الموضوع: فيات 124 الجديدة... هل تكون غلطة مازدا الكبرى؟؟

اسمح لي ابدي اعجابي بقلمك

المشاركة الأصلية كتبت بواسطة borio1704

سؤال غريب مش كده؟؟؟

إيه اللي جاب القلعة عند البحر... قصدي إيه اللي جاب فيات لمازدا؟؟؟؟

دلوقتي هنعرف...


من كام شهر.. الناس بدأت تسمع عن إن فيات نزلت عربية جديدة باسم 124.. اسبايدر

إيه ده.. 124؟؟؟؟ بتاعت زمان دي؟؟؟

أيوه... ونازلة حاجة آخر دلع..




الأول خلينا ناخد فكرة عن تاريخ الفيات 124 اسبايدر..


في الستينات والسبعينات... فيات كانت من أكبر وأهم شركات أوروبا والعالم اللي بتعمل عربيات حديثة وعملية..

كان عندها موديل عربية متوسطة اسمه 124 ...




فيه منه 3 أشكال..

العربية العائلية (سيدان/ستيشن واجن) ... طبعا كلنا عارفينها.




والكوبيه الرياضية ..



وأخيرا.. الاسبايدر... الدلوعة...




طبعا موديل الاسبايدر كان له وضع خاص في الشركة...

تصميم العربية كان مميز خصوصا إنه من تصميم بينين فارينا (أشهر مصممي سيارات فيراري) ... وكان بيتعمل بكميات قليلة .. وفيه مواتير مميزة وأداء العربية نفسها كان مميز... ده غير إنها مكشوفة (كابروليه) .. وده لوحده متعة في حد ذاتها.


ودي طبيعة عربيات الاسبايدر/رودستر عموما في العالم..

معلومة عالماشي..

اسبايدر هي تسمية فيات للعربيات المعروفة باسم رودستر roadster.. ودي كانت الطريقة الإنجليزية لصنع سيارات رياضية ممتعة.. وتتميز كلها بإنها صغيرة ومكشوفة وبها كرسيين فقط.. وأحيانا توجد كنبة خلفية لا تكفي إلا لجلوس الأطفال فقط.



المهم.. الـ124 اسبايدر فضلت تتعمل من سنة 1966.. لحد ما وقفت تماما في سنة 1982.


في الوقت ده بدأت فيات تتوسع في عربياتها المندفعة بالعجلات الأمامية.. وفضلت إنها تركز في العربيات اللي بتتباع كتير بدل ما تشتت نفسها في موديلات كتير بتبيع قليل نسبيا.

فالموديلات الرياضية عموما في فيات اندثرت.. لحد ما بدأت فيات تحاول تحسن من صورتها في السوق .. بعد سلسلة طويلة من الخيبات والخسائر في السوق على مدى 30 سنة متواصلة.

في سنة 2015.. أعلنت فيات عن عربيتها الجديدة 124 اسبايدر في معرض لوس أنجلس .. وإنها هتنزل موديل 2016.

العربية كانت فعلا مفاجئة من جميع النواحي...



العربية شكلها تحفة... حديثة وجميلة..

العربية فيها موتور 1400 سي سي تربو بيطلع في أوروبا 140 حصان .. وعزم كبير حوالي 240 نيوتن.متر..
ونسخة أمريكا الشمالية (أمريكا وكندا) نازلة بنفس الموتور بس بيطلع 160 حصان .. وعزم 249 نيوتن.متر.

الفتيس بتاعها 6 سرعات يدوية أو 6 سرعات أوتوماتيكية

تقدر توصل من 0 إلى 100 كم/س في 7.5 ثانية



المفاجأة الكبرى... العربية مش من إنتاج فيات...


العربية عبارة عن نسخة معدلة من عربية مازدا مياتا (mx-5)... وبتتصنع وتتجمع في مصنع مازدا في هيروشيما - اليابان.









الفيات فعلا نسخة من المازدا...





ده التابلوه هو نفسه... يا دوبك الماركة متغيرة بس!!!!!!!!







خلينا ناخد فكرة عن المازدا مياتا...

المازدا مياتا (mx-5) الجديدة بتنزل بموتورين ..

واحد 1500 cc من فئة مواتير مازدا الجبارة سكاي أكتيف-جي... بيطلع 130 حصان وعزمه الأقصى حوالي 150 نيوتن.متر...
والموتور ده يقدر يوصل المياتا من صفر إلى 100 كم/س في 8.3 ثانية


والتاني 2000 cc سكاي أكتيف-جي بردو.. بيطلع 160 حصان مع عزم 200 ميوتن.متر.
وبالموتور ده المياتا تقدر توصل من صفر إلى 100 كم/س في 7.3 ثانية

الموتورين بيركب عليهم فتيس سكاي أكتيف اليدوي من 6 سرعات... أو فتيس سكاي آكتيف الأوتوماتيكي من 6 سرعات بردو.


واللي ما يعرفش المازدا مياتا... هنقول له نبذة سريعة عن تاريخها..



المازدا مياتا أول ما نزلت في نهاية الثمانينات .. ما كانش في في السوق أي عربيات شبهها إلا عربية أو اتنين بس... واحدة منهم كانت من انتاج ألفاروميو (هي فعليا نسخة ألفاروميو من فيات 124).



وكانت العربيات دي غالية.. وماكانتش شكلها حلو.. لإنها كانت متصممة في الستينات أساسا.. وفكرة العربيات الرودستر أو الاسبايدر كانت قربت تموت خالص.

مازدا نزلت في الوقت ده بعربية فكرتها قديمة إنما بشكل وروح جديدة.. وسعر منافس جدا جدا...


المياتا كمان من العربيات القليلة جدا جدا المبنية على شاسيه منفصل بطريقة العمود الفقري...



وما زالت محافظة على الطريقة دي لحد دلوقتي..



تقدر تاخد فكرة أوسع عن طرق بناء السيارات من هنا http://www.nilemotors.net/nile/328233-a.html



التوليفة دي خلت مازدا مش ملاحقة على الطلبات... والعربية كانت بتتحجز وقايمة الانتظار كانت بتوصل لحد 6 شهور أحيانا.

وكل موديل جديد بينزل من المياتا كان بيتطور بشكل كبير... يخلي كل عاشق للسيارات نفسه في واحدة منها.


من الآخر... مازدا مياتا تعتبر أيقونة في عالم السيارات حاليا...

وأنا شخصيا ركبت كذا مرة في الجيل اللي فات منها.. متعة لا توصف.



المشكلة دلوقتي إن مازدا بدأت تعاني من ضعف المبيعات والأرباح.. وإنتاج مازدا كله لا يزيد عن 1.3 مليون عربية.. منهم مليون منتجين في اليابان...

وتشكيلة عربيات مازدا نفسها مش كبيرة.. وكلههم عبارة عن 7 أو 8 موديلات بالكتير (في عرف السيارات اليابانية ده يعتبر تشكيلة صغيرة جدا).

MAZDA: Models | Innovation

أعتقد إن هو ده السبب الرئيسي اللي خلى مازدا تلجأ لشركة زي فيات علشان تساعدها في تقليل الخساير..

مع إني شايف إن الحركة دي فيها غلط كبير جدا.. لإنك بتعمل لنفسك منافس .. بياخد جودة العربيات اليابانية ويستفيد منها في تقوية اسمه .. المشهور أساسا بإنه أكتر عربيات العالم فشلا من ناحية الأعطال والجودة.

وده نفس اللي عملته ميتسوبيشي قبل كده... وكل ده أدى في النهاية إلى إن ميتسوبيشي بقت تابعة لنيسان في النهاية..


أنا شخصيا أتمنى لو حصل حاجة زي كده لمازدا إنها ما تخرجش بره الشركات اليابانية الكبيرة.


شاركنا برأيك؟؟؟


...

borio1704