أفضل الأوروبية



 

المواضيع المتشابهه

  1. إضافات البنزين
    بواسطة samirsaid1 في المنتدى هيــونــداى
    مشاركات: 15
    آخر مشاركة: 17-04-2012, 08:28 PM
  2. إضافات زيت المحركات
    بواسطة osha_ahmed في المنتدى ورشـــة نــايل مــــوتـــورز
    مشاركات: 7
    آخر مشاركة: 06-02-2012, 03:04 AM
  3. معلومات تهمك الزيوت واراء في الزيوت الحديثة
    بواسطة DarkMagician في المنتدى زيوت المحرك
    مشاركات: 15
    آخر مشاركة: 11-09-2011, 08:16 PM
  4. إضافات الوقود
    بواسطة sab3aawy في المنتدى سبعاويات
    مشاركات: 9
    آخر مشاركة: 05-01-2010, 07:08 PM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2