الحقونى يا أخوانا .. التوكيل مسابش حته سليمة ف الياريس !! ياريت مساعدتكم

أهل تويوتا الكرام ياريت تساعدونى .. أنا اشتريت ياريس 2006 مستعملة و روحت بيها التوكيل عملى صيانة ال 160000 كيلو .. المهم طلع بشويه توصيات أو ملاحظات (يعنى حاجات محتاجه تتغير أو حاجات للعلم ) ..

مش عارف ابدأ بمين الأول .. و ياريت التكلفة كام علشان حرام أشترى مستعمل و أدفع فوق ال 10000 جنيه لو هعمل الحاجات اللى تحت دى فى التوكيل ...

القائمة كالأتى :

- السيارة تحتاج إلى مساعدين أمامى و خلفى
- شدادت ميزان
-صور عجل خلفى
-قميص الردياتير مكسور
_ أفيز البطارية غير أصلى
_ تحتاج طقم إطارات
_ طبة الفتيس غير أصلية
_مية التبريد غير أصلية

يعنى ايه شدادات ميزان و صور عجل خلفى و قميص الردياتير ده فيه ضرر يعنى ولا أمشى بيها كده ؟!
و الحاجات غير الأصلية دى تفرق ولا أخللى بالى ؟!!

كمان هل أبدأ بالمساعدين و بعدين الإطارات !! ولا مين قبل مين

ياريت يا جماعة حد يساعدنى عشان حرام كل المصاريف دى

سيدي الفاضل تحياتي
انا مش بشوه في اي توكيل ولا لينا علاقة فيهم ...بس انت روحت برجلك مترجعش تزعل
الراجل شايف ان الكاوتش كله مش نافع ...فهيغيرهولك
مية الريداتير هو شايفها مش اصلية فهيغيرها مش عشان عاملة مشكلة ...عشان مش بتاعة تويوتا

طبة الفتيس ..المكان اللي بيتزود منه زيت الفتيس ...بيسرب ولا حاجة ولا فيه زيوت عالفتيس
افيز البطارية ده ....المسمارة وحتة الحديد اللي مثبته البطارية ...هو شايفها مش اصلية
قميص الريداتير البلاستيك اللي فوق المراوح ...مكسور بيخبط فالمروحة ولا حاجة معطل حاجة العربية بتمسك حرارة او حاجة .....هيتغير ليه ؟؟
صرر العجل اللي ورة ...بتكون صامولة 24 ..ماسكة الطنبورة باللي عليها فالاكس ....مكسورة او مشرخة او مفوتة ولا حاجة .....العجلة سابت منك وانت ماشي ولا حاجة ؟؟؟؟ يبقي مفيهاش حاجة

المساعدين دي بقا حسب الاخبتار ...لو المساعدين ضاربين زيت ...او فيه تخبيط فالعربية في المطبات او حاجة او العربية ناشفة يبقي يتغيرو ومسامير الميزان ...او الشدادات ....دول بيعملو قلق فالدركسيون ...لو الدركسيون مش ثابت ...بيحدف لوحده .او فيه تخبيط...يبقي يتغيرو

متابع معاك متقلقش ...ومبروك عليك العربية يا صديقي

اقتباس:

---

القائمة كالأتى :

- السيارة تحتاج إلى مساعدين أمامى و خلفى
- شدادت ميزان
-صور عجل خلفى
-قميص الردياتير مكسور
_ أفيز البطارية غير أصلى
_ تحتاج طقم إطارات
_ طبة الفتيس غير أصلية
_مية التبريد غير أصلية

---

هما كمان عايزنك تشترى كوتش من التوكيل ؟؟

قفيز بطاريه و ميه رادياتير .. من التوكيل ؟؟

بص لو اسعارهم معقوله .. اشترى قطع الغيار منهم الى هى ( طبه الفتيس .. قفيز بطاريه .. صره العجل الخلفى .. و ممكن قميص الرادياتير لو حالته سيئه جدا .. و احتمال الميه لو سعرها معقول ) .. باكرر لو اسعارهم معقوله فى الحاجات التافهه دى

طبه الفتيس مهمه للامان فى حاجه اساسيه

لقيت اسعار خياليه .. ابعد عن التوكيل

و روح على مكان استعمال و خد اللى محتاج تغيره .. او محل بيبيع اصلى بس بسعر موش مبالغ فيه .. و قميص الرادياتر كمان لو حاجه بسيطه ممكن بتاع الفبر يصلحه

المساعدين لو كويسين معاك فى المشى و اتزان العربيه .. يبقى غيرهم فى الوقت اللى يناسبك و بالنوع اللى يناسبك .. لو الفروقات قريبه من سعر التوكيل .. يبقى اشترى من التوكيل ( لو انت اختبرتهم عند بتاع عفشه و قال وحشين و لازم تغييرهم )

بالتوفيق

الهوا الى اتنفخت بيه الكفرات مش اصلى

أنت كسبت تشخيص شامل محترم عن العربية

اشترى قطع الغيار باقل 10 % من التوكيل علشان ضريبة المبيعات

و اعمل الصيانة عند اى ميكانيكى بربع تمن التوكيل او مركز خدمة بنصف تمن التوكيل

فيه نقطة صغيرة يجب اخذها فى الحسبان عند التعامل مع التوكيلات ... المحترمة ...
زى مثلا .... بييحاولوا يحافظوا على عربيتهم ضد اى قطع غيار مش اصلية ... الى هى مش من عندهم يعنى .... منها .. يحافظ على حالة العربية لمدة طويلة ... و منها .. مكسبه المادى
فاحيانا كتير .... تحس ان الناس فى التوكيل حافظين ... مش فاهمين ... اى حاجة مش اصلية فى العربية ... يبلغك انها مش اصلية و لازم تتغير لبديلتها الاصلية

و استشهد برأى المهندس احمد البرعى ... و اوافقه الرأى ... ان توكيل تويوتا من اكتر التوكيلات الى بتعانى من نقطة انتشار قطع الغيار غير الاصلية ... و رايى الشخصى .... ده كمان احد اسباب انتشار سيارات تويوتا بالشكل الكبير ده .... انا لا اقصد الكورولا و اللاندكروزر .... انا اقصد الهايلكس و الهاى ايس

كلام الباشمهندس احمد .. و الباشمهندس tasaka و الدكتور ماجد صح تماما ... و عن خبرة و تجربة ... قطع الغيار الاصلية حتخلى العربية تعيش معاك ... و متعملش مشاكل على المدى البعيد

فيه ميزة فى اغلب العربيات اليابانى المنتشرة ... ( ما عدا الهوندا و السوبارو ) ان صيانتهم سهلة .. مش محتاجة ان التوكيل هو بس الى يعملها ... اى ميكانيكى بيفهم و شاطر .. ممكن يشتغل فيهم
تقبل تحياتى

بصراحة مش شايف إن التوكيل كبرلك المشكلة


80% من الحاجات اللي قاللك عليها في العفشة.. يعني حاجات استهلاكية عادية جدا..

كاوتش.. مساعدين.. شداد ميزان.. صرة عجل (غالبا قصده رولمان بلي بالـCasing بتاعها)

ماهو أكيد لازم تغير كاوتش... وهو أكيد باظ لإن المساعدين بايظين... وكمان شداد الميزان باظ غالبا لنفس السبب.


صلح أصل المشكلة تلاقي المشكلة نفسها اتحلت... ده مبدأ تويوتا اللي علمته للناس كلها في العالم.



موضوع المياه بتاعت الرادياتير أنا شايفه أهم حاجة حاليا ... وفعليا فاستخدام المية الصح في دورة التبريد وسلامة الرادياتير هي أول حاجة بتحافظلك على موتورك سليم .. بعد استخدام الزيت الصح طبعا.

وقميص الرادياتير هو فعليا الحل السحري للوصول إلى كفاءة التبريد المعروفة بيها تويوتا والعربيات اليابانية عموما..

ممكن تلحمه لو هو صاج.. أو تلزقه لو هو بلاستيك.. بس أتوقع إنه يتكسر تاني.



بالنسبة لطبة زيت الفتيس .. فالمعروف عن زيت الفتيس "الأوتوماتيك" في تويوتا بالذات إنه ما بيتغيرش إلا ساعة اللزوم قوي (دي توصيات كتالوجات تويوتا حول العالم)... وأهم شيء إن ما يبقاش عندك تسريب علشان مستوى الزيت.

يعني تويوتا مش بتكلفك زيت فتيس كل 40 ألف زي عربيات تانية مثلا.. والناس اللي غيرت زيت الفتيس ما لقيتش إنه محتاج يتغير أصلا.


أفيز البطارية ممكن طبعا تجيب أي أفيز محترم ويكون القطب الموجب بتاعه معزول كويس...بس الأصلي هتجيبه وتنساه.



على فكرة..

قطع غيار تويوتا الأصلية (المكتوب عليها تويوتا الأصلية) تعتبر من أغلى قطع الغيار عموما... بس فعليا لو حسبتها هتلاقيها أرخص كتير من غيرها لإنها بتعيش مدة طويلة جدا...

وتلاقي عربيات من ماركات تانية حواليك عمالين رايحين جايين على الميكانيكي يغيرلهم قطع غيار أصلية... وانت زي الباشا بتتفرج عليهم وتقول : هما إيه اللي بيحصل معاهم علشان يروحوا يعملوا صيانة كتير كده؟؟


يا فندم... حضرتك معاك تويوتا.... يعني مش أي عربية... شركات محترمة كتير بتحاول تبقى زيها.


...

اقتباس:

---

المشاركة الأصلية كتبت بواسطة ahmed_eng2001

و استشهد برأى المهندس احمد البرعى ... و اوافقه الرأى ... ان توكيل تويوتا من اكتر التوكيلات الى بتعانى من نقطة انتشار قطع الغيار غير الاصلية ... و رايى الشخصى .... ده كمان احد اسباب انتشار سيارات تويوتا بالشكل الكبير ده .... انا لا اقصد الكورولا و اللاندكروزر .... انا اقصد الهايلكس و الهاى ايس

---

ربنا يكرمك يا بشمهندس... بترفع معنوياتي والله :)

وأتفق مع حضرتك تماما.. إن وجود قطع الغيار غير الأصلية لتويوتا هو أحد أسباب انتشار تويوتا نفسها..

يعني هتلاقي في السوق قطع غيار تويوتا الأصلية

وقطع غيار مصدرها الشركات الأصلية المصنعة لقطع الغيار (بدون كتابة اسم تويوتا عليها).. ودي بيبقى سعرها حوالي نص سعر القطع الأصلية.

ده غير التقليد.. تايواني وصيني بجميع مستوياته..

وكله بيبيع كويس... لإن "ماركة" تويوتا هي الأكثر انتشارا في العالم بدون منازع.


ده كمان ممكن تلاقي قطع غيار مشتركة مع ماركات تانية .. لإن فيه أجزاء في تويوتا مشتركة مع شركات تانية... خصوصا في الفتيس ..

والمعروف إن BMW وميني وجنرال موتورز ولاندروفر بيستخدموا صناديق تروس من Aisin إحدى شركات تويوتا وأكثرها نجاحا في العالم.

أصلا لما تسمع أسماء بعض الشركات الموردة لتويوتا هتعرف قد إيه الناس دي مش بتتعامل مع أي حد... يكفي أسماء زي Denso أو KYB .. أسماء جبارة في عالم السيارات.


...

اقتباس:

---

المهم طلع بشويه توصيات أو ملاحظات (يعنى حاجات محتاجه تتغير أو حاجات للعلم )

---

which is which ?

الحاجات دي ماتعيبش العربية ومش اساسات بس لو حاجه فيها مشكلة او هاتعمل مشكلة غيرها بالتكلفة المناسبه مع انك تحافظ على حالة العربية عموما لو في فرق بين تكلفة الاصلاح والتغيير قريبة غير احسن مع انها اجماليا اعلى تكلفة لكن بتشتري دماغك من المشاكل مستقبل غير انك بتعلي العربية كقيمة وسعر كمان بتريحك اكتر من الاصلاح لان تكلفة التغيير غير تكلفة الاصلاح في المصنعيات بشكل عام غير كدا انت بتحط فلوسك في عربيتك مش بتديها الصنايعي عشان كدا بترفع سعرها

اقتباس:

---

المشاركة الأصلية كتبت بواسطة mbx4e

الحاجات دي ماتعيبش العربية ومش اساسات بس لو حاجه فيها مشكلة او هاتعمل مشكلة غيرها بالتكلفة المناسبه مع انك تحافظ على حالة العربية عموما لو في فرق بين تكلفة الاصلاح والتغيير قريبة غير احسن مع انها اجماليا اعلى تكلفة لكن بتشتري دماغك من المشاكل مستقبل غير انك بتعلي العربية كقيمة وسعر كمان بتريحك اكتر من الاصلاح لان تكلفة التغيير غير تكلفة الاصلاح في المصنعيات بشكل عام غير كدا انت بتحط فلوسك في عربيتك مش بتديها الصنايعي عشان كدا بترفع سعرها

---

شكراً يا شباب ربنا يباركلم :)
بإذن الله هعمل اللى قولتوا عليه و ربنا يكرم و أخلص كل ده بسعر قليل :)

بعد تغيير الزيوت و الفلاتر و البوجيهات ، صلحت القربة لأنها كانت مخرومة و ده سبب أن المية كلها بتفضى بسرعة ..

أول ما يبقى معايا فلوس :N_no[1]: هشوف المساعدين ثم طقم الجنوط

اعمل الكلام دا برة التوكيل ارخص
او في مركز خدمة معتمد